ށ. ކަނޑިތީމުގައި މިއަދު ބިންގާ އެޅުނު ބީއެމްއެލްގެ ބްރާންޗުގެ މަސައްކަތް އަންނަ މާޗު މަހަށް ނިމޭނެ ކަމަށާއި މި އޮކްޓޫބަރު މަސްތެރޭ އެ ރަށުގެ ސިއްހީ މަރުކަޒުގެ މަސައްކަތް އެހެން ބަޔަކާ ހަވާލުކޮށް 20 އެނދު ހިމެނޭ އިމާރާތެއްގެ މަސައްކަތް މި އަހަރު ފެށޭނެ ކަމަށް ރައީސުލްޖުމްހޫރިއްޔާ ޑރ. މުޢިއްޒު ވިދާޅުވެއްޖެ އެވެ.
ށ. އަތޮޅަށް ކުރައްވާ ރަސްމީ ދަތުރުފުޅުގައި އެ އަތޮޅު ކަނޑިތީމަށް ވަޑައިގެން ރައްޔިތުންނާ މުހާތަބުކޮށް ރައީސް ވަނީ އެ ރަށު ރައްޔިތުންގެ އުންމީދުތަކުގައި ކުލަޖެއްސެވުމަށް ގިނަ މަޝްރޫތަކެއް ފައްޓަވާނެކަމަށް ވިދާޅުވެފައެވެ. އެގޮތުން އެ ރަށުގެ ހުއްޓިފައިވާ ސިއްހީ މަރުކަޒުގެ އިމާރާތުގެ މަސައްކަތް ޓާމިނޭޓް ކޮށްފައި މި މަސްތެރޭގައި އެހެން ބަޔަކާ ކޮންޓްްރެކްޓް ހެދި މި އަހަރު ތެރޭގައި އަމަލީ މަސައްކަތް ފައްޓަވައިދެއްވާނެ ކަމަށް އެމަނިކުފާނު ވިދާޅުވި އެވެ.
ރައީސް ވިދާޅުވީ ސިއްހީ މަރުކަޒުގެ ސްކޯޕް ބަދަލުކޮށް އެ މަޝްރޫއުއަކީ ދެ ބުރީގެ އިމާރާތެއް ކަމަށާއި 10 ވޯޑް އެނދާއި ޕްރައިވެޓް ރޫމްތަކާއި ކޮންސަލްޓޭޝަން ރޫމާއެކު ޖުމްލަ 20 އެނދު އެ އިމާރާތުގައި ހިމެނޭނެ ކަމަށެވެ.
Advertisement
އެ ރަށުގެ ކުޅިވަރު ދާއިރާ ތަރައްގީ ކުރެއްވުމުގެ ގޮތުން ރައީސް ވިދާޅުވީ އަންނަ އަހަރުގެ ބަޖެޓުގައި ހިމަނައި އެ ރަށުގެ ފުޓްބޯޅަ ދަނޑު ތަރައްގީކުރާނީ އެހެން ރަށްތަކުގެ ދަނޑުތައް ވެސް ތަރައްގީކުރާ ގޮތަށް، ވަށާފާރު ރާނައި، ފެންސު ޖަހައި، ޗޭންޖިންގ ރޫމެއްގެ އިތުރުން ރޭނގަޑު ކުޅެވޭނެ ގޮތަށް ލައިޓު ވެސް ޖަހައިގެންނެވެ.
ކަނޑިތީމް ސްކޫލުގެ މަލްޓިޕާޕޯސް ހޯލަށް އަލިއަޅުވާލައި އެމަނިކުފާނު ވިދާޅުވީ އެ މަސައްކަތަކީ ވަރަށް ބޮޑު މަޑުޖެހުމެއްގެ ތެރެއިން ދާ ކަމެއް ކަމަށާއި ނަމަވެސް އެ މަސައްކަތް ބާރު ސްޕީޑުގައި ކުރިޔަށްދާނެ ގޮތް މިހާރު ހަމަޖެހިފައިވާ ކަމަށެވެ.
ރައީސް ވިދާޅުވީ އެމަނިކުފާނު ވެފައިވާ ވައުދުތަކާއި ދެން ވެސް ހުރި ކަންކަން ރައްޔިތުންގެ އުންމީދުތައް ހާސިލްކުރުމަށް ބާރު ސްޕީޑުގައި ކުރިއަށްދާނެ ކަމަށެވެ. ބައެއް ކަންކަން ލަސްވެފައިވަނީ ފެށިފައި ހުރި ކަންކަމުގައި ގިނަ މައްސަލަތަކެއް ދިމާވުމުން ކަމަށް އެމަނިކުފާނު ވަނީ ފާހަގަކުރައްވާފަ އެވެ.
