މުޅި ރާއްޖެ އަށް މިދުވަސްވަރު ކުރަމުންދާ ވިއްސާރައާ ގުޅިގެން ކަނޑު ދަތުރުކުރާ ފަރާތްތަކުން މޫސުމަށް ސަމާލުވާން އަނެއްކާ ވެސް އެމްއެންޑީއެފް އިން އިލްތިމާސްކޮށްފި އެވެ.
އެމްއެންޑީއެފް އިން ބުނެފައިވަނީ މޫސުން ގޯސްވެފައިވާ މި ދުވަސްވަރަކީ ރާއްޖެ އަށް މޫސުން ގޯސް ކަނޑުގަދަ، ވައިބާރު، ވިއްސާރަ ދުވަސްވަރެއްކަމުން، މޫސުމާ ބެހޭ ގައުމީ އިދާރާއިން މޫސުން ގޯސްވާނެކަމަށް ލަފާކޮށްފައިވާތީ، ކަނޑުދަތުރުކުރާ ފަރާތްތަކުން މޫސުމަށް ސަމާލުކަން ދެއްވުމަށް އިލްތިމާސްކުރާ ކަމަށެވެ.
އެމްއެންޑީއެފް އިން ބުނީ ކޮންމެހެން ކުރަންޖެހޭ ދަތުރުތައް ނުކުރުމަށާއި، ދަތުރެއް ކޮންމެހެން ކުރަންޖެހޭ ހާލަތެއް މެދުވެރިވެއްޖެ ނަމަ އަންގަންޖެހޭ ފަރާތްތަކަށް އަންގައި އަދި މޫސުމަށް ހާއްސަ ސަމާލުކަމެއް ދެއްވުމަށެވެ. ދަތުރުކުރާ އިރު ލައިފްޖެކެޓާއި، މުވާސަލާތީ ނިޒާމާއި، ދިޔަ ހިއްކާ ޕަންޕު ފަދަ ހުރީ ރަނގަޅަށްތޯ ޗެކް ކުރުމަށްވެސް ވެސް އެމްއެންޑީއެފް އިން އިލްތިމާސްކުރި އެވެ. އަދި މުދާ އުފުލާ އުޅަނދުފަަރުން ދޯންޏަށް މުދާ ބަރުކުރުމުގައި އެކަށީގެންވާ ވަރަށް ވުރެ ބޮޑަށް ބަރު ނުކުރުމަށާއި ރަނގަޅަށް ލައިސަންލާފައި ބެހެއްޓުމަށް ވެސް އެ މުއައްސަސާއިން އިލްތިމާސްކުރެ އެވެ.
Advertisement
ރޭގަނޑު ދަތުރުފަތުރު ނުކުރުމަށާއި މޫސުން ތަންނުދޭ ނަމަ މޫސުން ރަނގަޅުވަންދެން ދަތުރުފަތުރު ނުކޮށް ފަސްކޮށްލެއްވުމަށާއި އަދި މޫސުމާ ބެހޭ ގައުމީ އިދާރާއިން ރީދޫ ނުވަތަ އޮރެންޖު ސަމާލު ނެރެފައިވަނިކޮށް ދަތުރު ނުކުރެއްވުމަށް މީގެ ކުރިން ވެސް އެމްއެންޑީއެފް އިން އިލްތިމާސްކުރި އެވެ.
އެމްއެންޑީއެޕް އަދި ކަމާބެހޭ ފަރާތްތަކުން ވިއްސާރަ ގަދަވެފައިވާ މި ދަނޑިވަޅުގައި ދަތުރު ނުކުރުމަށް ދަނީ ކެނޑިނޭޅި އިލްތިމާސްކުރަމުންނެވެ. ރޭގެ ވަގުތެއްގައި "އަލްމާކް ފިޔަ" ނަމަކަށް ކިޔާ ކޮޅުވެއްޓިއެއް ބަނޑުންޖަހާލާ އޭގެން ދަތުރުކުރި އެކަކު ވަނީ ނިޔާވެފަ އެވެ. ދެ މީހަކު ހޯދުމުގެ މަސައްކަތް އަދިވެސް ދަނީ ކުރަމުންނެވެ. މުޅި ޖުމްލަ ހަތް މީހަކު އެ ކޮޅުވެއްޓިން ދަތުރުކޮށްފައިވާއިރު ހަތަރު މީހަކު އެމްއެންޑީއެފް ގެ ކޯސްޓް ގާޑުން ވަނީ ސަލާމަތްކޮށްފަ އެވެ.
އަދި މިއަދު މެނދުރު ފަހު މާލެއިން ޅ. ނައިފަރަށް ދަތުރުކުރަމުންދިޔަ "ނަސްރު" ނަމަކަށް ކިޔާ މުދާ އުފުލާ ބޯޓެއް ދިޔާވާތީ އެމްއެންޑީއެފް ގެ ކޯސްޓް ގާޑުން ވަނީ އެ ސަރަހައްދަށް ގޮސް އޭގެން ދަތުރުކުރި ފަސް މީހުން ވެސް ސަލާމަތްކޮށްފަ އެވެ.
