ނަފްސާނީ ދުޅަހެޔޮކަން ކަށަވަރުވުމަކީ އިންސާނީ ހައްގެއް ކަމަށާއި، ނަފްސާނީ ދުޅަހެޔޮަކަން އިތުރުކުރުމަށް ގައުމީ ފެންވަރުގައި މަސައްކަތް ކުރައްވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ. އެމަނިކުފާނު މިހެން ވިދާޅުވީ ދުނިޔޭގެ ނަފްސާނީ ދުޅަހެޔޮކަމުގެ ދުވަހުގެ މުނާސަބާގައި އެކްސްގައި ހިއްސާކުރެއްވި ޕޯސްޓެއްގަ އެވެ.
މިއަހަރުގެ ދުނިޔޭގެ ނަފްސާނީ ދުޅަހެޔޮކަމުގެ ދުވަހުގެ ޝިއާރު ގުޅުވާފައިވަނީ ކާރިސާތަކުގެ ހާލަތްތަކުގައިވެސް ނަފްސާނީ ދުޅަހެޔޮކަމުގެ މުހިންމުކަމަށެވެ. އެކަން ފާހަގަކުރައްވަމުން ރައީސް ވަނީ ފަލަސްތީނުގެ ރައްޔިތުންނަށް ނަފްސާނީ އެހީތެރިކަން ފޯރުކޮށްދިނުމަކީ މިވަގުތަށްވެސް ކުރަން ޖެހޭ ކަމެއްކަމަށް ވިދާޅުވެފަ އެވެ. އަދި މިކަން ކުރުމަށް ބައިނަލްއަގުވާމީ މުޖްތަމައުން އަވަސް ފިޔަވަޅުތަކެއް އެޅުމަށް، އެމަނިކުފާނު ގޮވާލެއްވި އެވެ.
މީގެ އިތުރުން އެމަނިކުފާނު ވިދާޅުވީ ނަފްސާނީ ދުޅަހެޔޮކަމަކީ، ފަރުދުންނާއި އާއިލާތަކުގެ އަދި ގައުމުގެވެސް ބިންގާކަމަށް ގަބޫލުފުޅުކުރައްވާ ކަމަށެވެ. އަދި މިދާއިރާ ހަރުދަނާ ކުރުމަށް މަސައްކަތް ކުރައްވާނެ ކަމުގެ ޔަގީންކަން ދެއްވައި ރައީސް ވިދާޅުވީ ހާއްސަކޮށް މޫސުމީ ބަދަލުތަކުގެ ސަބަބުން ކުރިމަތިވާ ކަންކަމާއި، ސިއްހީ ގޮތުން ކުރިމަތިވާ ހާލަތްތަކުގައިއާއި އިންސާނީ ކާރިސާތަކަށް އިޖާބަ ދިނުމުގައި ނަފްސާނީ އެހީތެރިކަން މުހިންމު ދައުރެއް އަދާ ކުރެވޭނެހެން ކަންކަން ބައްޓަން ކުރައްވާނެ ކަމަށެވެ.
ނަފްސާނީ ދުޅަހެޔޮކަން ކުރިއެރުވުމަށް ރާއްޖެއިން ގައުމީ ފެންވަރުގައި ގިނަ މަސައްކަތްތަކެއް އަންނަނީ ކުރަމުންނެވެ. އެގޮތުން ނަފްސާނީ އެކިއެކި ކަންކަން ކުރިމަތިލަމުންދާ ފަރާތްތަކަށް ފޯރުކޮށްދޭ ހިދުމަތްތަކަށް ހާއްސަ ހެލްޕްލައިން 1677 އިފްތިތާހުކޮށް ހިދުމަތް މިދިޔަ އަހަރު ވަނީ ފަށައިފަ އެވެ. މި ހެލްޕްލައިންގެ މައިގަނޑު އެއް މަގުސަދަކީ ނަފްސާނީ ގޮތުން އުނދަގޫވާ އެކިއެކި ހާލަތްތަކުގައާއި، ނަފްސާނީ ބަލި ހުންނަ އެކި އުމުރު ފުރައިގެ މީހުންނަށް، ނަފްސާނީ ފުރަތަމަ އެހީތެރިކަން، 24 ގަޑިއިރު ފޯރުކޮށްދިނުމެވެ.
