ދިވެހި ޒުވާނުންގެ މެދުގައި ޝައުގުވެރިކަން އުފައްދައި، މަސްވެރިކަމާއި މަސްވެރިކަމުގެ ދާއިރާއާ ގުޅޭގޮތުން ތަމްރީނާއި ހުނަރު ހޯދުމުގެ ފުރުސަތު ޒުވާނުންނަށް ފަހިކޮށްދިނުމުގެ ގޮތުން ފިޝަރީޒް މިނިސްޓްރީ އިން ހާއްސަ ޕްރޮގްރާމެއް ފަށައިފި އެވެ.
ތިން މަސް ދުވަހުގެ މުއްދަތަކަށް ހިންގާ މި ޕްރޮގްރާމުގައި ފަންނީ މައުލޫމާތުގެ އިތުރުން އަމަލީ ގޮތުން މަސްވެރިކަމުގައި ހަރަކާތްތެރިވެ އުޅުމުގެ ފުރުސަތު ފަހިވެގެންދާނެ އެވެ. ނޮވެމްބަރު މަހުން ފެށިގެން އަންނަ އަހަރު ޖެނުއަރީގެ ނިޔަލަށް ކުރިއަށް ގެންދަން ހަމަޖެހިފައިވާ މި ޕްރޮގްރާމުގައި ކަޅުބިލަމަހުގެ ދޮށީގެ މަސްވެރިކަމުގައި ރާއްޖޭގައި ދުއްވާ އުޅަނދުތަކުގެ ތެރެއިން ނިސްބަތުން އެންމެ ފާހަގަކޮށްލެވޭ ދޮށީގެ މަސްވެރިކަން ކުރާ އުޅަނދެއްގައި ހަރަކާތްތެރިވެ އުޅުމުގެ ފުރުސަތު ލިބޭނެ އެވެ. އޭގެ މަގްސަދަކީ އެންމެ ފުންނާބު އުސް ކެޔޮޅުންގެ ފަރާތުން ތަމްރީނާއި ހުނަރު އުނގެނި ދަސްކުރުމުގެ ފުރުސަތު ފަހިކޮށްދިނުމުވެ.
މި ތަމްރީނު ޕްރޮގްރާމުގެ މުއްދަތުގައި ބައިވެރިވާ ކޮންމެ ފަރާތަކަށް ކޮންމެ ދުވަހަކު އެލަވަންސެއް ދިނުމަށް ހަމަޖެހިފައިވާ ކަމަށް މިނިސްޓްރީ އިން މައުލޫމާތު ދެއެވެ. ފުރަތަމަ ބުރުގައި ބައިވެރިވުމަށް ފުރުސަތު ދެނީ މަސްވެރިކަމަށް އަލަށް ނިކުންނަން ބޭނުންވާ ފަސް ޒުވާނަކަށެވެ.
ރާއްޖޭގެ މަސްވެރިކަން ކުރިއަރުވާ އާލާކުރުމަކީ ރައީސުލްޖުމްހޫރިއްޔާ ޑރ. މުޢިއްޒު އަދި ސަރުކާރުން ވަރަށް އިސްކަމެއް ދީގެން ކުރާ ކަމެކެވެ. މިފަދަ ޕްރޮގްރާމެއް އިންތިޒާމް ކުރުމަކީ އޭގެ އެންމެ އަލިގަދަ އެއް ހެއްކެވެ.
މިއީ ވޯލްޑް ބޭންކުގެ އެހީގައި ޓްރާންސްފޯމިންގ ފިޝަރީޒް ސެކްޓަރ އިން ސައުތް-ވެސްޓް އިންޑިއަން އޯޝަް ރީޖަން އެންޑް މޯލްޑިވްސް ޕްރޮޖެކްޓުގެ ދަށުން ހިންގާ ޕްރޮގްރާމެކެވެ.
މީގެ ކުރިން މަސްވެރިކަމުގައި އުޅުމަށްފަހު މަސްވެރިކަމުން ދުރަށްގޮސް ތިބި މީހުން އަލުން އަނބުރާ މަސްވެރިކަމަށް ނެރުމުގެ މަގުސަދުގައި މަސްވެރިކަމުގެ ސިނާއަތަށް ސަރުކާރުން އިންވެސްޓު ކޮށް މި ދާއިރާއަށް އަލަށް މީހުން ވެއްދުމަށް އިންވެސްޓް ކުރައްވާނެ ކަމަށް ދާދި ފަހުން ރައީސުލްޖުމްހޫރިއްޔާ ވަނީ ވިދާޅުވެފަ އެވެ.
މި ޕްރޮގްރާމުގައި ބައިވެރިވުމުގެ ޝަރުތުތަކަކީ؛
- މަސްވެރިކަމުގެ ސިނާއަތުގައި މަސައްކަތް ކުރުމަށް ޝައުގުވެރިކަން ހުރުން
- އުމުރުން 24 އަހަރު ދަށުގެ ފަރާތެއް ކަމުގައި ވުން
- މިނިސްޓްރީގެ މަސްވެރިންގެ ދަފްތަރުގައި ހިމެނިފައިވާ ފަރާތެއް ކަމުގައި ނުވުން
ބައިވެރިވުމަށް ހުށަހަޅަން ޖެހޭ ތަކެތި؛
- ބައިވެރިވުމަށް އެދޭ ފޯމް (މިނިސްޓްރީގެ ވެބްސައިޓުން ޑައުންލޯޑް ކުރެވޭނެ)
- ދިވެހި ރައްޔިތެއްކަން އަންގައިދޭ ކާޑުގެ ކޮޕީ
- 18 އަަހަރުން ދަށް ނަމަ ބެލެނެވެރިޔާގެ ހުއްދަ އޮތްކަމުގެ ލިޔުން
ޕްރޮގްރާމުގައި ބައިވެރިވުމުގެ ސުންގަޑި އަކީ 23 އޮކްޓޫބަރު 2025 ގެ ކުރިންނެވެ. މަތީގައިވާ ޝަރުތުތައް ހަމަވާ ފަރާތްތަކުން އެޕްލިކޭޝަން ފޯމް އަދި އެހެނިހެން ޑޮކިއުމެންޓުތައް ހުށަހަޅަން ޖެހޭނީ އީމެއިލް މެދުވެރިކޮށެވެ.
އީމެއިލް: [email protected] ، [email protected] ނުވަތަ [email protected] އަށް.
އިތުރު މައުލޫމާތު ހޯއްދެއްވުމަށް ގުޅުއްވާނީ: 3339276
