ރާއްޖޭގެ ތިމާވެށި ހިމާޔަތްކުރުމުގެ ކަންކަން މެނޭޖުކޮށް ބެލެހެއްޓުމަށް އަަލަށް އުފެއްދި އެންވަޔަރަމެންޓް ރެގިއުލޭޓަރީ އޮތޯރިޓީ (އީއާރްއޭ)ގެ ވެބްސައިޓު ލޯންޗުކޮށްފި އެވެ.
ރާއްޖޭގެ ތިމާވެށި ހިމާޔަތްކުރުމުގެ ޒިންމާތައް މީގެ ކުރިން އުފުލަމުން އައީ އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ) އިންނެވެ. ނަމަވެސް އީޕީއޭގެ ހިންގުން ހަރުދަނާ ކުރުމުގެ ގޮތުން އެ ތަނުގެ ނަން "އެންވަޔަރަމެންޓަލް ރެގިއުލޭޓަރީ އޮތޯރިޓީ" އަށް ބަދަލުކުރީ ނިމިިދިޔަ އޮގަސްޓު މަހު އެވެ.
އީއާރްއޭގެ ރަސްމީ ވެބަސައިޓު ލޯންޗުކުރިކަން ހާމަކުރަމުން އެ އޮތޯރިޓީން އެކްސްގައި ހިއްސާކުރި ޕޯސްޓެއްގައި ބުނީ އާ ވެބްސައިޓް ނެރެފައިވާ ނަމަވެސް ވެބްސައިޓް އަދިވެސް އަންނަނީ ތަރައްގީކުރަމުން ކަމަށެވެ. އަދި އީއާރުއޭގެ މަސައްކަތާ ގުޅޭ ހުރިހާ އީއައިއޭ ރިޕޯޓްތަކާއި އެ އޮތޯރިޓީއާ ގުޅުންހުރި އެހެނިހެން މުހިންމު ލިޔެކިޔުންތަކާއި މައުލޫމާތު، އެ ވެބްސައިޓް މެދުވެރިކޮށް ލިބެން ހުންނާނެ ކަމަށް ބުންޏެވެ.
އީއާރްއޭ އިން އިތުރަށް ބުނީ އާ ވެބްސައިޓު ލޯންޗުކުރީ އާންމުންނަށް އެ އޮތޯރިޓީގެ ހިދުމަތްތައް ފަސޭހަކަމާއެކު ލިބޭނެ ގޮތް ހެދުމަށާއި "ޓްރާސްޕެރެންސީ" އިތުރު ކުރުމަށް އަޅާ ފިޔަވަޅެއް ގޮތުގައި ކަމަށާއި އެ އޮތޯރިޓީގެ އެހީތެރިކަން ބޭނުންވާނަމަ، އަދި އެއްވެސް ރިޕޯޓެއް ނުވަތަ ގުޅުންހުރި ފައިލެއް ގެއްލިފައިވާނަމަ، އީއާރްއޭގެ އީމެއިލް ([email protected]) މެދުވެރިކޮށް އެ އޮތޯރިޓީއަށް އެކަން އެންގުމަށް ވަނީ ބުނެފަ އެވެ.
ކުރިން ހިންގަމުން އައި އީޕީއޭ ހިންގަމުން އައީ ރައީސް އައްޔަން ކުރައްވާފައިވާ ހާއްސަ ގަވަނިން ބޯޑެއްގެ ލަފާގެ ދަށުންނެވެ. ނަމަވެސް އީއާރުއޭ ހިންގާނީ ހިންގާނީ ސީދާ އެންވަޔަރަމަންޓް މިނިސްޓްރީގެ ދަށުންނެވެ.
