މާއުނގޫދޫ ސިއްހީ މަރުކަޒަކީ 24 ގަޑިއިރު ހިދުމަތްދޭ މަރުކަޒަކަށް ހެދުމަށް ގަސްދުކުރައްވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މި މޭރުމުން ވިދާޅުވީ އެމަނިކުފާނު ށ. އަތޮޅުގެ މީހުން ދިރިއުޅޭ ރަށްރަށް ކުރެއްވި ދަތުރުފުޅުގެ ތެރެއިން އެންމެފަހުގެ މަންޒިލެއްގެ ގޮތުން އެ އަތޮޅު މާއުނގޫދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުންނެވެ. މި ބައްދަލުކުރެއްވުމުގައި، މޫސުން ތަންނުދިނުމުގެ ސަބަބުން، މަޝްރޫއުތައް ފެށުމުގެ ރަސްމިއްޔާތުތައް ނުބޭއްވުނު ނަމަވެސް، އެ މަޝްރޫއުތައް ފައްޓަވައިގެން ކުރިއަށް ގެންގޮސް ދެއްވާނެކަމަށް ރައީސް ވަނީ ވިދާޅުވެފަ އެވެ.
ރައީސް ވިދާޅުވި ގޮތުގައި، އެ ރަށުގެ ސިއްހީ މަރުކަޒުގެ އެކްސްޓެންޝަން އިމާރާތުގެ މަސައްކަތް ނިމިގެންދާއިރު އެއީ، 24 ގަޑިއިރު ހިދުމަތްދޭ މަރުކަޒަކަށް ހެއްދެވުމަށް ގަސްތުކުރައްވާކަމަށް އެމަނިކުފާނު ވިދާޅުވި އެވެ.
Advertisement
ސިއްހީ މަރުކަޒުގެ އިތުރުން ވެސް އެ ރަށުގެ ތަރައްގީއަށް އެތަށް މަސައްކަތްތަކެއް ކުރައްވާނެކަމުގެ ޔަގީންކަން އެމަނިކުފާނު ދެއްވި އެވެ. ރައީސް މާއުނގޫދޫއަށް ކުރެއްވި ދަތުރުފުޅުގެ ތެރެއިން، އެ ރަށު ކައުންސިލްގެ އާ އިމާރާތުގެ މަސައްކަތާއި، ސްކޫލްގެ އާ އިމާރާތުގެ މަސައްކަތާއި، ގުރުއާނާބެހޭ މަރުކަޒުގެ ގޮތްޕެއް އިމާރާތްކުރުމުގެ މަސައްކަތާއި، ފިޓްނަސް އެންޑް ރެކްރިއޭޝަން ސެންޓަރު އަދި ފުލުހުންގެ މަރުކަޒު އިމާރާތްކުރުމުގެ މަސައްކަތްވެސް ވަނީ އަމަލީގޮތުން ފަށައިފަ އެވެ.
މާއުނގޫދޫގައި މިހާރުވެސް ކުރިއަށްދާ ބައެއް މަޝްރޫއުތަކަށް އަލިއަޅުއްވާލައްވަމުން ރައީސް ވިދާޅުވީ، އެ ރަށުގެ ފެނާއި ނަރުދަމާގެ މަސައްކަތް ހުއްޓިފައި އޮތް އޮތުން ނިމުމަކަށް ގެނެސް، އެ މަސައްކަތް އެމްޑަބްލިއުއެސްސީއާ ހަވާލުކުރައްވައިގެން ކުރިއަށްގެންދަވާނެ ކަމަށެވެ. މީގެ އިތުރުން ބަނދަރު މަޝްރޫއު އެ ރަށުގެ ރައްޔިތުން އެދޭގޮތަށް ހައްދަވައިދެއްވާނެ ކަމަށް އެމަނިކުފާނު ވިދާޅުވި އެވެ.
