ބޯހިޔާވަހިކަމެއް ނެތިގެން ގެދޮރުވެރިޔާ ސްކީމްގެ ދަށުން ލިބުނު ފަހިދިރިއުޅުން ފްލެޓް ކުއްޔަށް ދޫކުރާ ކަމަށް ބައެއް ފަރާތްތަކުން އިސްތިހާރު ޖަހަން ފަށައިފި އެވެ.

ގެދޮރުވެރިޔާ ސްކީމްގެ ދަށުން ލިބުނު ފަހިދިރިއުޅުން ފްލެޓް ކުއްޔަށް ދޫކުރާ ކަމަށް ބައެއް ފަރާތްތަކުން އިސްތިހާރު ޖަހަން ފަށާފައިވާއިރު ފްލެޓްތައް އޭގެ ހައްގުވެރިންނަށް ހަވާލުކުރުމުގެ މަސައްކަތް އަދިވެސް ނުނިމެ އެވެ. ފްލެޓްތައް އޭގެ ހައްގުވެރިންނާ ހަވާލުކުރަން ފަށާފައިވަނީ ނިމިދިޔަ ސެޕްޓެމްބަރު މަހުގެ 28 ވަނަ ދުވަހު އެވެ.

ފްލެޓްތައް ހަވާލުކުރުމާއެކު ބައެއް ފަރާތްތަކުން މިހާރު ވަނީ އެޕާޓްމެންޓް ކުއްޔަށް ދުކުރާ ކަމަށް ސޯޝަލް މީޑިއާގެ މަންސަތަކުގައި އިސްތިހާރު ޖަހައިފަ އެވެ. އެގޮތުން ތިން ކޮޓަރީގެ އެޕާޓްމަންޓެއް 25،000 ރުފިޔާއަށް ކުއްޔަށް ދޫކުރާ ކަމަށް އިސްތިހާރު ޖަހައިފައިވެ އެވެ.

ގެދޮރުވެރިޔާ ސްކީމްގެ ދަށުން ދޫކުރި ފުލެޓްތަކުގައި ދެ ކޮޓަރީގެ އެޕާޓްމެންޓްތަކާއި ތިން ކޮޓަރީގެ އެޕާޓްމެންޓު ހުރެ އެވެ. އެގޮތުން ދެ ކޮޓަރީގެ އެޕާޓްމަންޓުތައް ދޫކުރުމަށް ހަމަޖެހިފައިވަނީ 7،000 ރުފިޔާއަށެވެ. އެ ތަންތަނުގެ މެއިންޓެނަންސް ފީގެ ގޮތުގައި ނެގުމަށް ހަމަޖެހިފައިވަނީ 1،000 ރުފިޔާ އެވެ. އަދި ސެކިއުރިޓީ ޑިޕޮސިޓުގެ ގޮތުގައި 15،000 ރުފިޔާ ދައްކަން ޖެހެ އެވެ.

ތިން ކޮޓަރީގެ އެޕާޓްމެންޓުތައް ދޫކުރަން ހަމަޖެހިފައިވަނީ 9،500 ރުފިޔާއަށެވެ. އެތަންތަނުގެ މެއިންޓެނެންސް ފީގެ ގޮތުގައި 1،500 ރުފިޔާ ނެގުމަށް ހަމަޖެހިފައިވާއިރު ސެކިއުރޓީ ޑެޕޮސިޓްގެ ގޮތުގައި 25،000 ރުފިޔާ ދައްކަން ޖެހެ އެވެ.

ސޯޝަލް ހައުސިން ސްކީމްގެ ދަށުން ލިބޭ އެޕާޓްމަންޓްތައް ނުއަގުގައި ކުއްޔަށްދޫކުރާތީ ގިނަ ބަޔަކު އަންނަނީ އެކަމާ ކަންބޮޑުވުން ފާޅުކުރަމުންނެވެ.