އިސްރާއީލުގެ ޒައެނިސްޓް ބޮޑުވަޒީރު ބެންޖަމިން ނަތަންޔާހޫ މަރައިލުމަށްޓަކައި އޭނާގެ ރައްޔިތުން ފާއިތުވި ދެއަހަރުތެރޭ މަދުވެގެން ހަތަރު ފަހަރު މަސައްކަތް ކޮށްފައިވާ ކަމަށް އިސްރާއީލާއި ޙަވާލާދީ ރިޕޯޓްތައް ބުނެފިއެވެ.

މެދުއިރުމައްޗަށް އަތްގަދަކުރުމަށް މަސައްކަތްކުރާ ހައްދުފަހަނައެޅި ޓެރަރިސްޓް ނަތަންޔާހޫ މަރައިލުމަށް ދިން ހަތަރު ޙަމަލާ ވެސް ދީފައިވަނީ މިދިޔަ އަހަރާއި މިއަހަރުގައެވެ. އެއީ އިސްރާއީލުގެ އެތެރޭގައި ދިރިއުޅޭ އޭނާގެ ރައްޔިތުންނާއި އަދި އަވަށްޓެރި ޤައުމުތަކުންނެވެ.

މީގެތެރެއިން ތިންޙަމަލާ އަކީ އިސްރާއީލު ރައްޔިތުން ދޭން އުޅުނު ޙަމަލާތަކެވެވެ. އެހެންކަމުން ނަތަންޔާހޫ މަރައިލުމަށް މުސްލިމު ޤައުމުތަކަށް ވުރެ ބޮޑަށް އޭނާގެ ރައްޔިތުން މަސައްކަތްކޮށްފައިވާކަން އެނގެއެވެ.

ރިޕޯޓުތައް ބުނާ ގޮތުގައި އިސްރާއީލުގެ ރައްޔިތުން ނަތަންޔާހޫ މަރައިލަން އެންމެ ފުރަތަމަ މަސައްކަތް ކޮށްފައި ވަނީ މި އަހަރުގެ ޖުލައި މަހުގައެވެ. އެ ފަހަރު އިސްރާއީލް ސިފައިން ވަނީ އެ ޤައުމުގެ އުމުރުން 70 އަހަރުގެ މީހަކު ހައްޔަރުކޮށް ޖަލަށް ލާފައެވެ. އޭގެ ތަފްޞީލެއް އިސްރާއީލަކުން ހާމައެއް ނުކުރެއެވެ. އިސްރާއީލަކީ އަބަސުވެސް އެ ޤައުމުގެ އެތެރޭގެ ހަމަނުޖެހުންތައް ސިއްރުކުރާ ޤައުމެކެވެ.

ހުސްވި ސެޕްޓެންބަރު މަހުވެސް ނަތަންޔާހޫ މަރައިލުމަށްޓަކައި އިސްރާއީލުގެ މީހަކު މަސައްކަތް ކުރިއެވެ. ތިން ވަޒަން ބޭނުންކޮށްގެން ނަތަންޔާހޫ މަރައިލާން އޭނާ ޕްލޭން ކޮށްފައި ވާއިރު އިސްރާއީލް ފުލުހުން ވަނީ އޭނާ ވެސް ހައްޔަރުކޮށްފައެވެ.

ތިންވަނަ ޙާދިސާ އަކީ މިދިޔަ އަހަރު އީރާނުގެ މަދަދު ލިބޭ ހިޒްބުاللهއިން ދިން ޙަމަލާއެވެ. އޮކްޓޯބަރ 2024ގައި ލުބުނާނުގެ ޖަމާޢަތުން ނަތަންޔާހޫ ދިރިއުޅޭ ގެއަށް ޑްރޯނުން ޙަމަލާދިންއިރު، އޭނާގެ ނަސީބު ރަނގަޅުކަމުން އެވަގުތު އޭނާ ހުރީ ގެއިން ބޭރުގައެވެ.

ނަތަންޔާހޫ މަރައިލުމަށް މަސައްކަތްކުރި ހަތަރުވަނަ ފަހަރަކީ އީރާނުން ފައިސާ ދީގެން އިސްރާއީލު މީހަކު ލައްވައި ދޭން އުޅުނު ޙަމަލާއެކެވެ. އިސްރާއީލް ފުލުހުން ބުނެފައި ވަނީ ނަތަންޔާހޫ މަރައިލުމަށް އީރާނުން ބުނެގެން އިސްރާއީލުގެ މީހަކު ދޭން އުޅުނު ޙަމަލާ އިސްރާއީލުގެ ޖާސޫސީ އިދާރާއިން ފެއިލް ކޮށްލީއެވެ. އަދި އެ މައްސަލައިގައި އުމުރުން 73 އަހަރުގެ އިސްރާއީލުގެ ރައްޔިތެއް ޖަލަށްލާފައިވާ ކަމަށާއި، އޭނާ އަކީ އީރާނުން ރެކްރޫޓް ކޮށްފައިވާ މީހެކެވެ.

ކޮންމެޔަކަސް މި ހަތަރު ޙާދިސާއަށް ބަލައިލުމުން ވެސް އެނގެނީ ނަތަންޔާހޫ އަކީ ޔަހޫދީންނަށް ވެސް ހުރި ބޮޑު ނުރައްކަލެއްކަމެވެ.