އެސްޓީއޯއިން މޭވާއާއި ތަރުކާރީ ހިމެނޭހެން 23 ބާވަތެއް އެތެރެކުރި ނަމަވެސް ކުދި ވިޔަފާރިތަކަށް އަސަރެއް ނުކުރާނެ ކަމަށް އިކޮނޮމިކް މިނިސްޓަރު މުޙައްމަދު ސައީދު މިއަދު ވިދާޅުވެއްޖެ އެވެ.

އެސްޓީއޯއިން އަސާސީ ކާބޯތަކެތި ބާޒާރަށް ނެރުމާ ގުޅޭ ގޮތުން ނޫސްވެރިންނަށް މައުލޫމާތު ދެމުން ސައީދު ވިދާޅުވީ، ކުދި ވިޔަފާރިތަކުން ގިނަފަހަރަށް ތަކެތި ގަންނަނީ ހޯލްސޭލުކޮށް ކަމަށެވެ.

މިނިސްޓަރު ވިދާޅުވީ، އަސާސީ ބާވަތްތައް ދެނެގަނެގެން އެސްޓީއޯއިން ތަކެތި އެތެރެކުރުން މާ ރަނގަޅު ކަމަށެވެ. މިގޮތުން، އިމްޕޯޓަރުންނާއި ހޯލްސޭލަރުންނަށް އެސްޓީއޯއާ ގުޅިގެން އަސާސީ ކާބޯތަކެތި އެތެރެކުރެވޭނެކަން މިނިސްޓަރު ފާހަގަކުރެއްވި އެވެ.

މޭވާއާއި ތަރުކާރީއާއި ބިސް އަގުހެޔޮ ކުރަން އެސްޓީއޯ މެދުވެރިކޮށް ގަނޑުކޮށް އެތެރެ ކުރަން ނިންމައިފައިވާކަން އިއުލާންކުރީ މިދިޔަ މަހުގެ 10ގަ އެވެ. ރައީސް ޑރ. މުހައްމަދު މުއިއްޒު ވިދާޅުވީ އެގޮތަށް ކެބިނެޓުން ނިންމީ ރާއްޖޭގައި ފުޑް ސެކިޔުރިޓީ ގާއިމުކުރުމަށް އެ މަނިކުފާން ކަނޑައަޅާފައިވާ ސިޔާސަތު ތަންފީޒުކުރުމަށް ކުރާ މަސައްކަތުގެ ތެރެއިން ކަމަށެވެ.

ކާބޯތަކެތި ހިމެނޭހެން ރާއްޖޭގައި އާންމުކޮށް ބޭނުން ކުރާ ގިނަ ބާވަތްތަކެއްގެ އަގުތައް ދަނީ މަތިވަމުން ކަމަށް, މޯލްޑިވްސް ބިއުރޯ އޮފް ސްޓެޓިސްޓިކްސްގެ ތަފާސްހިސާބުން ދައްކާއިރު، މީގެ ކުރިން ރައީސް ވަނީ، ތަކެތީގެ އަގުބޮޑުކުރީ ސިޔާސީ ބޭނުމުގައި، ގަސްތުގައި ރާވައިގެން ކަމަށް ތުހުމަތުކުރައްވައިފަ އެވެ.

އެ މަނިކުފާނު ވިދާޅުވީ އެސްޓީއޯ މެދުވެރިކޮށް މޭވާއާއި ތަރުކާރީ ގެންނަން ނިންމެވީ އެ ފުރުސަތު ނުދޭން ކަމަށެވެ.

އެސްޓީއޯއިން ވިއްކާ ތަރުކާރީގެ ތެރޭގައި، ފިޔާ، އިނގުރު، ކެރެޓު، ބަށި، ކައްޓަލަ، އަލުވި، ކެބެޖު، ބަރަބޯ، ބޯވެލި އަދި ލޮނުމެދު ހިމެނެ އެވެ. އަދި، އެސްޓީއޯއިން އެތެރެކޮށް ވިއްކާ މޭވާގެ ތެރޭގައި ދޮންކެޔޮ، އާފަލު، އޮރެންޖު، ލުނބޯ، ޖުމްހޫރީ މޭވާ، އަނބު، ފަޅޯ، ކަރާ، މިރުސް އަދި މޭބިސްކަދުރު ހިމެނެ އެވެ.