ރާއްޖޭގެ އިގްތިސޯދު ފުޅާކުރުމަށްޓަކައި މި ސަރުކާރުން ފެށި ބަންކަރިންގެ ހިދުމަތަށް ފާޑުވިދާޅުވެ އެ ހިދުމަތުން ދެކޮޅު ނުޖެހޭނެ ކަމަށް ކުރީގެ ރައީސް، ޔާމީން ވިދާޅުވެފައިވަނިކޮށް އެ ހިދުމަތުން މިހާތަނަށް 192 މިލިއަން ރުފިޔާގެ އާމްދަނީ އެއް ހޯދައިފި އެވެ.
އިކޮނޮމިކް މިނިސްޓަރ މުހައްމަދު ސައީދު ރައްޔިތުންގެ މަޖިލީހަށް ހާޒިރުކޮށް މެމްބަރަކު ކުރި ސުވާލަކަށް ޖަވާބު ދެއްވަމުން ވިދާޅުވީ، ނިމިދިޔަ އަހަރު ފެށި ބަންކަރިންގެ ހިދުމަތުން އެ އަހަރު ނިމުނު އިރު 44.9 މިލިއަން ރުފިޔާގެ އާމްދަނީއެއް ލިބިފައިވާ ކަމަށާއި، އަދި ހިދުމަތް ފެށުނު ފަހުން މިހާތަނަށް 192،149،939 ރުފިޔާ ލިބިފައިވާ ކަމަށެވެ. ސައީދު ވިދާޅުވީ މި މުއްދަތުގައި މި ހިދުމަތުން ޓެކްސްގެ ގޮތުގައި 17،360،589 ރުފިޔާ ދައްކާފައިވާ ކަމަށެވެ.
ބަންކަރިންގެ ހިދުމަތް މި ސަރުކާރުން ފެށުމާއެކު އިދިކޮޅު ގިނަ ފަރާތްތަކުން ފާޑުވިދާޅުވެ، މި ހިދުމަތް ދާނީ ފަނޑުފުލުން ކަމަށާއި، މިއީ ރައްޔިތުންގެ ލޮލުގައި އަޅުވާ އަދުނައެއް ކަމަށް ބުނަމުން ދިޔައެވެ. އަދި އެކަމުގައި އެންމެ ގިނައިން ފާޑުވިދާޅުވީ ޕީޕީއެމް/ޕީއެންސީގެ ޓިކެޓް ނުލިބުމުން 2023 ގެ ރިޔާސީ އިންތިހާބު ބޮއިކޮޓް ކުރަން ގޮވާލި ރައީސް ޔާމީނެވެ. އެމަނިކުފާނު ވިދާޅުވީ ބަންކަރިންގެ ހިދުމަތުން ލިބޭނެ މަންފާއެއް ރާއްޖެއަށް ނެތް ކަމަށާއި އެއަށް ކުރަންޖެހޭ ހަރަދުތައް ކަނޑާފައި ދެކޮޅު ނުޖެހޭނެ ކަމަށެވެ.
ބަންކަރިންގެ ހިދުމަތް އިހަވަންދިއްޕޮޅުގައި ފަށާފައިވަނީ ނިމިދިޔަ އަހަރު ސެޕްޓެމްބަރު މަހުގެ ތެރޭގަ އެވެ. ވިޓޯލް ނަމަކަށް ކިޔާ ތަޖުރިބާހުރި ކުންފުންޏަކާ އެކު ފެށި މި ހިދުމަތުން ލިބޭ އާމްދަނީގެ ބޮޑު ބައެއް ހިއްސާ ކުރަނީ ރާއްޖެއަށް އަލަށް އެތެރެކޮށް ވިއްކަން ފަށާފައިވާ ލޯ ސަލްފަރ އޮއިލް އިންނެވެ. ސައީދު ވިދާޅުވީ ލޯ ސަލްފަރ ފިއުލް އަކީ މީގެ ކުރިން ރާއްޖެއަށް ގެނެސްގެން ބަންކަރ ކުރި އެއްޗެއް ނޫން ކަމަށެވެ.
މި ހިދުމަތް ފެށި ފަހުން މެދުނުކެނޑި ކުރިއަށްދާ އިރު މި ހިދުމަތަކީ އޮފްޝޯ ކޮށް އެކަމަށް ހާއްސަ ބޯޓެއް ގެނެސްގެން އެސްޓީއޯ މެދުވެރިކޮށް ދޭ ހިދުމަތެކެވެ. ހިދުމަތުން ލިބޭ އާމްދަނީ ދުވަހަކަށް ވުރެ ދުވަހެއް ދަނީ އިތުރުވަމުންނެވެ. ސަރުކާރުގެ އަމާޒަކީ ކުރިއަށް އޮތް ދުވަސްތަކުގައި ހިދުމަތް ފުޅާކޮށް އާމްދަނީ ވީހާވެސް ބޮޑަށް އިތުރުކުރުމެވެ.
