ރަޝިއާގެ ޙިމާޔަތް ހޯއްދަވައިގެން އުޅުއްވާ ސީރިއާގެ ކުރީގެ ރައީސް ބައްޝާރުލް އަސަދުގެ ޝަރީއަތް ސީރިއާގައި ހިންގެވުމަށްޓަކައި އޭނާ ސީރިއާ ސަރުކާރާއި ޙަވާލުކުރުމަށް ރަޝިއާގެ ރައީސް ވްލަޑީމީރްބޕޫޓިންގެ އަރިހުގައި ދެންނެވުމަށް ސީރިއާގެ ރައީސް އަޙްމަދު އަލް ޝަރާ (އަބޫ މުޙައްމަދު އަލް ޖޯލާނީ) މޮސްކޯއަށް ވަޑައިގެންފިއެވެ.

މިއީ އަސަދު ވެރިކަމުން ދުރުކުރި ފަހުން ޖޯލާނީ ރަޝިޔާއަށް ކުރައްވާ ފުރަތަމަ ރަސްމީ ދަތުރުފުޅެވެ.

ސީރިއާގެ ސަރުކާރުން ބުނާ ގޮތުގައި އެ ޤައުމުގެ ރައްޔިތުންނާއި ދެކޮޅަށް ރައީސް އަސަދު ހިންގާފައިވާ ކަމަށް ތުހުމަތު ކުރެވޭ ޖަރީމާތަކަށް ޖަވާބުދާރީ ކުރުވައި، ސީރިއާގެ މިހާރުގެ ސަރުކާރަށް ބައިނަލްއަޤްވާމީ އިތުބާރު ހޯދުމަކީ ރައީސް ޖޯލާނީ (ބޭރުގެ ފަރާތްތަކާއެކު) ވެފައިވާ އެއްބަސްވުމެކެވެ. ބެލެވޭ ގޮތުގައި އެއީ އަސަދުގެ ދުޝްމަން ހުޅަނގުގެ ޤައުމުތަކާއެވެ.

ހުސްވި އަހަރުގެ ޑިސެމްބަރު މަހު ދިމިޝްޤަށް އަރައި ރިޔާސަތާއި ހަވާލުވެވަޑައިގެންނެވި ޖޯލާނީ އަކީ ސަރަޙައްދީ ޤައުމުތަކާއި އަޑިއަޑިން ޑީލްތައް ހަދައި އަދި ޚާއްޞަކޮށް ހުޅަނގާއި އެމެރިކާ އިސްވެ އޮވެ އެފަރާތްތަކަށް އެނގިގެން ދިމިޝްޤަށް އަރައި ވެރިކަން ނިގުޅައިގަތް (ޓެރަރިސްޓް) ލީޑަރެއް ކަމަށް އެއްބަޔަކު ތުހުމަތު ކުރެއެވެ.

ސީރިއާގެ ޚަބަރުތައް ބުނާ ގޮތުގައި ޖޯލާނީގެ އަމާޒަކީ ރަޝިއާ އާއި އެކު އިޤްތިޞާދީ ގޮތުންނާއި ސިޔާސީ ގޮތުން ގުޅުން ބަދަހިކުރުމެވެ. މި މަޝްވަރާތަކުގައި ސީރިއާގައި ހުރި ރަޝިޔާގެ އަސްކަރީ ތަންތަނުގެ މުސްތަޤުބަލާއި ބެހޭ ގޮތުން ވެސް މަޝްވަރާތައް ކުރިއަށްދާނެ ކަމަށް އެ ޤައުމުގެ މީޑިއާތަކުން ބުނެއެވެ.

އެމެރިކާއާއި ހުޅަނގުގެ ޤައުމުތަކުން އޮތީ ބައްޝާރުލް އަސަދުގެ ވެރިކަމުގައި ސީރިއާ އަށް ވަރަށް ބޮޑަށް ދަތިކޮށްފައެވެ. ނަމަވެސް އަސަދުގެ ވެރިކަން ވެއްޓުމާއި އެކު، ސީރިއާގެ ސިޔާސީ މަސްރަޙަށް ވަނީ ބޮޑެތި ބަދަލުތަކެއް އައިސްފައެވެ. ޙަޔާތު ތަހުރީރުލް ޝާމްގެ ކުރީގެ ލީޑަރު ޖޯލާނީ ސީރިއާގެ ރިޔާސަތަށް އައުމުން އެމެރިކާއިން ވަނީ ސީރިއާ އަށް އަޅަފައިވާ ދަތިކުރުމުގެ ފިޔަވަޅުތައް އުވާލައި ޓެރަރިސްޓް ލިސްޓުން ވެސް އެ ސަރުކާރު އުނިކޮށްފައެވެ.