މައިމީހާގެ ފަރާތުން ތުއްތު ދަރިފުޅަށް ގަޔަށް އެޗްއައިވީ، ސިފިލިސް އަދި ހެޕަޓިޓިސް ބީ ނުޖެހޭ ފުރަތަމަ ގައުމަކަށް ރާއްޖެ ވެއްޖެ އެވެ. ދުނިޔޭގެ ސިއްހަތު ޖަމްއިއްޔާ، ޑަބްލިއުއެޗްއޯއިން ވަނީ އެކަން މިއަދު އިއުލާނުކޮށްފަ އެވެ.

ޑަބްލިއުއެޗްއޯ ގެ ޑިރެކްޓަރ ޖެނެރަލް ޓެޑްރޯސް އަދަނޮމް ގެބްރިޔޭސުސް ބުނެފައިވަނީ ހަރުދަނާ ސިޔާސީ ވިސްނުމާއި ދެމެހެއްޓެނިވި އިންވެސްޓްމަންޓްތަކުގެ ސަބަބުން މައިމީހާގެ ފަރާތުން ދަރިފުޅަށް މި ނުރައްކާތެރި ބަލިތައް ފެތުރުން ހުއްޓުވޭނެކަން ރާއްޖެއިން ސާބިތުކޮށްދީފައިވާ ކަމަށެވެ.

މައިމީހާގެ ފަރާތުން ދުނިޔޭގެ އެތައް މިލިއަން ބަޔަކަށް ބަލިޖެހިފައި އެބަހުއްޓެވެ. ދެކުނު އިރުމަތީ އޭޝިއާ ސަރަހައްދުގައި އެކަނިވެސް 2024 ވަނަ އަހަރު 23،000 އަށް ވުރެ ގިނަ މާބަނޑު އަންހެނުންނަށް ސިފިލިސް ޖެހިފައިވާއިރު، 8،000 އަށް ވުރެ ގިނަ ތުއްތު ކުދިން ވަނީ ކޮންޖެނިޓަލް ސިފިލިސް ޖެހިފަ އެވެ. އެޗްއައިވީ ޖެހިފައިވާ 25،000 މާބަނޑު އަންހެނުންނަށް މައިމީހާގެ ފަރާތުން ދަރިފުޅަށް ބަލި ފެތުރުން ހުއްޓުވުމަށް ފަރުވާ ދޭން ޖެހިފައިވާއިރު، ހެޕަޓައިޓިސް ބީ މި ސަރަހައްދުގެ 42 މިލިއަނަށް ވުރެ ގިނަ މީހުންނަށް ވަނީ ޖެހިފަ އެވެ.

ޑަބްލިއުއެޗްއޯގެ ދެކުނު އިރުމަތީ އޭޝިއާ ސަރަހައްދުގެ ރީޖަނަލް އޮފީހުގެ އޮފިސަރ އިން ޗާޖް ޑރ. ކެތަރީނާ ބޯހްމީ ބުނެފައިވަނީ ރާއްޖެއިން މި ހޯދި ކާމިޔާބީ އަކީ އެންމެނަށް ސިއްހީ ހިދުމަތް ފޯރުކޮށްދިނުމަށް ރާއްޖެއިން ދޭ އަހައްމިއްޔަތުކަން ރަމްޒުކޮށްދޭ ކަމެއް ކަމަށެވެ.