ވަގުތު ހުސްކޮށްގެން ނަމަވެސް ކީރިތި ގުރުއާން ކިޔަވަންޖެހޭ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ރައީސް މި މޭރުމުން ވިދާޅުވީ ކީރިތި ގުރުއާން ކިޔެވުމުގެ 37 ވަނަ ގައުމީ މުބާރާތް ނިންމުމުގެ ރަސްމިއްޔާތުގައި ވާހަކަދައްކަވަމުންނެވެ. އެމަނިކުފާނު ވިދާޅުވި ގޮތުގައި، މީގެކުރިން ދެ ނަމާދު ދޭތެރޭގެ ވަގުތުގައި ގޭގޭގައި އަދި މިސްކިތްތަކުގައި ކުދިންނާއި މައިންބަފައިން ގުރުއާން ކިޔެވުމުގައި ޝާމިލުވެ އުޅޭ ކަަމަށާއި، އެހެންނަމަވެސް ބިޒިވެގެންނާއި އެކި ކަންކަމުގެ ތެރެއިން އެ އާދަ ގާތްގަނޑަކަށް މިހާރު ނެތިގެން ގޮސްފައިވާ ކަމަށް ރައީސް ވަނީ ވިދާޅުވެފަ އެވެ. އެހެންނަމަވެސް އެއީ ރަނގަޅު ގޮތް ކަމަށް ދެކެވަޑައިނުގަންނަވާ ކަމަށް އެމަނިކުފާނު ވިދާޅުވި އެވެ.

މިދުވަސްވަރު އެންމެންވެސް ވަރަށް ބިޒީ ކަމަށާއި، އެކި ކަންކަމުގައި އާމްދަނީ ހޯދުމާއި، ކުދިންނަށް ކިޔަވައިދިނުމާއި، ކުޅިވަރު ކުޅުމުގައި ޝާމިލުވެ އުޅޭ ކަމަށާއި، އެހެންނަމަވެސް އެންމެ އިސްކަމެއް ދޭންޖެހޭ ކަންކަމުގައި ވަގުތު އޮންނަން ޖެހޭނެކަމަށް ރައީސް ވިދާޅުވި އެވެ. އިސްލާމް ދީނުގައި އަންގަވާފައިވާ އަޅުކަންތައް އަދާކުރުމުގައި އަދި އިސްލާމް ދީނުގައި އިންސާނުންގެ މައްޗަށް ވާޖިބުވެފައިވާ ކަންކަމަކީ ވަގުތު ނެތިގެން އެކަންކަމަށް ފަރުވާ ކުޑަކުރާ ކަންކަމަށްވާނަމަ މުޖުތަމައުގެ ތެރޭގައި އުފާފާގަތި ކަމާ އަމާންކަމެއް ނޯންނާނެ ކަމަށްވެސް ރައީސް ވަނީ ވިދާޅުވެފަ އެވެ.

"އެހެންވީމަ އަޅުގަނޑުމެން އިސްކަމެއް ދޭންޖެހޭ އަޅުގަނޑުމެންގެ ތެރޭގައި މިގޮތަށް ހުރި ރީތި އާދަތައް އަނބުރާ ގެންނަން. މަގުރިބު ނަމާދުކޮށްގެން އިޝާ ނަމާދާ ދޭތެރޭގައި ތަރުތީބުކޮށްގެން އަޅުގަނޑުމެން ވަގުތު ހުސްކުރަން އެބަޖެހޭ ކިޔަވަން. އެއީ ކޮންމެހެން އެގަޑީ އެކަނި ކިޔަވާކަށް ނޫން. މިސާލެއް މި ދެންނެވީ." --- ރައީސް ވިދާޅުވި އެވެ.

މިހާރަށްވުރެ ބޮޑަށް ގުރުއާނަށް ސަމާލުކަން ދީގެން ރީތިކޮށް ގުރުއާން ކިޔެވުމަށް މަސައްކަތްކޮށް ދިނުމަށާއި، ކުދިން އެ މަގުން ކުރިއަށް ދިއުމަށް އެކިކަހަލަ ކަންކަން ހުރިހާ ނިޒާމެއްގެ ތެރެއިން ކުރިއަށް ގެންދިއުމަށް މަސައްކަތްކުރުމުގެ މުހިއްމު ކަމަށް އަލިއަޅުއްވާލައްވަމުން ރައީސް ވިދާޅުވީ، ކުރީގެ މިފަދަ ރީތި އާދަތައް އަނބުރާ ގެންނަން މަސައްކަތްކުރުމުން ގައުމަށް ހަގީގީ ކުރިއެރުން ލިބޭނެ ކަމަށެވެ.