ކެޑޭޓު، ގައިޑު އަދި ސްކައުޓު ހަރަކާތްތަކުގައި ކޭމްޕް ދާނެ ތަނެއް މާލެ ކައިރީގައި ނެތުމުގެ ކަންބޮޑުވުމަށް ނިމުމެއް ގެނެސްދީ ސަރުކާރުން އެކަމަށް ހާއްސަ ތަނެއް މާލެ ކައިރީގައި މިއަދު ހުޅުވައިފި އެވެ.
ދަރިވަރުން ކޭމްޕް ދިއުމަށް ސަރުކާރުން ހަމަޖައްސައިދިނީ އެނބުދޫ ފަޅުގައި (ކްރޮސްރޯޑްސް)ގައި އެކަމަށް ހާއްސަކޮށްގެން ގާއިމްކޮށްފައިވާ ސަރަހައްދެކެވެ. 15 އަަހަރުފަހުން ސްކޫލް ކުދިންނަށް ކޭމްޕް ދާނެ ތަނެއް ހަމަޖައްސައިފީ އެ ސަރަހައްދު ރަސްމީކޮށް ހުޅުވައިދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ.
މި ސަރަހައްދަކީ ޑްރީމް އައިލެންޑް ޓޫ ލިމިޓެޑް ކްރޮސްރޯޑްސްގެ އިޖްތިމާއީ ޒިންމާގެ ދަށުން ގާއިމުކޮށްދީފައިވާ ތަނެކެވެ. ޖުމުލަ ތިން ހެކްޓަރުގެ އެ ސަރަހައްދުގައި މިސްކިތަކާއި ފަސްޓް އެއިޑް ކޮޓަރިއަކާއި އެޑްމިން އޮފީހެއް އަދި ކޮޓަރިތައް ހުރެ އެވެ.
މި ތަން ހުޅުވުމުގެ ރަސްމިއްޔާތުގައި ވާހަކަ ދައްކަވަމުން އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވީ މިއީ ކުދިންގެ ކިޔެވުމުގެ އެކި ހަރަކާތްތަކުގައި ބޭނުންކުރެވޭނެ ތަނެއް ކަމަށާއި ކެޑޭޓާއި ސްކައުޓް އަދި ގާލް ގައިޑް ފަދަ ޔުނިފޯމް ބޮޑީސް"ގެ ހަރަކާތްތަކަކީ ކުދިންގެ ހުނަރު ތަރައްގީ ކުރުމަށްޓަކައި ވަރަށް މުހިއްމު ހަރަކާތްތަކެއް ކަމަށެވެ.
އަދި ސްކޫލް ކުދިންގެ ކޭމްޕިން ގްރައުންޑެއް މާލެ ސަރަހައްދުގައި ނެތި 15 ވަރަކަށް އަހަރުވެފައިވާއިރު މިއަދު އެކަމަށް ހާއްސަކޮށްގެން ހުޅުވި ތަނަކީ އެ ކަމަށް ވަރަށް އެކަށޭނަ ތަނެއް ކަމަށާއި "ޔުނިފޯމް ބޮޑީސް" ގެ ހަރަކާތްތައް ކޭމްޕިން ގްރައުންޑާ އެކު، ފުރިހަމަ ވާނެ ކަމުގެ އުންމީދުކުރައްވާ ކަމަށް ވިދާޅުވި އެވެ.
”މިއީ ތައުލީމީ އެކި އެކި ހަރަކާތްތައް ކުރިއަށްގެންދާނެ ސަރަހައްދެއްގޮތަށް އޮންނާނީ، އަބަދު ކޭމްޕްތައް އެތަނުގައި ކުރިއަށް ނުދާނެ، އެހެން ވީމާ އެކި ދިރާސާތައް ކުދިން ކުރިއަށް ގެންދިޔުމަށްވެސް އެތަން ބޭނުންކުރެވޭނެ. އަދި އިތުރު ހަރަކާތްތަކަށްވެސް އެތަން ބޭނުންކުރާނެ،“ މިނިސްޓަރު ޝަފީއު ވިދާޅުވި އެވެ.
މިނިސްޓަރު ވިދާޅުވީ ކުދިންގެ ހުނަރުތައް ތަރައްގީކުރުމަށް އެތަނުގެ ބޭނުން ފުރިހަމައަށް ހިފުމަށް މަސައްކަތްކުރައްވާނެ ކަމަށެވެ.
