މޯލްޑިވްސް ކަސްޓަމްސް ސާވިސްއިން ހިފަހައްޓާފައި ހުރި ދެ ކޮންޓެއިނަރު ސިނގިރޭޓު ވަގަށްނެގި މައްސަލައާ ގުޅިގެން އިތުރު މީހަކު ހައްޔަރުކޮށްފި އެވެ.

މި މައްސަލައާ ގުޅިގެން ފުލުހުން މިއަދު މީޑިއާތަކަަށް ފޮނުވި މެސެޖެއްގައި ބުނީ، މި އަހަރުގެ އޭޕްރީލް މަހުގެ 26 ވަނަ ދުވަހު ކަސްޓަމްސްއިން ހިފަހައްޓަފައި ހުރި ދެ ކޮންޓެއިނަރު ސިނގިރޭޓް މޯލްޑިވްސް ޕޯޓްސް ލިމިޓެޑް، ހުޅުމާލެ އިންޓަނޭޝަނަލް ޓާމިނަލްގައި ބަހައްޓާފައި ހުއްޓާ ވަގަށް ނަގާފައިވާ މައްސަލަ މި މަހުގެ ނުވަވަނަ ދުވަހު ފުލުހުންނަށް ހުށަހަޅާފައިވާ ކަމަށެވެ.

ފުލުހުން މިއަދު މީޑިއާތަކަށް ފޮނުވި މެސެޖުގައި ބުނިގޮތުގައި، މި މައްސަލައާ ގުޅިގެން އިތުރު މީހަކު މި މަހުގެ 21 ވަނަ ދުވަހުގެ ރޭގެ ވަގުތެއްގައި ހައްޔަރު ކޮށްފައިވާ ކަމަށެވެ. އެއީ 52 އަހަރުގެ ދިވެހި ފިރިހެނެއް ކަމަށްވެސް ފުލުހުން ވަނީ ބުނެފަ އެވެ.

މި މައްސަލައިގެ ތަހުގީގުގެ ތެރެއިން، މި މަހުގެ 19 ވަނަ ދުވަހު ތިލަފުށީގައި ހިންގި ބަލައި ފާސްކުރުމުގެ އޮޕަރޭޝަނެއްގައި ތިލަފުށީގެ ގިނަ ސައިޓްތަކެއް ބަލައި ފާސްކޮށްފައިވާ ކަމަށާއި، މި އޮޕަރޭޝަންގެ ތެރެއިން، ވަގަށް ނަގާފައިވާ ދެ ކޮންޓެއިނަރުގެ ބައިތައް ހޯދައި އެ ތަކެތި ފުލުހުންގެ ބެލުމުގެ ދަށަށް ގެނެސްފައިވާކަމަށް ފުލުހުން ވަނީ ބުނެފަ އެވެ.

މި މައްސަލައާ ގުޅިގެން މީގެކުރިން ހަތަރު މީހަކު ވަނީ ހައްޔަރުކޮށްފަ އެވެ. އެއީ ކ. މާލެ / މއ. އެވަރ ގްލޯރީ، އަހުމަދު އާރިފް (61އ) އާއި ބ. އޭދަފުށި / ދިގަލި މުހައްމަދު ވަހީދު (65އ) އާއި ކ. މާލެ / ހ. ނިއު ހެޕިނަސް، މުއާޒު އަލީ (48އ)ގެ އިތުރުން ހދ. ވައިކަރަދޫ / މެދުރޭގެ، ޒިވާރު އިސްމާއީލް (40އ) އެވެ.

ސިނގިރޭޓް ކޮންޓެއިނަރުތަކުގެ މައްސަލައާ ގުޅިގެން ހައްޔަރުކުރި ހަތަރު މީހުން--- ފޮޓޯ: ދިވެހި ފުލުހުންގެ ހިދުމަތް

މި މައްސަލައާ ގުޅޭ އިތުރު މައުލޫމާތު ތަހުގީގު ކުރިއަށްދާ މިންވަރަކުން ހާމަކުރަމުން ގެންދާނެކަމަށް ފުލުހުން ވަނީ އިތުރަށް ބުނެފަ އެވެ.

ރާއްޖެ އަށް ވަގަށް އެތެރެކުރި މި ސިނގިރޭޓު ކޮންޓެއިނަރުތަކުގައި 1،360 ކޭސް ސިނގިރޭޓު ހުއްޓެވެ. އެއީ ޖުމްލަ 13.6 މިލިއަން ސިނގިރޭޓް ސްޓިކެވެ.އަތުލައިގަތް ބްރޭންޑުތަކުގެ ސިނގިރޭޓަށް އާއްމުކޮށް ކަނޑައަޅާފައިވާ އަގުތަކުން ޑިއުޓީ ދައްކާއިރު، 13.6 މިލިއަން ސިނގިރޭޓަށް 122 މިލިއަން ރުފިޔާ އަރާނެކަމަށް ކަސްޓަމްސްއިން ވަނީ ބުނެފަ އެވެ.