ޕާކިސްތާނާއި އަފްޣާނިސްނާއި ދެމެދު ހިނގަމުންދާ ޙަމަލާބަދަލުކުރުންތައް ހުއްޓާލައި ޞުލްޙަ ވުމަށްޓަކައި މަޝްވަރާ ކުރުމަށް އަފްޣާނިސްތާނުގެ އިސްލާމިކް އެމިރޭޓް ސަރުކާރުގެ ޑިފެންސް މިނިސްޓަރު މުއްލާ މުޙައްމަދު ޔަޢްޤޫބް ހިމެނޭހެން، ދެޤައުމުގެ މަތީ ފެންވަރުގެ ވަފްދެއް ޤަޠަރުގެ ވެރިރަށް ދޯހާ އަށް މިއަދު ވަޑައިގެންފިއެވެ.

ޕާކިސްތާނުގެ ވަފުދުގައި އެ ޤައުމުގެ ޑިފެންސް މިނިސްޓަރު ޚަވާޖާ މުޙައްމަދު އާޞިފާއި އިންޓެލިޖެންސް ޗީފް ޖެނެރަލް އާޞިމް މާލިކު ހިމެނޭ ކަމަށް މަސްދަރުތަކުން ބުނެއެވެ.

އެއް ބޯޑަރެއް ހިއްސާކުރާ މި ދެޤައުމުގެ ދެމެދުގައި ހިނގަމުންދާ ހަމަނުޖެހުންތަކުގެ ސަބަބުން ދެޤައުމަށް ވެސް ބޮޑެތި ގެއްލުންތައް ލިބެމުންދާއިރު އިސްލާމްއާބާދުން ތުހުމަތު ކޮށްފައި ވަނީ އިންޑިއާ އަޑީގައި އޮވެގެން ޠާލިބާނުން ލައްވައި ޕާކިސްތާނަށް ޙަމަލާ ދެނީ ކަމަށެވެ.

ޚަބަރުތައް ބުނާ ގޮތުގައި ޤަޠަރު މެދުވެރިވެ ބާއްވާ ދޯހާ ބައްދަލުވުމުގެ މަޤްޞަދަކީ ހަނގުރާމަ ހުއްޓާލުމުގެ މުއްދަތު އިތުރުކުރުމާއި، ޕާކިސްތާނުގެ ޝަކުވާތަކަށް ޙައްލެއް ހޯދުމާއި، ބޯޑަރު ހުރަސްކޮށް ހިންގާ ޓެރަރިޒަމް ހުއްޓުވުމަށް ފިޔަވަޅުތަކެއް އެޅުމެވެ.

މައްސަލަ ހޫނުވެފައިވާ މި ދެޤައުމާއި ބެހޭ ގޮތުން ނުރަސްމީ ބައެއް މަސްދަރުތަކުން ބުނަނީ ޕާކިސްތާނުން ޠާލިބާން ސަރުކާރަށް ޙަމަލާ ދެނީ ބޭރުގެ ނުފޫޒެއް އެކަމުގައި މެދުވެރިވެގެންނެވެ. އަސި ތުހުމަތުގެ އިނގިލި ދިގުކުރަމުންދަނީ ސީދާ އެމެރިކާ އަށެވެ. ނަމަވެސް މި ވާހަކަތަކުގައި ސާބިތު ހިފޭ ކަށަވަރު ހެއްކެއް ނުފެނެއެވެ.