ޑިއުޓީގައި ހުރި ފުލުހެއްގެ އަތުން ގަދަކަމުން ޝީލްޑްތައް އަތުލައި، ހަމަނުޖެހުން ހިންގުމަކީ ސުލްހަވެރި ސިޔާސީ ހަރަކާތެއްގެ ގޮތުގައި ނުބެލެވޭނެ ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ.

މިނިސްޓަރު އިހުސާސް މި މޭރުމުން ވިދާޅުވީ، މިރޭ އެމްޑީޕީން އިހުތިޖާޖު ކުރުމުގެ ނަމުގައި ފުލުހުންނާ ކުރިމަތިލައި، ހަމަނުޖެހުން ހިންގުމަށް މަސައްކަތް ކުރުމާ ގުޅިގެންނެވެ. މިނިސްޓަރު އިހުސާސް ވިދާޅުވި ގޮތުގައި، ފުލުހުންނާ ކުރިމަތިލައި މުޒާހަރާގެ ބައިވެރިން ހިންގި މި އަމަލަކީ ގާނޫނު ތަންފީޒުކުރުމުގެ ވާޖިބުތަކަށް ބުރޫއަރާ އަދި އަނިޔާވެރި އަމަލުތަކެކެވެ.

މުޒާހަރާގެ ބައިވެރިން ވަނީ ފުލުހުންގެ އަތުން އެ މީހުންގެ ޝީލްޑްތައް އަތުލައި އެ ތަކެތި އުކާލައިފަ އެވެ. މީގެ އިތުރުން ފުލުހުންން ދިމާލަށް ގަލާއި ފެންފުޅި ފަދަ ތަކެތި މުޒާހަރާގެ ބައިވެރިން ވަނީ އުކައިފަ އެވެ. މުޒާހަރާގެ ބައިވެރިން ފުލުހުންނަށް ހަމަލާ ދޭ މަންޒަރު ފެންނަ ވީޑިއޯތަކެއް ވެސް ސޯޝަލް މީޑިއާގައި މިހާރު ދަނީ ދައުރުވަމުންނެވެ.

މިކަމާ ގުޅިގެން ފުލުހުން ބުނީ، ފުލުހުންގެ އަމުރަށް އިޖާބަ ނުދޭ ފަރާތްތަކާމެދު ހަރުކަށި ފިޔަވަޅު އަޅާނެ ކަމަށެވެ.

ފުލުހުން ވަނީ ގާނޫނާ ހިލާފުވުމުން އެމްޑީޕީގެ މުޒާހަރާ ރޫޅާލުމުގެ މަސައްކަތް ފަށައިފަ އެވެ.