ށ. ފީވަކު ކައުންސިލުން ދޫކޮށްފައިވާ ގޯތިތައް ބޭނުންކުރެވޭ ގޮތް ހަދައިދިނުމަށް އެމްޓީސީސީ އަށް ދަންނަވާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.
ށ. އަތޮޅު ފީވަކު ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން އެމަނިކުފާނު ވިދާޅުވީ، ދޫކޮށްފައިވާ 136 ގޯތި ބޭނުންކުރެއްވުމަށް ރައްޔިތުންނަށް އެހާ ފަސޭހަ ނޫން ކަމަށާއި ޗަކަވެފައިވާ އެ ބިން މެޝިނަރީސް ބޭނުންކޮށްގެން އެ ސަރަހައްދަށް ފަސް އަޅައި ހިއްކައިދީ، ބޭނުންކުރެވޭ ގޮތަށް ހެދުމަށް އެމްޓީސީސީ އަށް ދަންނަވާފައިވާ ކަމަށެވެ.
އެ ރަށުން ގޯތިތައް އެ ރަށު ރައްޔިތުންނަށް ކައުސިލުން ދޫކުރުމަށް އެދި ކުރިމަތިލުމަށް އިއުލާން ކޮށްފައިވަނީ 2023 ވަނަ އަހަރުގަ އެވެ. އަދި ގޯތި ލިބުނު މީހުންގެ ލިސްޓު އާންމުކޮށްފައިވަނީ ނިމިދިޔަ އަހަރު ޖެނުއަރީ މަހުގަ އެވެ.
ށ. އަތޮޅަށް މިހާރު ފަށާފައިވާ ދަތުރުފުޅުގައި ފީވަކަށް ވަޑައިގެން ރައީސް ވަނީ އެ ރަށަށް ބޭނުންވެފައިވާ ގިނަ ކަންތައްތަކެއް ކޮށްދެއްވާނެ ކަމުގެ ވައުދުވެ ވަޑައިގެންފަ އެވެ. އެގޮތުން އެ ރަށު ސްކޫލް ތަރައްގީ ކުރުމާއި ވޭސްޓް މެނޭޖްމަންޓް ސެންޓަރެއް ގާއިމް ކޮށްދެއްވާނެ ކަމަށް އެމަނިކުފާނު ވަނީ ވިދާޅުވެފަ އެވެ.
އެ ރަށުގެ ސިއްހީ ނިޒާމަށް އަލިއަޅުވާލައްވާ އެމަނިކުފާނު ވިދާޅުވީ އެ ރަށުގެ ސިއްހީ މަރުކަޒު ތަރައްގީކޮށް 24 ގަޑިއިރު ހިދުމަތް ލިބޭ ތަނަކަށް ހައްދަވައިދެއްވާނެ ކަމަށެވެ. އަދި ސިއްހީ މަރުކަޒު ހަދަމުންދާ ފަރާތާއި ވާހަކަދައްކާ، ހުއްޓިފައި އޮތް މަސައްކަތް އަލުން ފެއްޓެވުމުގެ މަސައްކަތް ކުރާނެ ކަމަށާއި ކުރިޔަށް އޮތް ދެ ހަފްތާ ތެރޭގައި ބާރު ސްޕީޑުގައި މަސައްކަތް ނުދާ ނަމަ ކޮންޓްރެކްޓް ޓާމިނޭޓްކޮށް، އެހެން ބަޔަކާ މަސައްކަތް ހަވާލު ކުރާނެ ކަމަށް އެމަނިކުފާނު ވަނީ ވިދާޅުވެފަ އެވެ.
އެ މަނިކުފާނު ވިދާޅުވީ ސަރުކާރުން މިބަލަނީ ކޮންމެ މަޝްރޫއުއެއް ވެސް ހަވާލުކެރެވިފައި އޮތިއްޔާ އެ އޮންނަ އުސޫލެއްގެ ތެރެއިން ކުރިޔަށް ގެންދިޔުން ކަމަށެވެ. އަދި މަސައްކަތް ދިގު ލައިގެން ދާ ކަމަށް ވަނީނަމަ ދައުލަތަށް ގެއްލުން ނުވާގޮތަށް މަސައްކަތް ޓާމިނޭޓްކޮށް އެހެން ބަޔަކާ އެކީ ނަމަވެސް ކުރިޔަށް ގެންދެވޭތޯ ކަމަށެވެ.
