މާވަށުގައި އައިސް ޕްލާންޓެއް އަޅަން މިފްކޯއާ ހަވާލުކޮށްފި

ލ. މާވަށުގައި އައިސް ޕްލާންޓެއް އެޅުމުގެ މަސައްކަތް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ)އާ ހަވާލުކޮށްފި އެވެ.

މާވަށު އައިސް ޕްލާންޓުގެ މަސައްކަތް މިފްކޯއާ ހަވާލުކުރީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ލ. އަތޮޅު މީހުން ދިރިއުޅޭ ރަށްރަށަށް މިހާރު ކުރައްވަމުންގެންދަވާ ދަތުރުފުޅުގެ ތެރެއިން މިއަދު މާވަށަށް ވަޑައިގެެން އެރަށު ރައްޔިތުންނާ ބައްދަލުކުރެއްވުމަށް ބޭއްވި ރަސްމިއްޔާތުގަ އެވެ.

އެ ރަަސްމިއްޔާތުގައި މި މަޝްރޫއުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ، ފިޝަރީޒް މިނިސްޓަރު އަހުމަދު ޝިޔާމް އެވެ. އަދި މިފްކޯގެ ފަރާތުން ސޮއިކުރެއްވީ އެކުންފުނީގެ ޕްރޮޖެކްޓް ޔުނިޓުގެ މެނޭޖަރު މުހައްމަދު ޝަމީމެވެ.

މި މަޝްރޫއުގެ ދަށުން މާވަށުގައި ގާއިމުކުރުމަށް ހަމަޖެހިފައިވަނީ ދުވާލެއްގެ މައްޗަށް 30 ޓަނުގެ އައިސް އުފައްދާ އައިސްޕްލާންޓެކެވެ. އެތަނުގައި 50 ޓަނުގެ އައިސް ރައްކާކުރެވޭނެ އެވެ. 

މާވަށުގައި 25 ޓަނުގެ އައިސްޕްލާންޓަކާއި 50 ޓަނުގެ ކޯލްޑް ސްޓޯރޭޖެއް އެޅުމަށް ނިމިދިޔަ އެމްޑީޕީ ސަރުކާރުގައި ފެނަކަ ކޯޕަރޭޝަނާވެސް ހަވާލުކުރި އެވެ. ރިޔާސީ އިންތިހާބުގެ ކެމްޕެއިން ތެރޭގައި 5.5 މިލިއަން ރުފިޔާއަށް އަގުކޮށް ފެނަކައާ އެ މަޝްރޫއު ހަވާލުކުރީ ހަ މަސްތެރޭގައި މަޝްރޫއު ނިންމާ ގޮތަށެވެ.

މަސްވެރިންނަށް އައިސް ހޯދުމަށް ދިމާވާ ދަތިތަކަށް ހައްލު ހޯދައިދިނުމަށް މި ސަރުކާރުން ދަނީ ރާއްޖޭގެ އެކި ސަރަހައްދުތަކުގައި އައިސް ޕްލާންޓުތައް ގާއިމުކުރުމުގެ މަސައްކަތް ކުރަމުންނެވެ. އެގޮތުން ށ. ފުނަދޫގައި ގާއިމުކޮށްފައިވާ 30 ޓަނުގެ އައިސްޕްލާންޓް ރަސްމީކޮށް ހުޅުވައި މިިދިޔަ ހަފްތާގައި ވަނީ ބޭނުންކުރަން ފަށައިފަ އެވެ. މަސްވެރިންނަށް ފަސޭހައިން އައިސް ލިބޭނެ މަގު ފަހިކުރުމަށް ސަރުކާރުން ކުރަމުންދާ މަސައްކަތާއެކު މަސްވެރިން އައިސް ހޯދުމަށް ކުރާ ދަތުރުތައް މަދުކުރެވި ތެލަށް ކުރާ ހަރަދު ކުޑަކުރެވޭނެ އެވެ.