ދިވެހިރާއްޖެއަށް ކޮރަޕްޝަން ތައާރަފްކުރީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ކަމަށް ހުޅުދޫ ދާއިރާގެ މެމްބަރު މުހައްމަދު ޝާހިދު ވިދާޅުވެއްޖެ އެވެ.
މެމްބަރު ޝާހިދު މި މޭރުމުން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަވަމުންނެވެ. މެމްބަރު ޝާހިދު ވިދާޅުވި ގޮތުގައި، ރައްޔިތުންގެ ތެރޭގައި ރައްޔިތުންނަށް އޮޅޭގޮތަށް ކޮރަޕްޝަނާ ފަސާދައާ ވައްކަމުގެ ވާހަކަ ބަޔަކު މީހުން ދައްކާ ކަމަށާއި، ވަކިން ހާއްސަކޮށް މިފަދަ ކަންކަން ކުރަން ބޭނުންވާ ފަރާތްތަކުން އެކަންކަމުގެ ވާހަކަ ފަތުރާ ކަމަށެވެ.
ދިވެހިންނަކީ މީގެކުރިން ވަރަށް ހަމަޖެހިގެން ކޮރަޕްޝަން އެއްގޮތަކަށްވެސް ނެތި، ދިރިއުޅެމުން އައި ބައެއް ނަމަވެސް، ރާއްޖެއަށް މިހާރު ދިމާވެފައިވާ މައްސަލަތައް ދިމާވުމަށް މެދުވެރިވި ސަބަބަކީ، ކޮރަޕްޝަނުގެ ވާހަކަ ދައްކާ ރާއްޖެއަށް ބޮޑެތި ބަދަލުތަކެއް ގެންނަން އިސްލާހީ ހަރަކާތުގެ ނަމުގައި ދޮގު ވާހަކަތައް ރައްޔިތުންގެ ތެރޭގައި ފަތުރާލުން ކަމަށް މެމްބަރު ޝާހިދު ވިދާޅުވި އެވެ.
Advertisement
"ކޮރަޕްޝަނުގެ ވާހަކަވެސް މި އަންނަނީ މި ހިސާބުންނޭ. ރައީސް މައުމޫނުގެ ވެރިކަމުގައި އެމަނިކުފާނު ދިރިއުޅުއްވާ ގެކޮޅުގައި ރަނުން ހައްދަވައިފަ ހުރި ތައްޓެކޭ، މި ވެސް ކޮރަޕްޝަނޭ އިނގޭތޯ. މި ވާހަކަ ދެއްކުމަކީ ވެސް ކޮރަޕްޝަން. ކޮރަޕްޝަނަކީ ކޮންމެހެން އަޅުގަނޑުމެންނަށް ހީވެފައި މި އޮންނަނީ ކޮރަޕްޝަނަކީ ތަނެއްގައި ހުރި ފައިސާ ނަގައިގެން ފިލައިގެން ދިޔައިމަ އެއީ ކަމަށް. މިކަަހަލަ ވާހަކަދައްކާ، ރައްޔިތުންގެ މެދުގައި އޮޅޭގޮތަށް ރައްޔިތުން ނުބައި މިސްރާބަކަށް ގެންދާ ވާހަކައަކީވެސް ކޮރަޕްޝަން." މެމްބަރު ޝާހިދު ވިދާޅުވި އެވެ.
ކޮރަޕްޝަން ވަރަށް ގިނަ ގޮތްގޮތަށް މާނަކުރަންޖެހޭ ކަމަށާއި، ރައްޔިތުންނަށް ހަމަހަމަކަމާއި، އިންސާފާއި އަދި އަދުލުވެރިކަން ގެނެސްދޭނެ ކަމަށް ބުނެ ގައުމު ފަސާދަކޮށް ކޮރަޕްޝަން ހިންގީ އެމްޑީޕީން ކަމަށް މެމްބަރު ޝާހިދު ވިދާޅުވި އެވެ. ރައްޔިތުންނަށް ހެޔޮލަފާ ރަނގަޅު ވެރިކަމެއް ކުރަން އެއްވެސް ބޭފުޅަކަށް ފުރުސަތު ނުދީގެން އުޅެނީ އެމްޑީޕީން ކަމަށް ވިދޅުވެ މެމްބަރު ޝާހިދު ވަނީ އެމްޑީޕީއަށް ވަރަށް ބޮޑަށް ފާޑުވިދާޅުވެފަ އެވެ.
ކޮރަޕްޝަން ހިންގުމަށް ފަހު ކޮރަޕްޝަނަކީ ކޮބައިކަން ރައްޔިތުންނަށް ދަސްކޮށްދިނީ އިސްލާހީ ހަރަކާތުގެ ތެރެއިން އެމްޑީޕީން ކަމަށް މެމްބަރު ޝާހިދު ވަނީ އިތުރަށް ވިދާޅުވެފަ އެވެ.
