މާފަންނު ޕޮލިސް ސްޓޭޝަނުން ތަހުގީގު ކުރަމުންދާ، ސައިކަލަކަށް ގެއްލުން ވެފައިވާ މައްސަލައަކާ ގުޅިގެން ހޯދަންބޭނުންވެ، އެމީހާއަކީ ކާކުކަން ދެނެގަނެވިފައިނުވާތީ ހޯދިފައިނުވާ މީހަކު ހޯދަން ފުލުހުން މިއަދު އާއްމުންގެ އެހީއަށް އެދިއްޖެ އެވެ.
މި މައްސަލައާ ގުޅިގެން ފުލުހުން ވަނީ ވީޑިއޯއެއް އާއްމުކޮށްފަ އެވެ. އެ ވީޑިއޯ އާންމުކުރުމަށްފަހު ފުލުހުން ބުނީ ވީޑިއޯއިން ފެންނަ މީހާއާ ބެހޭ އެއްވެސް މައުލޫމާތެއް ލިބިފައިވާ ފަރާތެއްވާނަމަ މާފަންނު ޕޮލިސް ސްޓޭޝަންގެ ނަމްބަރު 9660183 އަށް ނުވަތަ ފުލުހުންގެ ހޮޓްލައިން ނަމްބަރު 3322112 އަށް ގުޅައި އެ މައުލޫމާތެއް ހިއްސާކުރުމަށް އެދޭ ކަމަށެވެ.
Advertisement
ފުލުހުން އާއްމުކޮށްފައިވާ ވީޑިއޯއިން ފެންނަ ގޮތުގައި މަގުމަތިގައި ޕާކު ކޮށްފައި ހުރި ސައިކަލްތަކުގެ ތެރެއިން ސައިކަލެއްގައި ވީޑިއޯ އިން ފެންނަ މީހާ އަތް ޖައްސާލުމާއިއެކު ޖެހިޖެހިގެން ހުރި ތިން ސައިކަލް ވެއްޓުނެވެ. އެހެން ނަމަވެސް އޭނާ އެކަމަށް އެއްވެސް ސަމާލުކަމެއް ނުދީ ޕިކަޕް ޑްރައިވަރަކާއި ވާހަކަދައްކަމުން ހިނގާފައި ދުރަށްދާ މަންޒަރު ވީޑިއޯއިން ވަރަށް ސާފުކޮށް ފެނެ އެވެ.
އެ މީހާ ހޯދުމަށް ފުލުހުން ކުރި އިއުލާންގައި ބުނީ، މިފަދަ މީހުން ހޯދުމުގައި ރައްޔިތުންގެ ފަރާތުން ފުލުހުންނަށް ލިބެމުންދާ އެއްބާރުލުން ފާހަގަކޮށް އެކަމަށް ޝުކުރު އަދާކޮށްފަ އެވެ.
