މުންޑޫ އަށް ދިމާވެފައިވާ ޒަމާންވީ ބަނދަރު މައްސަލައަށް ހައްލެއް ގެނެސްދެއްވުމުގެ ގޮތުން އެ ރަށުގެ ބަނދަރު ތަރައްގީ ކޮށްދެއްވާނެ ކަމުގެ ފުރިހަމަ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ރަށު ރައްޔިތުންނަށް އަރުވައިފި އެވެ. ރައީސުލްޖުމްހޫރިއްޔާ މި ޔަގީންކަން އަރުވާފައިވަނީ ހައްދުންމައްޗަށް މިހާރު ކުރައްވަމުން ގެންދަވާ ދަތުރުފުޅުގައި މުންޑޫ އަށް ވަޑައިގެން އެ ރަށު ރައްޔިތުންނާ ބައްދަލު ކުރައަވަމުންނެވެ.
އެ ރަށުގެ ބަނދަރުގެ މައްސަލައަކީ އެ ރަށަށް މިވަގުތު ބޭނުންވާ އެންމެ ބޮޑު ތަރައްގީ ކަމަށް ބައްދަލުވުމުގައި ވާހަކަދެއްކެވި ފަރާތެއް ވަނީ ފާހަގަކޮށްފަ އެވެ. ރައީސް ވިދާޅުވީ، ބަނދަރުގެ މައްސަލަ ހައްލުކުރުމަށް އަންނަ އަހަރުގެ ބަޖެޓުގައި ހިމަނައި އެ މައްސަލަ ހައްލުކުރާނެ ކަމަށެވެ.
އެ ރަށުން ވާހަކަ ދެއްކެވި އެހެން ބޭފުޅަކު ބުނެފައިވަނީ، ރަށް ކުޑައެއް ކަމަކު ރައީސް ވަޑައިގަތުމުން ވަރަށް ބޮޑު އުފަލަކާއި ހިތްހަމަ ޖެހުމެއް އެ ރަށު ރައްޔިތުންނަށް ލިބިފައިވާ ކަމަށެވެ. މުންޑޫ އަކީ އާބާދީގޮތުން ވަރަށް މަދު ރައްޔިތެއް ދިރިއުޅޭ ރަށެކެވެ.
ރަނގަޅު ފެންވަރުގެ ސިއްހީ މަރުކަޒެއް ބޭނުންވާ ކަމަށް އެ ރަށު ރައްޔިތެއް ފާހަގަކޮށްފައިވާތީ ރައީސް ވިދާޅުވީ އާބާދިގެ ނިސްބަތުން ސިއްހީ މަރުކަޒަކާއި ޓެސްޓުތައް ހެދޭނެ ގޮތަށް ލެބޯޓަރީގެ ހިދުމަތް ހުރިހާ ރަށެއްގައިވެސް ގާއިމްކޮށްދެއްވުމަކީ ސަރުކާރުގެ އަމާޒު ކަމަށާއި މުންޑޫ އަށް ވެސް ކުރިޔަށް އޮތް ދެ އަހަރު ތެރޭގައި މިކަން ހަމަޖެހިގެންދާނެ ކަމަށެވެ.
ރައީސްގެ މި ދަތުރުފުޅުގައި އެ ރަށުގައި އޭޓީއެމްގެ ހިދުމަތް ވަނީ ފައްޓަވައިދެއްވާފަ އެވެ. އަދި ޕޮލިސް ސްޓޭޝަންގެ ބިންގާ ވަނީ އަޅުއްވާފަ އެވެ.
