މިހާތަނަށް އޮޑިޓް އޮފީހަށް ދޭ އެންމެ ބޮޑު ބަޖެޓު މަޖިލީހުން ފާސްކޮށްފި

މިހާތަނަށް އޮޑިޓަރ ޖެނެރަލް އޮފީހަށް ދޭ އެންމެ ބޮޑު ބަޖެޓު ރައްޔިތުންގެ މަޖިލީހުން ފާސްކޮށްފި އެވެ. މަޖިލީހުން އޮޑިޓް އޮފީހަށް 2026 ވަނަ އަހަރަށް ފާސްކުރި ބަޖެޓުގެ އަދަދަކީ 134.2 މިލިއަން ރުފިޔާ އެވެ.

މި ބަޖެޓް ފާސްކޮށްފައިވަނީ މަޖިލީހުގައި އޮޑިޓް އޮފީހުން އެދުނު ގޮތަށެވެ. މި ބަޖެޓު ފާސްކޮށްފައިވަނީ ވޯޓުގައި ބައިވެރިވި 51 މެމްބަރުންގެ ފުރިހަމަ އިއްތިފާގުންނެވެ. އޮޑިޓް އޮފީހުގެ ބަޖެޓަކީ ދައުލަތުގެ ބަޖެޓާ ވަކިން މަޖިލީހަށް ހުށަހަޅަން ޖެހޭ ބަޖެޓެކެވެ.

އަންނަ އަހަަރަށް ފާސްކުރި މި ބަޖެޓަކީ އެ އޮފީހަށް މިއަހަރަށް ފާސްކުރި ބަޖެޓަށް ވުރެ 20 މިލިއަން ރުފިޔާގެ އިތުރު ބަޖެޓެކެވެ. މާލިއްޔަތު ކޮމިޓީގައި އޮޑިޓު އޮފީހުގެ ފަރާތުން ބުނެފައިވަނީ މިފަދަ ބޮޑު ބަޖެޓެއް ހުށަހަޅަން ޖެހުނު މައިގަނޑު ސަބަބަކީ އެ އޮފީހުގެ ޑިޕާޓްމަންޓުތަކަކަށް ސީނިއާ އޮޑިޓަރުން ބޭނުންވާތީ ކަމަށެވެ. އަދި އޭގެ އިތުރުން މުވައްޒަފުންގެ މުސާރައިގެ އޮނިގަނޑަށް ބަދަލުތަކެއް ގެނެވިފައިވާތީ ކަމަށެވެ.

އެ އޮފީހުން ފާހަގަކުރި ގޮތުގައި 2008 ވަނަ އަހަރުން ފެށިގެން އެ އޮފީހުގެ މުވައްޒަފުންގެ މުސާރައިގެ އޮނިގަނޑަށް ބަދަލު ގެނެވިފައެއް ނުވެ އެވެ. އޭގެ ނަތީޖާ އަކީ 2020 ވަނަ އަހަރުން ފެށިގެން އެ އޮފީހުގައި މަސައްކަތްކުރާ މުވައްޒަފުން ވަޒީފާއިން ވަކިވާ މިންވަރު އިތުރުވެފައިވާ ކަމަށާއި ތައުލީމާއި ތަޖުރިބާ ހުރި ގިނަ މުވައްޒަފުންތަކެއް އެ އޮފީސް ދޫކޮށް އެހެން އޮފީސްތަކަށް ދިޔުމެވެ. އެހެން ކަމުން މުސާރައިގެ އޮނިގަނޑު މުރާޖާކޮށް 4.2 މިލިއަން ރުފިޔާ ވަނީ އެ އޮފީހުގެ ބަޖެޓަށް އިތުރުކޮށްދީފައެވެ. އަދި އޭގެ އިތުރުން މިދިޔަ ސެޕްޓެމްބަރު މަހުން ފެށިގެން އޮޑިޓް ފަންޑުގެ މުވައްޒަފުން ނޭޝަނަލް ޕޭ ފްރޭމްވަރކަށް ބަދަލުކޮށްފައިވާތީ އާއި 2026 ވަނަ އަހަރު އެ އޮފީހަށް އިތުރު ފަސް މުވައްޒަފުން ނަގާތީ، މި ދެންނެވުނު ދެ ކަމަށް އިތުރު ކޮށްފައިވާ 9.8 މިލިއަން ރުފިޔާއާއެކު އެ އޮފީހުގެ މުސާރައާއި އިނާޔަތްތަކަށް ވަނީ މުޅި ޖުމްލަ 60 މިލިއަން ރުފިޔާގެ ބަޖެޓެއް ފާސްކޮށްފަ އެވެ.

2026 ވަނަ އަހަރަށް އޮޑިޓް އޮފީހުން ހުށަހަޅާފައިވާ ބަޖެޓުގައި އެންމެ ބޮޑު އިންސައްތައެއް ހަރަދުވަނީ ވެސް މުވައްޒަފުންގެ މުސާރައާއި އެހެނިހެން އިނާޔަތްތަކަށެވެ. މުސާރައާއި އިނާޔަތްތަކަށް ބަޖެޓުގެ 45 އިންސައްތަ ހަރަދުވާ އިރު ދެވަނައަށް އެންމެ ބޮޑު ހަރަދެއް ހަރަދުވަނީ ހުޅުމާލޭގައި އަލަށް އިމާރާތްކުރާ އެ އޮފީހުގެ އިމާރާތަށެވެ. އެއީ ބަޖެޓުގެ 31 އިންސައްތަ އެވެ.