ޔުކްރޭނުގެ ރައީސް ޒެލެންސްކީ ބޭނުންވެގެން އުޅޭ ލޯންގް ރޭންޖް މިސައިލް ނުދިނުމަށް ވައިޓްހައުސްގައި ރައީސް ޒެލެންސްކީ އާއި އެކު ބޭއްވެވި ބައްދަލުވުމަށްފަހު އެމެރިކާގެ ރައީސް ޑޮނަލްޑް ޓްރަމްޕް ނިންމަވައިފި ކަމަށް، ވަރަށް އިތުބާރު ހުރި ވައިޓްހައުސްގެ އެތެރޭގެ މަސްދަރަކާއި ޙަވާލާދީ ބައިނަލްއަޤްވާމީ މީޑިއާއަކުން ބުނެފިއެވެ.

ޒެލެންސްކީ އާއި ބައްދަލުކުރެއްވުމަށްފަހު ޓްރަމްޕް ވިދާޅުވީ ޔޫކްރޭންގެ ލީޑަރު ޞުލްޙަ ހޯދާކަށް މަސައްކަތެއް ނުކުރާ ކަމަށާއި، އެމެރިކާގެ ފަރާތުން ރަޝިއާގެ އެތެރެއަށް ޙަމަލާ ދެވޭނެ ވަރުގެ ހަތިޔާރެއް ޒެލެންސްކީ އަކަށް ނުލިބޭނެ ކަމަށެވެ.

ރަޝިއާ ފުނޑާލުމަށްޓަކައި އެމެރިކާގެ ޓޮމަހޯކް ކްރޫޒް މިސައިލް ހޯދުމަކީ ޒެލެންސްކީގެ ނުލާހިކު ވަރުގަދަ އަމާޒެކެވެ. ޒެލެންސްކީ ޑިމާންޑް ކުރަމުން ދަނީ ޓްރަމްޕްގެ ސަރުކާރުން ޔުކްރޭނަށް އެންމެ ފަހުގެ ހަތިޔާރުތައް ދިނުމަށެވެ. އެގޮތުން ރަޝިއާގެ އެންމެ ފުނަށް ޙަމަލާ ދެވޭ ވަރުގެ މިސައިލްތައް ދިނުމަށް ޒެލެންސްކީ ވަނީ އެތައް ފަހަރަކު ވޮޝިންޓަނުގައި ދަންނަވާފައެވެ.

ފާހަގަކޮށްލަން ޖެހޭ ކަމަކީ، މި މިސައިލްތަކުގެ މަޝްވަރާތައް ފެށުމުގެ ކުރިން ހުސްވި ހަފްތާގައި ރަޝިއާގެ ރައީސް ޕޫޓިން ވަނީ އެމެރިކާއިން ޓޮމަހޯކް މިސައިލް ޔުކްރޭނަށް ދީފިނަމަ، މޮސްކޯއާއި ވޮޝިންޓަނާއި ދެމެދު އޮންނަ ގުޅުން ކެނޑިދާނެ ކަމަށް ބުނެ އިންޒާރުވެސް ދެއްވާފައެވެ. މި އިންޒާރާއި ގުޅިގެން އިއްޔެ ޓްރަމްޕް ވަނީ ޕޫޓިން އަށް ފޯނުކުރައްވައި މަޝްވަރާ ކުރައްވާފައެވެ.