ރައްޔިތުންނަށް ވެވަޑައިގެންފައިވާ ހުރިހާ ވައުދެއް ފުއްދަވާނެ ކަމަށާއި ވައުދުތައް ފުއްދުމަށް ފައިސާ ޗާޕުނުކުރުމަށް ވީ ވައުދުވެސް ފުއްދަމުންގެންދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ލ. ފޮނަދޫ ރައްޔިތުންނާ މިރޭ ބައްދަލުކުރައްވައި ވާހަކަ ދައްކަވަމުން ރައީސް މުޢިއްޒު ވިދާޅުވީ އެމަނިކުފާނު ވައުދުވަނީ އެ ވައުދުތައް ފުއްދޭނެކަމުގެ ޔަގީންކަމާއެކުގައި ކަމަށެވެ. އަދި އެމަނިކުފާނު ވެރިކަމާ ހަވާލުވެވަޑައިގެންނެވި އިރު އަމިއްލަ ކުންފުނިތަކަށް ދައުލަތުން ދައްކަން ޖެހޭ އެތައް ހާސް މިލިޔަން ރުފިޔާގެ ބިލުތައް ނުދައްކާ އޮތްކަމަށާއި މިހާރުވެސް ދެ ބިލިއަން ރުފިޔާގެ ބިލުތައް ނުދައްކާ އޮތް އިރު އެ ބިލުތަކައް ފައިސާ ދެއްކުމަށް ކުރަންޖެހޭ ހުރިހާ މަސައްކަތްތަކެއް ކުރައްވަމުން ގެންދަވާކަން ރައީސް ފާހަގަކުރެއްވި އެވެ.
ކުންފުނިތަކަށް ދައުލަތުން ދައްކަންޖެހޭ ފައިސާ ފަސް ހަފްތާ ތެރޭގައި ދައްކާނެ ކަމަށް މި މަހު ކުރީކޮޅު ރައީސް ވަނީ އިއުލާނުކުރައްވާފަ އެވެ. އެގޮތުން މި ހިނގާ 30 ދުވަހުގެ ތެރޭގައި ކޮށްފައިވާ ބިލްތައް ފިޔަވައި ދެން ހުރި ހުރިހާ ބިލެއްގެ ފައިސާ ފަސް ހަފްތާ ތެރޭ ދައްކާ ނިންމާނެ ކަން އެމަނިކުފާނު ތަކުރާރުކުރެއްވި އެވެ.
Advertisement
"އަޅުގަނޑުވީ އެއްވެސް ވައުދެއް ދޫނުކޮށްލާނަން ނުފުއްދައެއް. އަޅުގަނޑުމެން މިގެންދަނީ ގާނޫނާ ގަވައިދުގެ ތެރެއިން ވީ ވައުދުތައް ފުއްދަމުން ރައްޔިތުންނަށް މިހެން ހުރި ހުރިހާ ދަތިތަކެއް ފިލުވައިދެމުން. އެހެންކަމުން މިފައިސާ ކުރިއަށް އޮތް ހަފްތާ ދެ ހަފްތާގެ ތެރޭގައި އަދާކޮށްދޭނަން، މިކަން އަޅުގަނޑު މި ކުރަނީ އަޅުގަނޑު ވީ އަނެއް ވައުދު ވެސް ފުއްދަމުން. އެއީ ފައިސާ ޗާޕު ނުކޮށް. ފައިސާ ޗާޕުނުކޮށް މި ކުރަނީ." ރައީސް މުޢިއްޒު ވިދާޅުވި އެވެ.
ރައްޔިތުންނަށްވީ ހުރިހާ ވައުދެއް ފުއްދަވައިދެއްވާނެކަން ތަކުރާރު ކުރައްވަމުން ރައީސް ވިދާޅުވީ އެވައުދުތައް ފުއްދަވާނީ ފައިސާ ޗާޕުނުކޮށް ކަމަށެވެ.
ވެރިކަމާ ހަވާލުވެވަޑައިގެންނެވި އިރު ރާއްޖޭގެ އިގުތިސާދު އޮތީ ނާޒުކު ހާލަތެެއްގައިކަން ފާހަގަކުރައްވައި، ރައީސް ވިދާޅުވީ އިގުތިސާދުވެސް ރަނގަޅުކުރުވަމުން އަންނަކަމަށެވެ. އިގުތިސާދު ކުރިއެރުވުމަށްޓަކައި ފަތުރުވެރިކަމުގެ ދާއިރާއާއި މަސްވެރިކަމުގެ ދާއިރާގެ އިތުރުން އިމާރާތްކުރުމުގެ ސިނާއަތް ކުރިއެރުވުމަށްޓަކައިވެސް މުހިއްމު މަސައްކަތްތަކެއް ކުރައްވަމުން ގެންދަވާ ކަމަށް ރައީސް ވިދާޅުވި އެވެ. އަދި ކުރިއަށް އޮތް ދުވަސްތަކުގައި ކޮންސްޓްރަކްޝަން ދާއިރާގެ ކުންފުނިތަކަށް ސަރުކާރުގެ މަސައްކަތްތައް ލިބެން ފަށާނެ ކަމަށާއި އޭރުން ރައްޔިތުންގެ އަތްމަތި ތަނަވަސްވާނެ ކަމަށްވެސް އެމަނިކުފާނު ވިދާޅުވި އެވެ.
