އެމެރިކާއިން ޓައިވާނަށް އެއްބިލިއަން ޑޮލަރުގެ ހަތިޔާރު ދިނުމަށް ނިންމައި ޓައިވާނާއެކު ޗައިނާ ކަނޑުގެ ސަރަޙައްދުގައި ޙަރަކާތްތެރިވާން ނިންމުމާއި އެކު، “ރަތް ރޮނގު” ހުރަސް ކޮށްފި ނަމަ އެމެރިކާ އަށް ހިތި ދައްކާލާނެ ކަމަށް ބުނެ ޗައިނާއިން އެމެރިކާއަށް އިންޒާރުދީފިއެވެ.
އެމެރިކާއިން ޓައިވާނަށް އެއް ބިލިއަން ޑޮލަރުގެ އަސްކަރީ އެހީގެ ޕެކޭޖެއް ފާސްކުރުމަށްފަހު އެ ޤައުމަށް ހުށަހެޅީ ކަނޑުގެ ތަމްރީނުތަކުގައި ބައިވެރިވުމަށެވެ. އެއީ ޗައިނާއިން ދީފާނެ ޙަމަލާއަކުން ޓައިވާންގެ ދިފާޢީ ބާރު ވަރުގަދަ ކުރުމަށެވެ.
ޗައިނާ ޤަބޫލުކުރާ ގޮތުގައި އެމެރިކާއިން މަސައްކަތްކުރަނީ ޗައިނާ އަށް ބިރު ދެއްކުމަށެވެ. އެމެރިކާއިން ފާސްކުރި މި ބޮޑު އަސްކަރީ އެހީގެ ސަބަބުން ޓައިވާނަށް ޒަމާނީ ޑިފެންސް ސިސްޓަމްތަކާއި ރާޑަރާއި މިސައިލް ފޮނުވުމުގެ ފުރުޞަތު އެމެރިކާއަށް ލިބިގެންދާމެއެވެ.
Advertisement
ޗައިނާގެ ފޮރިން މިނިސްޓްރީން ބުނީ އެމެރިކާއިން ކުރަމުން ގެންދާ ކަންތަކަށް ބެއިޖިން އިން ޖަވާބުދާރީވުމަށްޓަކައި އަޅަން ޖެހުނު ކޮންމެ ފިޔަވަޅެއް އަޅާނެ ކަމަށެވެ.
މަސްދަރުތަކުން ބުނަނީ ޖަޕާނާއި އޮސްޓްރޭލިއާ އަދި ދެކުނު ކޮރެއާ ފަދަ ޤައުމުތައް ބައިވެރިވާ ޕެސިފިކްގެ ބޮޑު ޑްރިލްއެއް ކަމަށްވާ “ރިމްޕެކް ނޭވަލް އެކްސަސައިޒް” ގައި ޓައިވާނުން ބައިވެރިވެދާނެ ކަމުގެ އިޝާރާތެއް އެމެރިކާގެ ޑިފެންސް އޮފިޝަލަކު ދީފައިވާ ކަމަށެވެ. އެހެން ކަމަށް ވާނަމަ މިއީ ޗައިނާގެ ނުފޫޒު އޮންނަ ދާއިރާގެ ކައިރީގައި ބެއިޖިންގ ސަރުކާރަށް ކުރިމަތިވާ ސީދާ އަސްކަރީ ގޮންޖެހުމެއް ކަމަށް މަސްރަޙް ދިރާސާކުރާ ފަރާތްތަކުން ބުނެއެވެ.
