ދިވެހި ބިންތަކަކީ ފައިދާހުރި މޭވާއާއި، ތަރުކާރީ އަދި ގޮވާމާއި ފަލަމަޑި ލިބޭ، މުޑުވައްކުރަން ރަނގަޅު ބިންތަކެއްކަން ކާބަފައިން ސާބިތުކޮށްދީފައިވާ ކަަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މި މޭރުމުން ވިދާޅުވީ ދަނޑުވެރިންގެ ދުވަހުގެ މުނާސަބަތާ ގުޅިގެން އެމަނިކުފާނުގެ އެކްސް އެކައުންޓްގައި މިއަދު ހިއްސާކުރެއްވި ޕޯސްޓެއްގަ އެވެ. އެމަނިކުފާނު ވަނީ ދަނޑުވެރިންގެ ދުވަހުގެ ހެޔޮ އެދުންތައް މި ސިނާއަތް ފުޅާކޮށް ކުރިއަރުވަން މަސައްކަތް ކުރާ ހުރިހާ ފަރާތްތަކަށް ފޮނުއްވައިފަ އެވެ.

ރާއްޖޭގައި ގައުމަށް ފުދޭވަރަށް، ކާނާގެ ޔަގީންކަން ގާއިމު ކުރެވޭ ވަރަށް އަދި ފުޑް ސެކިޔުރިޓީ ގާއިމު ކުރެވޭ ވަރަށް ދަނޑުވެރިކަން ފުޅާކުރުމަކީ އުއްމީދެއް ކަމަށް ރައީސް ވިދާޅުވި އެވެ.

ދަނޑުވެރިކަމުގެ ސިނާއަތް ކުރިއެރުވުމުގެ ގޮތުން ދަނޑުވެރިންނަށް ބޭނުންވާ ތަމްރީނާއި، އެކަމަށް ބޭނުންވާ އާލާތްތަކާއި، އެހެނިހެން އެހީތެރިކަން ފޯރުކޮށްދިނުމަށް ސަރުކާރުން އަންނަނީ މަސައްކަތް ކުރަމުންނެވެ. ރާއްޖެއަށް އެތެރެކުރާ ކާބޯތަކެތީގެ ނިސްބަތް މަދުކޮށް ފުޑް ސެކިއުރިޓީ އިތުރުކުރުމަށްޓަކައި އުތުރު ތިލަފަޅުގައި ދަނޑުވެރިކަމުގެ ބޮޑު މަޝްރޫއެއް ފެއްޓެވުމަށް މީގެކުރިން ރައީސް ވަނީ އިއުލާންކުރައްވައިފަ އެވެ.