ޓެރަރިޒަމާއި ހަރުކަށި ފިކުރާ ދެކޮޅަށް މަސައްކަތްކުރުމުގައި މީޑިއާގައި މަސައްކަތްކުރާ މީހުންގެ ގާބިލުކަން އިތުރުކޮށް އެ މީހުންގެ ހުނަރުތައް ކުރިއެރުވުމަށްޓަކައި ހާއްސަ ޕްރޮގްރާމެއް ރާއްޖޭގައި ފަށައިފި އެވެ.
"ސުލްހައިގެ ނޫސްވެރިން" ގެ ނަމުގައި އިއްޔެ ފެށި އެ ޕްރޮގްރާމަކީ ކައުންޓާ ޓެރަރިޒަމާއި މެދުމިނުގެ ވިސްނުންތަކާބެހޭ މައުލޫމާތު ފެތުރުމުގައި މީޑިއާގައި މަސައްކަތްކުރާ މީހުންގެ ގާބިލިއްޔަތު އިތުރުކޮށް, އެ މީހުންގެ ހުނަރުތައް ކުރިއެރުވުމަށްޓަކައި އިސްލާމިކް މިލިޓަރީ ކައުންޓާ ޓެރަރިޒަމް ކޯލިޝަން (އައިއެމްސީޓީސީ) އިން އިސްނަގައިގެން ކުރިއަށް ގެންދާ ހޭލުންތެރިކުރުމުގެ ސިލްސިލާ ޕްރޮގްރާމުގެ ބައެކެވެ.
ފަސް ދުވަހުގެ މުއްދަތަށް ކުރިއަށް ގެންދާ މި ތަމްރީން ޕްރޮގްރާމުގައި ރާއްޖޭގެ އެކި މީޑިއާތަކާއި ސަރުކާރުގެ އެކި މުއައްސަސާތަކުގެ މީޑިއާގައި މަސައްކަތް ކުރައްވާ 30 މީހުން ބައިވެރިވެ އެވެ.
މި ޕްރޮގްރާމް ފެށުމުގެ ގޮތުން ކުރުނބާ މޯލްޑިވްސްގައި އިއްޔެ ބޭއްވި ރަސްމިއްޔާތު ޝަރަފުވެރިކޮށްދެއްވީ ޑިފެންސް މިނިސްޓްރީގެ ޑެޕިއުޓީ މިނިސްޓަރު ފާތިމަތު މިޒްނާ އަލީ އެވެ.
ރަސްމިއްޔާތުގައި ވާހަކަދައްކަވަމުން ޑެޕިއުޓީ މިނިސްޓަރު މިޒްނާ ވިދާޅުވީ, މި ތަމްރީން ޕްރޮގްރާމަކީ އައިއެމްސީޓީސީ އާއި ރާއްޖޭގެ ނެޝަނަލް ކައުންޓާ ޓެރަރިޒަމް ސެންޓަރާ ދެމެދު އޮތް ގާތް ގުޅުން ރަމްޒުކޮށްދޭ ކަމެއް ކަމަށެވެ. އަދި ހަރުކަށިފިކުރާ ދެކޮޅަށް މީހުންގެ ގާބިލުކަން އިތުރުކުރުމަށް ސައުދީ އަރަބިއާގެ ސަރުކާރުން ކުރައްވަމުން ގެންދަވާ މަސައްކަތް ފާހަގަކުރައްވައި އެކަމަށްޓަކައި ޝުކުރު އަދާކުރެއްވި އެވެ.
މިޒްނާގެ ވާހަކައިގައި ހަރުކަށިފިކުރާއި ނަފުރަތު ފެތުރުމާ ދެކޮޅު މުޖުތަމައުތަކެއް އުފެއްދުމަށާއި އެކަމަށްޓަކައި ކަމާ ގުޅޭ އިދާރާތަކުގެ ގާބިލުކަން އިތުރުކުރުމަށް އައިއެމްސީޓީސީން ކުރައްވާ މަސައްކަތްވެސް ފާހަގަކުރެއްވި އެވެ.
