ނަފްސާނީ އެހީތެރިކަން ފޯރުކޮށްދިނުމަކީ އިންސާނީ ހައްގެއް ކަމަށް ފަސްޓް ލޭޑީ ސާޖިދާ މުހައްމަދު ވިދާޅުވެއްޖެ އެވެ.
ފަސްޓް ލޭޑީ މި މޭރުމުން ވިދާޅުވީ، ދުނިޔޭގެ ނަފްސާނީ ދުޅަހެޔޮކަމުގެ ދުވަހާއި ގުޅިގެން އެކަމަނާގެ އެކްސް އެކައުންޓުގައި ހިއްސާކުރެއްވި ޕޯސްޓެއްގަ އެވެ.
ސާޖިދާ ވިދާޅުވި ގޮތުގައި، މިފަދަ ދުވަހެއް ފާހަގަކުރަމުންދާއިރު، ދުނިޔޭގެ އެކިކަންކޮޅުތަކުގައި ކާރިސާތަކާއި، ހަމަނުޖެހުންތަކާއި، ހަނގުރާމަތަކުގެ ސަބަބުން ގެދޮރު ދޫކޮށް ދާން މަޖުބޫރުވެފައިވާ ފަރާތްތަކުގެ މަތިން ހަނދާން ކުރަންޖެހޭކަމަށް ވިދާޅުވެފަ އެވެ. މިފަދަ ނާޒުކު ހާލަތްތަކުގައި އެންމެ ބޮޑަށް އެހީތެރިކަން ބޭނުންވާ ފަރާތްތަކަކީ ކުޑަކުދިންނާއި އަންހެނުން ކަމަށް އެކަމަނާ ވިދާޅުވި އެވެ.
ނަފްސާނީ އެހީތެރިކަން ފޯރުކޮށްދިނުމަކީ އިހްތިޔާރީކަމެއް ނޫން ކަމަށާއި، އެއީ އިންސާނީ ހައްގެއް ކަމަށް ސާޖިދާ ވަނީ ވިދާޅުވެފަ އެވެ.
ސާޖިދާ ކުރެއްވި ޕޯސްޓުގައި އިތުރަށް ވިދާޅުވީ، ކުއްލި ހާލަތްތަކުގައި ނަފްސާނީ ފަރުވާ ދިނުމުގައި އޯގާތެރިކަން އިސްކުރުމަށާއި، ނަފްސާނީ އެހީތެރިކަން ފޯރުކޮށްދިނުމަށް އިސްކަން ދިނުމަށް ވެސް ވަނީ އެދިވަޑައިގެންފަ އެވެ.
