ދިވެހި ދައުލަތުން ބޯހިޔާވަހިކަން ފޯރުކޮށްދީގެން ނަމަވެސް ދިވެހިރާއްޖޭގެ ހިފެހެއްޓިފައި އޮތް އާބާދީ ކުރިއަރައިގެންދާނެ ގޮތެއް ވިސްނުމަކީ މުހިއްމު ކަމެއް ކަމަށް ދެކިވަޑައިގަންނަވާ ކަމަށް ބާރަށު ދާއިރާގެ މެމްބަރު، އިބްރާހިމް ޝުޖާއު ވިދާޅުވެއްޖެ އެވެ.
މެމްބަރު ޝުޖާއު މި މޭރުމުން ވިދާޅުވީ، ސަރުކާރުގެ ފަރާތުން ގުރައިދޫ ދާއިރާގެ މެމްބަރު ހަނާން މުހައްމަދު ރަޝީދު މަޖިލީހަށް މިހާރު ހުށަހަޅުއްވާފައިވާ ރީ-އެމްޕްލޮއިމެންޓްގެ ބިލަށް ބަހުސްކުރައްވަމުންނެވެ. ޝުޖާއު ވިދާޅުވި ގޮތުގައި، ރައީސް މައުމޫންގެ ވެރިކަމުގެ ކުރިން ނެގުނު ބޯހިމެނުންތަކުން ދައްކާ ގޮތުން ދިވެހި ރައްޔިތެއްގެ އުމުރަކީ 45 އަހަރާއި 47 އަހަރާ ދޭތެރޭގެ އުމުރެއް ކަމަށެވެ.
އެހެންނަމަވެސް ރައީސް މައުމޫނުގެ ވެރިކަމަށް ފަހު ސިއްހީ ދުޅަހެޔޮކަން އިތުރުވެ، ރައްޔިތުންނަށް ތަފާތު ވެކްސިންތައް ދެވި ދިވެހި ރައްޔިތުންގެ އުމުރު 55 އަހަރުން 60 އަހަރަށް އަދި 60 އަހަރުން 90 އަހަރަށް އިތުރުވެފައިވާ ކަމަށް ޝުޖާއު ވިދާޅުވި އެވެ.
Advertisement
ދިވެހިރާއްޖޭގެ އާބާދީ އިތުރުނުވެ އޮތީ ހިފެހެއްޓިފައި ކަމަށާއި ޒުވާން އާބާދީއެއް މި ގައުމަށް ބޭނުންވާ ކަމަށް ޝުޖާއު ވިދާޅުވި އެވެ. މީގެ އިތުރުން ޒުވާން އާބާދީއެއް ގެނެވޭނީ ސަރުކާރުގެ ސިޔާސަތުތައް ކޮންގޮތަކަށް ބައްޓަންކޮށްގެންތޯ ބެލުމަކީ މުހިއްމު ކަމެއްކަމުގައި ދެކިވަޑައިގަންނަވާ ކަމަށް ޝުޖާއު ވިދާޅުވި އެވެ.
މީގެ އިތުރުން، ދިވެހިންނަށް ވުރެ ބޮޑަށް ބިދޭސީންނަށް ވަޒީފާ ދިނުމަށް ނިމިދިޔަ އެމްޑީޕީ ސަރުކާރުން އިސްކަން ދިންކަން ފާހަގަކުރައްވައި ޝުޖާއު ވަނީ އެމްޑީޕީގެ ސިޔާސަތުތަކަށް ފާޑުވިދާޅުވެފަ އެވެ.
"އެގޮތުން ސިޔާސަތު ކަނޑައަޅުއްވާފައި އެބަހުރި އިނގޭތޯ ބޭރުގެ ގައުމުތަކުން ވަކި ކޯޓާ، ވަކި އިންސައްތައެއް. ބައެއް ގައުމުތަކުން އެއްލައްކަ ބިދޭސީންނަށް ދިވެހިރާއްޖޭގައި މަސައްކަތް ކުރެވޭނޭ އަނެއްބައި ގައުމުތަކުން ދެލައްކަ ބިދޭސީންނަށް ދިވެހި ރާއްޖޭގައި މަސައްކަތް ކުރެވޭނޭ،" މެމްބަރު ޝުޖާއު ވިދާޅުވި އެވެ.
ދިވެހި އާބާދީ ހިފެހެއްޓިފައި އޮތް އޮތުމާ އެކުއެކީގައި ދިވެހި ދައުލަތަށް ހިދުމަތް ކުރައްވާފައި ތިއްބަވާ 65 އަހަރުވެފައި ތިއްބެވި އަދި އިތުރަށް ދައުލަތަށް ހިދުމަތް ކުރައްވަން ބޭނުންފުޅުވާ ބޭފުޅުންނަށް ފަހި މާހައުލެއް އޮންނަން ޖެހޭނެ ކަމަށް ރައީސް ޑރ. މުއިއްޒު ގަބޫލުފުޅުކުރައްވާ ކަމަށް ޝުޖާއު ވިދާޅުވި އެވެ.
