އިސްރާއީލުގެ ޖަލުގައި ހައްޔަރުކޮށްފައިވާ ގްލޯބަލް ޞުމޫދު ފްލޮޓިއްލާގެ އެކްޓިވިސްޓުންގެ ތެރެއިން 130 މީހުން ޖޯޑަން އަށް ޑީޕޯޓް ކޮށްލައިފިއެވެ.
އިސްރާއީލުން އެމީހުން ޖޯޑަން ނުވަތަ އުރުދުން އަށް ގެންދިޔައީ އުރުދުން ކޯރު ހުރަސްކޮށް ކިންގް ހުސެއިން ބްރިޖް މެދުވެރިކޮށެވެ.
ޣައްޒާ އަށް އިސްރާއީލުން އަޅާފައިވާ ހުރަސްތައް ނައްތާލުމަށް ކުރި މަސައްކަތުގައި އިސްރާއީލް ސިފައިން ހައްޔަރުކުރި ގްލޯބަލް ޞުމޫދު ފްލޮޓިއްލާގެ 130 އެކްޓިވިސްޓުން ޖޯޑަން އަށް ޑީޕޯޓް ކޮށްފި ކަމަށް އެ ޤައުމުން ވެސް ކަށަވަރުކޮށްދޭއިރު، މިއީ އިސްރާއީލުން އުރުދުނަށް ބަންދުކޮށްފައި ތިބި މީހުން އެއްފަހަރާ އެންމެ ގިނައިނ ފޮނުވައިލި ފަހަރެވެ.
އިސްރާއީލުން ޞުމޫދު ގާފިލާގެ 400 އަށްވުރެ ގިނަ މީހުން ހައްޔަރުކުރިއިރު ޑިޕޯޓް ކުރުމުގެ މަސައްކަތް ކުރިއަށް ގެންދަނީ މަރުޙަލާތަކަކަށް ބަހާލައިގެންނެވެ.
ބައިނަލްއަޤްވާމީ މީޑިއާތަކުން ބުނާ ގޮތުގައި 130 އެކްޓިވިސްޓުން އުރުދުނަށް ބަދަލުކޮށްފައިވާއިރު އިތުރު 171 އެކްޓިވިސްޓުން ގްރީސް އާއި ސްލޮވާކިއާއަށް އަދި އިތުރުބަޔަކު ތުރްކިޔޭއަށް ފޮނުވާލާފައިވާއިރު، ޤާނޫނީ އަދި އިމިގްރޭޝަންގެ އިޖުރާޢަތްތައް ނިމެންދެން ގާތްގަނޑަކަށް 138 މީހުން އިސްރާއީލުގެ ބެލުމުގެ ދަށުގައި އެބަތިއްބެވެ.
