ސަރުކާރުގެ އައިނު ފިހާރަ ހިންގުމަށް އަހަރަކު ހަރަދުވާނެ ކަމަށް ލަފާ ކުރެވެނީ ތިން މިލިއަން ރުފިޔާ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވެއްޖެ އެވެ.

މިނިސްޓަރު ވިދާޅުވި ގޮތުގައި އެ ފިހާރަ ހަދަން ހަރަދުވީ 2.6 މިލިޔަން ރުފިޔާ އެވެ. އެއީ ފިހާރަ ހެދުމަށާއި އެތަނަށް ބޭނުންވާ އިންސްޓްރޫމެންޓް ގަތުމަށް ކުރި ހަރަދު ހިމަނައިގެންނެވެ.

ރިކަރެންޓް ހަަރަދުގެ ގޮތުގައި އަހަރަކަށް ހޭދަވާނެ ކަމަށް ލަފާކުރެވެނީ 3،456،212.67.ރ ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ އެމްޑީޕީ މެންބަރު މުހައްމަދު އިބްރާހީމް (ކުޑޫ) ކުރެއްވި ސުވާލަކަށް ލިޔުމުން ދެއްވި ޖަވާބުގައި މިިނިސްޓަރު ވިދާޅުވި އެވެ.

އައިނު ފިހާރަ ހިންގަން ހަރަދުކުރަނީ ކިހާވަރެއްތޯ ކުރި ސުވާލުގެ އިތުރުން، އެ ފިހާރަ ހަދަން ނިންމި ސަބަބާ ބެހޭ ގޮތުން ވެސް މެންބަރު ސުވާލުކުރެއްވި އެވެ.

އެ ސުވާލަށް ޖަވާބު ދެއްވަމުން، ހެލްތު މިނިސްޓަރު ވިދާޅުވީ އައިނު ހެއްދުމުގެ މަސައްކަތް ސަރުކާރުން ފަށަން ނިންމީ އެ ހިދުމަތްދޭ އަމިއްލަ ތަންތަނުން ނަގާ އަގު ބޮޑުވެ، ރައްޔިތުންނަށް އެކަން ބުރައަކަށް ވުމުން ކަމަށެވެ.

"އާސަންދައިން ކަވަރުކުރަމުން ދަނީ، ނަމްބަރު އައިނުއަޅާ ފަރާތްތަކަށް ކޮންމެ ދެ އަހަރަކުން އެއް ފަހަރު އެއްހާސް ރުފިޔާކަމުން ގިނަ ރައްޔިތުންނަށް ޖެހެނީ އަމިއްލަ ޖީބުން އިތުރު އެތައް ހާސް ރުފިޔާއެއް ހަރަދުކުރަން،" މިނިސްޓަރު ވިދާޅުވެފައިވެ އެވެ.

އައިނު ހެދުމުގެ ހިދުމަތް ސަރުކާރުން ފެށި އިރު ރައީސް ޑރ.މުހައްމަދު މުއިއްޒު ވިދާޅުވެފައި ވަނީ އޭގެ "އެޑްވާންޓޭޖު" ނުވަތަ ނާޖާއިޒު ފައިދާ ނެގުމުގެ ފުރުސަތު އެ މަނިކުފާނު ނުދެއްވާނެ ކަމަށެވެ.