އިސްރާއީލުން މި މަހުގެ 2 ވަނަ ދުވަހު ޖަލަށްލި ގްލޯބަލް ޞުމޫދު ފްލޮޓިއްލާގެ އިޓަލީގެ އެކްޓިވިސްޓެއް ކަމަށްވާ ޓޮމާސޯ (ޓޮމީ) އަށް މާތްރަސްކަލާނގެ ހިދާޔަތް ދައްކަވައިފިއެވެ.
ގައިގައި ޓެޓޫ ޖަހައިގެން އުޅޭ އިސްލާމް ދީނާއި ދުރު އިޓަލީގެ ކްރިސްޓިއަން އެކްޓިވިސްޓް ޓޮމީ، ފްލޮޓިއްލާގެ އުޅަނދުތައް ހައިޖެކްކުރިއިރު އެ މީހުންނާއި އެކު އިސްރާއީލުގެ ޖަލުގައި ހޭދަކުރީ މުސްލިމުން ތިބި ގޮޅިއެއްގައެވެ. އެ ގޮޅީގައި ތުރުކީވިލާތުގެ ނޫސްވެރިޔާ ބެކިރް ދެވެލި ވެސް ހުއްޓެވެ. ގޮޅިތެރޭގައި އެކަކު ތެދުވެ ފަތިސްނަމާދަށް ބަންގި ގޮވިއެވެ. އެއާއި އެކު ޓޮމީ ފިޔަވައި އެ ގޮޅީގައި ތިބި އެންމެން ކޮޅަށް ތެދުވެ ނަމާދުކުރަން ފެށިއެވެ. ޓޮމީ ހުރީ ޖަލު ގޮޅީގެ ދޮރުވާނަކަށެވެ. އެއީ ޔަހޫދީ ސިފައިން އައިސް ނަމާދަށް ތިބި އެކްޓިވިސްޓުންނަށް އަނިޔާ ކޮށްފާނެތީއެވެ.
ކޮންމެޔަކަސް އިޓަލީ ސަރުކާރާއި ތުރްކިޔޭގެ ސަރުކާރުގެ އިތުރުން ބައިނަލްއަޤްވާމީ ޕްރެޝަރާއި ހެދި ޓޮމީ ހުރި ގޮޅިގައި ތިބި ހުރިހާ އެންމެން ގޮޅިން ނެރެ ޑީޕޯޓްވާން އެދޭ ނަމަ ސޮއި ކުރަން ބުނުމާއި އެކު އެ އެންމެން ސޮއިކުރީ ތުރްކިޔޭ ސަރުކާރުން ހަމަޖައްސާފައި އޮތް ޗާޓަރު ފުލައިޓެއްގައި އިސްތަންބޫލަށް ދިޔުމަށެވެ.
ޓޮމީ އިސްލާމް ދީން ޤަބޫލުކުރުމަށްފަހު ތުރުކީވިލާތުގެ ވައިގެބަނދަރުގައި
މާތްރަސްކަލާނގެ އިރާދަފުޅުން ޓޮމީ އަށް އަރަން ޖެހުނީ ތުރްކިޔޭގެ ނޫސްވެރިޔާ އާއި އެއް ވެހިކަލަކަށެވެ. އޭނާއަށް އިސްލާމް ދީނަށް ވަނުމަށް ދަޢުވަތު ދިނީ ތުރްކިޔޭގެ ނޫސްވެރިޔާއެވެ. ކޮންމެޔަކަސް އެ ވެހިކަލްގެ ތެރޭގައި ދަތުރުކުރަމުން ދަނިކޮށް ޓޮމީ “އަޝްހަދު އައްލާ އިލާހަ އިއްލަﷲ” އޭ ބުނެ އިސްލާމްވިއެވެ! އެއާއި އެކު ވެހިކަލްގައި ތިބި މީހުން އުފަލުން ޓޮމީގެ ގައިގައި ބައްދަން ފެށިއެވެ. އެ މަންޒަރު ޒައެނިސްޓް ސިފައިންނަށް ފެނި އަދި އޭނާ އިސްލާމްވިކަން އެނގިގެން ވެހިކަލުން އޭނާ ބޭލުމަށްފަހު ދަމާކޫއްތާފައި އަނެއްކާ އަނބުރާ ގޮޅިއަށްލީ ކަމަށް ތުރްކިޔޭގެ ދީނީ ޕްރޮގްރާމްތައް ވެސް ހުށަހަޅައިދޭ ނޫސްވެރިޔާ ކިޔައިދިނެވެ.
"އެންމެން އޭނާއަށް މަރްޙަބާ ކިޔުމުން އިސްރާއީލުގެ ފުލުހުން އޭނާ ދަމާފައި ގޮޅިއަކަށް ގެންދިޔައީ،" ތުރްކިޔޭގެ ނޫސްވެރިޔާ ކިޔައިދިނެވެ.
ނަމަވެސް ﷲގެ އިރާދަފުޅުން އަނެއްކާވެސް ޓޮމީ ދޫކޮށްލިއެވެ. އަދި ތުރްކިޔޭގެ ރައީސް ރެޖެޕް ޠޮއްޔިބް އެރްދޮޣާންގެ ސަރުކާރުން ފޮނުވި ޓާކިޝް އެއާލައިންސްގެ ފްލައިޓެއްގައި 137 ފަސިންޖަރުންނާއެކު ޓޮމީ ދިޔައީ އިސްތަންބޫލަށެވެ.
އިސްތަންބޫލް އެއާޕޯޓުން ޓޮމީ އަށް މަރްޙަބާ ކިޔުމަށް ރައީސް އެރްދޮޣާންގެ ދަރިކަނބަލުން ވެސް ވަޑައިގަތެވެ.