ކުރުނބާ މޯލްޑިވްސްގައި ކުރިއަށްދާ "ސުލްހައިގެ ނޫސްވެރިން" ގެ ޕްރޮގްރާމުގެ ތެރެއިން---
މީޑިއާގައި މަސައްކަތްކުރާ ޕްރޮފެޝަނަލް މީހުންނާއި ނޫސްވެރިންނާއި ތައުލީމީ ދާއިރާގެ މީހުންނާއި ސިވިލް ސާވިސްގެ މުވައްޒަފުންނަށް އަމާޒުކޮށްގެން ކުރިއަށް ގެންދާ މި ޕްރޮގްރާމުގައި ޑިޖިޓަލް ޕްލެޓްފޯމްތަކުގެ ކޮންޓެންޓް އެނަލައިޒްކޮށް, ހަރުކާށި ފިކުރުގެ ވާހަކަތަކާއި ޑިޖިޓަލް ޕްލެޓްފޯމްތަކުގައި ނަފުރަތު އުފެއްދުމުގެ ވާހަކަތައް ހުންނަ ގޮތް ދެނެގަތުމާއި އެ ކަންތައްތައް ހައްލުކުރުމަށް ބުއްދިވެރި ޕްރޮފެޝަނަލް ގޮތްތައް ބޭނުންކޮށްގެން ކޮންޓެންޓް އެނަލިސިސްއާއި ދޮގު ހަބަރުތަކުގެ މަސްދަރު ހޯދުމާއި ޒަމާނީ ޑިޖިޓަލް ވެރިފިކޭޝަން ޓޫލްތައް ބޭނުންކުރާނެ ގޮތް ކިޔައިދޭން ވަނީ ހަމަޖެހިފަ އެވެ.
އޭގެ އިތުރުން ހަރުކަށި ފިކުރުގެ ވާހަތަކުގެ ސަބަބުން ކުރާ ނަފުސާނީ އަދި އިޖުތިމާއީ ނޭދެވޭ އަސަރުތަކާމެދު ހޭލުންތެރިކަން އުފެއްދުމަށާއި މީޑިއާ ރިޕޯޓްތަކުގެ ފެންވަރު ރަނގަޅުކުރުމަށްޓަކައި ޒިންމާދާރު ތަހުލީލީ ރިޕޯޓްތައް ލިޔުމުގައި ބައިވެރިންގެ ހުނަރު އިތުރުކޮށް، ފިކުރީ އަދި އިޖުތިމާއީ ރައްކާތެރިކަން ގާއިމުކުރުމަށް އެފަދަ ރިޕޯޓްތައް ލިޔާނެ ގޮތުގެ ހުނަރު އިތުރުކުރުމަކީވެސް މި ޕްރޮގްރާމުގެ އަމާޒެކެވެ.
އައިއެމްސީޓީސީއަކީ ސައުދީ އަރަބިއާގެ ސަރުކާރުން އިސްނަގައިގެން ޓެރަރިޒަމާއި ހަރުކަށި ފިކުރާ ދެކޮޅަށް މަސައްކަތް ކުރުމަށް އުފައްދާފައިވާ ބައިނަލްއަގުވާމީ ޖަމިއްޔާއެކެވެ. މި ޖަމިއްޔާގައި ރާއްޖެ ހިމެނޭހެން 42 މެންބަރު ގައުމެއް އޮވެ އެވެ.
އެ ޖަމިއްޔާއިން ދަނީ މީޑިއާ އާއި ހޭލުންތެރިކުރުވުމާއި ތައުލީމުގެ ދާއިރާތަކުގައި މެންބަރު ގައުމުތަކުގެ މެދުގައި ގާބިލިއްޔަތުކަން އުފައްދައި ގުޅުންތައް ވަރުގަދަކުރުމަށްޓަކައި މަސައްކަތް ކުރަމުންނެވެ.
އެގޮތުން ޓެރަރިޒަމާއި ހަރުކަށި ފިކުރާ ދެކޮޅަށް ކުރެވޭ ފިކުރިއްޔާތާއި މީޑިއާ މަސައްކަތްތައް އެއްބައިވަންތަކުރުމާއި ގައުމުތަކުގެ މެދުގައި ސުލްހައާއި އެކީގައި އުޅުމުގެ ސަގާފަތެއް އާލާކުރުމަކީ އައިއެމްސީޓީސީގެ ތަސައްވުރެވެ.
