އިންތިހާބުކޮށްފައިވާ ރައީސަކު ވޭދުވެދިޔަ 40 އަހަރު ދުވަހު ތެރޭގައި އެ ރަށުގެ ފަސްގަނޑުގައި ފައިންޕުޅު ޖައްސާފައި ނުވާއިރު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިވަނީ ވެހޭ ބޯ ވިއްސާރައިގައި އެ ރަށަށް ވަޑައިގެން އެ ރަށު ރައްޔިތުންނާ ބައްދަލުކޮށްފަ އެވެ.
ރައީސުލްޖުމްހޫރިއްޔާ ކުނަހަންދޫ އަށް ވަޑައިގަތީ މިއަދު މެންދުރުގެ ވަގުތެއްގައި ހައްދުންމައްޗަށް މިހާރު ކުރައްވާ ދަތުރުފުޅުގެ ތެރެއިންނެވެ. ރައީސުލްޖުމްހޫރިއްޔާ އެ ރަށުގެ ރައްޔިތުންނާ ބައްދަލުކުރައްވާ ވާހަކަ ބަދަލުކޮށްފައިވާއިރު އެރަށު މީހުން އެންމެ ބޮޑަށް ފާހަގަކޮށްފައިވަނީ ވޭތެވެދިޔަ 40 އަހަރުތެރޭ ރައީސަކު އެ ރަށަށް ވަޑައިގެންފައި ނުވާ ކަމެވެ.
ރައްޔިތުންގެ ބައްދަލުވުމުގައި އެ ރަށު ކައުންސިލް ރައީސް، އިބްރާހިމް ޝަކީބް ވިދާޅުވެފައިވަނީ ރައީސަކު ކުނަހަންދޫއަށް ވަޑައިނުގަންނަވާތާ 40 އަހަރުވެފައިވާ ކަމަށާއި، ރައީސް ޑރ. މުޢިއްޒު އެ ރަށަށް ވަޑައިގަތުމުން އުފަލާއެކު އެކަން ފާހަގަކުރާ ކަމަށާއި، ކުނަހަންދޫގެ ތަރައްގީއަށް މިއަދު ސޮއި ކުރެވުނު ހަތަރު މަޝްރޫއަކީ އެ ރަށަށް އެންމެ ބޭނުން ޖެހިފައިވާ މަޝްރޫއުތައް ކަމަށެވެ. އަދި އެ ރަށުގެ ހުއްޓިފައިވާ ފެނާއި ނަރުދަމާގެ މަސައްކަތް ވީހާވެސް އަވަހަށް ނިންމަވާލަދެއްވުމަށް ޝަކީބް ވަނީ ރައީސްގެ އަރިހުން އެދިލައްވާފަ އެވެ.
ޝަކީބް ވަނީ އެ ރަށުގެ މަގުތައް ތަރައްގީ ކޮށްދެއްވުމަށާއި، ހުއްޓިފައިވާ ސްކޫލްގެ މަސައްކަތުގެ އިތުރުން ސިއްހީ މަރުކަޒު ތަރައްގީ ކޮށްދެއްވުމަށް ވެސް އެދިލައްވާފަ އެވެ. މި ހުރިހާ އެދުމަކަށް ރައީސް ވަނީ އުންމީދީ ޖަވާބުތަކެއް ދެއްވާފަ އެވެ. އަދި ރަށުގެ ތަރައްގީއަށް ރައްޔިތުން ބޭނުންވާ ކަންކަމުގެ ހިޔާލު ހޯއްދަވައި، ރައްޔިތުން އެދޭގޮތަށް ކުނަހަންދޫގެ ތަރައްގީގެ ކަންކަން ގެންގޮސްދެއްވާނެކަމުގެ ޔަގީންކަންވެސް އެމަނިކުފާނު ވަނީ ދެއްވާފަ އެވެ.
ކުނަހަންދޫގައި ސޮއިކުރެވުނު މަޝްރޫއުތައް؛
- ގޮނޑުދޮށް ހިމާޔަތްކުރުމުގެ މަޝްރޫއު
- މަގުތައް ޒަމާނީ ފެންވަރަށް ތަރައްގީ ކުރުމުގެ މަޝްރޫއު
- ވޮލީ ކޯޓުގެ މަޝްރޫއު
- ފިޓްނަސް އެންޑް ރެކްރިއޭޝަން ސެންޓަރުގެ މަޝްރޫއު
ރައީސް ގެ މި ދަތުރުފުޅުގައި ހިތަދޫ އާއި ކުނަހަންދޫ ގުޅާލުމަށްޓަކައި ކޯޒެވޭގެ އަމަލީ މަސައްކަތް ވަނީ ފައްޓަވައިދެއްވާފަ އެވެ.
