ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)އިން ހުޅުމާލޭގައި ތަރައްގީކޮށްފައިވާ ފްލެޓުތައް އެއްބަސްވުމާ ހިލާފަށް ކުއްޔަށް ދޭނަމަ އެފަދަ ފަރާތްތަކާ މެދު ފިޔަވަޅު އަޅާނެ ކަމަށް އެ ކުންފުނިން ބުނެފި އެވެ.
މިކަމާ ގުޅިގެން އެޗްޑީސީ އިން ނެރެފައިވާ ބަޔާނެއްގައި ބުނީ، ސޯޝަލް ހައުސިން ސްކީމަކީ ބޯހިޔާވަހިކަމުގެ ތަނަވަސްކަން ނެތް ފަރާތްތަކަށް އަތްފޯރާ އަގުގައި ބޯހިޔާވަހިކަން ފޯރުކޮށްދިނުމަށް ސަރުކާރުން ކުރިއަށްގެންދާ ޕްރޮގްރާމަކަށްވާތީ، ފުލެޓްތައް އެހެން ފަރާތްތަކަށް ކުއްޔަށް ދިނުމަކީ އެޗްޑީސީއާއި ސޯޝަލް ހައުސިން ފުލެޓް ލިބިފައިވާ ފަރާތާ ދެމެދު ވެފައިވާ އެއްބަސްވުމާ ހިލާފު ކަމެއްކަމަށް އެ ކޯޕަރޭޝަނުން ވަނީ ބުނެފަ އެވެ.
ސޯޝަލް ހައުސިން ޔުނިޓްތައް އެހެން ފަރާތަކަށް ކުއްޔަށް ދޫކޮށްފައިވޭތޯ އެޗްޑީސީއިން ބަލަމުން ގެންދާނެ ކަމަށާއި، އެއްބަސްވުމާ ހިލާފަށް އެހެންފަރާތްތަކަށް ފުލެޓް ކުއްޔަށް ދީފައިވާނަމަ އެ ފަރާތްތަކާމެދު އެއްބަސްވުމުގައި ކަނޑައަޅާފައިވާ ފިޔަވަޅު އަޅާނެ ކަމަށް އެ ކޯޕަރޭޝަނުން ވަނީ ބުނެފަ އެވެ.
އެޗްޑީސީއިން މިކަން މިގޮތަށް ނިންމާފައި މިވަނީ، ގެދޮރުވެރިޔާ ސްކީމުގެ ދަށުން ދޫކުރާ ފަހިދިރިއުޅުން ފްލެޓުތަކުގެ އެއްބަސްވުންތައް ހަދައި ފްލެޓުތައް އޭގެ ވެރިފަރާތްތަކާއި ހަވާލުކުރުމުގެ މަސައްކަތް ނުނިމެނީސް، ފްލެޓު ލިބުނު ފަރާތަކުން އެތަން ކުއްޔަށް ދިނުމަށް ކުއްޔަށްދޫކުރާ ކަމަށް އިސްތިހާރުކުރުމާ ގުޅިގެން އެފަދަ ފަރާތްތައް ހޯދައި ފްލެޓް އެއްބަސްވުން ބާތިލުކުރާނެ ކަަމަށް ފަހިދިރިއުޅުން ކޯޕަރޭޝަން (އެފްޑީސީ) އިން ނިންމާފައިވާ ދަނޑިވަޅެއްގަ އެވެ.
އެގޮތުން އެފްޑީސީގެ ތިން ކޮޓަރީގެ ފުލެޓެއް، ސަރުކާރުން ކަނޑައަޅާފައިވާ އަގަށްވުރެ ދެގުނަ ބޮޑުކޮށް، 25،000 ރުފިޔާއަށް ކުއްޔަށް ދޫކުރާ ކަމަށް އައިބޭގައި އިސްތިހާރުކޮށްފައިވެ އެވެ. ސޯޝަލް ހައުސިންގެ ދަށުން ދޫކުރާ ފުލެޓްތައް ނުއަގުގައި ކުއްޔަށް ދޫކުރާ މައްސަލައަކީ ގިނަ ބަޔަކު ކަންބޮޑުވުން ފާޅުކުރަމުން އަންނަ މައްސަލައެކެވެ.
