ރައްރަށުގެ އުމުރާނީ ތަރައްގީއަށް އެމްޓީސީސީއަށް ހަވާލުކޮށްގެން ކުރިއަށްގެންދާ މަޝްރޫއުތައް ނުހުއްޓި ކުރިއަށްގެންދިއުމަށް ގެންނަ ބޮޑު ހިލައިގެ ފުރަތަމަ ބަލްކު ޝިޕްމަންޓު ރާއްޖެ ގެނެސްފި އެވެ.
އެމްޓީސީސީން ނެރުނު ނޫސްބަޔާނެއްގައި ބުނީ ބޮޑުހިލައިގެ ފުރަތަމަ ބަލްކް ޝިޕްމަންޓް މިދިޔަ ހުކުރު ދުވަހު ގެނެސްފައިވާ ކަމަށާއި އެ ޝިޕްމަންޓްގައި 56,450 ޓަނުގެ ބޮޑު ހިލަ ހުންނާނެ ކަމަށެވެ. އަދި އެ ޝިޕްމަންޓުން ގެނައި ބޮޑު ހިލަ އެންމެ ފުރަތަމަ ފޯރުކޮށްދިނީ ބ. މާޅޮހު ބަނދަރު ތަރައްގީކުރުމުގެ މަޝްރޫ އަށް ކަމަށްވެސް ބުންޏެވެ.
އެމްޓީސީސީން ބުނީ އެކުންފުނީގެ އަމާޒަކީ މިއަހަރު ނިމުމުގެ ކުރިން 2.5 މިލިއަން ޓަނުގެ ބޮޑުހިލަ ރާއްޖެއަށް ގެނައުން ކަމަށާއި އެ އަދަދަކީ އެކުންފުންޏާއި ހަވާލުކޮށްފައިވާ ޕީއެސްއައޕީ މަޝްރޫއުތައް އަވަހަށް ނިންމުމަށް ބޭނުންވާ ޖުމުލަ އަދަދު ކަމަށެވެ. އަދ،ި އެ ޝިޕްމަންޓްތައް ގެނެވުމުން އެ ކުންފުންޏާއި ހަވާލުކޮށްފައިވާ ގިނަ މަޝްރޫއުތައް ނިމި ރައްޔިތުންނަށް އެތައް ލުއިފަސޭހަތަކަކާއެކު އާންމު ދިރިއުޅުމަށް އެކަށީގެންވާ ހެޔޮ ބަދަލުތަކެއް ލިބިގެންދާނެ ކަމަށްވެސް ބުންޏެވެ.
އެމްޓީސީސީއާ ހަވާލުކޮށްފައިވާ މަޝްރޫއުތަށް ނުހުއްޓި ކުރިއަށްގެންދިއުމަށް ބޮޑުހިލައިގެ ބަލްކް ޝިޕްމަންޓްތައް ގެނެސް މަޝްރޫއުތައް އަވަސްކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅެކެވެ.
ވޭތުވެދިޔަ 44 އަހަރުތެރޭ އެމްޓީސީސީން ވާނީ ރާއްޖޭގެ އެކި ކަންކޮޅުތަކުގައި އުމްރާނީ ތަރައްގީގެ ގިނަ މަޝްރޫއުތަކެއް ހިންގައި ކާމިޔާބުކަމާއެކު ނިންމައިފަ އެވެ. 1980 ވަނަ އަހަރު އެމްޓީސީސީ އުފެދުނީ ރާއްޖޭގެ ތަރައްގީގެ ދަތުރުގެ މުހިންމު މަރުހަލާއެއްގަ އެވ.ެ ކުންފުނި އުފެދުނީއްސުރެ ރާއްޖޭގެ އުމްރާނީ ތަރައްގީ އާއި އިޖުތިމާއީ ވަސީލަތްތައް ބިނާކުރުމުގައި އެމްޓީސީސީން ވާނީ މުހިންމު ދައުރެއް އަދާކޮށްފައެވެ.
