ޣައްޒާއަށް އިންސާނީ އެހީ ފޯރުކޮށްދިނުމަށް ދަތުރުކުރަމުންދާ ގްލޯބަލް ސުމޫދު ފްލޮޓިއްލާގެ ބޯޓުތައް ބައިނަލްއަގުވާމީ ކަނޑުގެ ސަރަހައްދުން ހިފެހެއްޓުމާ ދެކޮޅަށް މިރޭ އާޓިފިޝަލް ބީޗުގައި އިހުތިޖާޖީ އެއްވުމެއް ބޭއްވުމަށް ހަމަޖެހިއްޖެ އެވެ. މި އެއްވުން އިންތިޒާމުކޮށްފައިވަނީ އިންޓަނޭޝަނަލް މުސްލިމާ އެއިޑް އެންޑް އެޑިއުކޭޝަން (އައިއެމްއޭއީ) އިންނެވެ.
އެމެޖެންސީ ޕްރޮޓެސްޓްގެ ގޮތުގައި މިރޭ 8:00 ގައި ފެށުމަށް ހަމަޖެހިފައިވާ މި ހަރަކާތް އިންތިޒާމްކުރުމުގައި އިސްކޮށް މަސައްކަތްކުރައްވާ ޑރ. ޝަޒްރާ އިބްރާހީމް ވަނީ، ޣައްޒާގެ މުސްލިމު އަހުންނާއި އުހުތުންނަށް އެހީތެރިކަން ފޯރުކޮށްދިނުމަށް ކުރެވޭ މި މަސައްކަތަށް އެއްބާރުލުން ދިނުމުގެ ގޮތުން ވީހާވެސް ގިނަ ބަޔަކު މި ހަރަކާތުގައި ބައިވެރިވުމަށް އެދިވަޑައިގެންފަ އެވެ.
ގްލޯބަލް ސުމޫދު ފްލޮޓިއްލާއަކީ ދިވެހިރާއްޖެ ހިމެނޭގޮތަށް 44 ޤައުމެއްގެ ރައްޔިތުން އިސްނަގައިގެން، ޣައްޒާގެ ހިސާރު ނިމުމަކަށް ގެނެސް، އެ ސަރަހައްދުގެ ހާލުގައި ޖެހިފައިވާ ރައްޔިތުންނަށް އިންސާނީ އެހީތެރިކަން ފޯރުކޮށްދިނުމަށް ކަނޑުމަގުން ދަތުރުކުރަމުންދާ ބޮޑު ގާފިލާއެކެވެ. މި ގާފިލާގައި 500 އަށްވުރެ ގިނަ މީހުން ބައިވެރިވެފައިވާއިރު، އޭގެ ތެރޭގައި ބައެއް ޤައުމުތަކުގެ ޤާނޫނު ހަދާ މަޖިލީހުގެ މެންބަރުންނާއި ޤާނޫނީ ވަކީލުން ހިމެނެ އެވެ.
ފްލޮޓިއްލާގެ ދަތުރު އިންތިޒާމުކުރާ ފަރާތުން މަޢުލޫމާތު ދީން ގޮތުގައި، މިހާތަނަށް 13 އުޅަނދަކަށް ޔަހޫދީ ސިފައިން އަރައިގަނެ ހުއްޓުވާފައިވެ އެވެ. އަދި މިވަގުތު އިތުރު 30 އުޅަނދު ޣައްޒާއަށް ދަތުރު ކުރަމުންދާ ކަމަށް އެ ފަރާތުން ބުންޏެވެ.
ދިވެހިރާއްޖެއިން މި ދަތުރުގައި އިންޓަނޭޝަނަލް އެއިޑް ކެމްޕެއިންގެ ސެކްރެޓަރީ ޖެނެރަލް އިބްރާހީމް ޝާޒް ބައިވެރިވަމުން ދާއިރު، ޔަހޫދީ ސިފައިން ހަތިޔާރާއެކު އުޅަނދުތަކަށް އަރައިގަންނަ މަންޒަރުތައް ދައްކުވައިދޭ ވީޑިއޯތަކެއް ފްލޮޓިއްލާގެ އެކްޓިވިސްޓުން ވަނީ އާންމުކޮށްފަ އެވެ. އަދި ޔަހޫދީ ސިފައިންގެ ބެލުމުގެ ދަށަށް އެކްޓިވިސްޓުން ގެންދިއުމަކީ އައިރު ޤާނޫނީ ކުށެއްގެ ގޮތުގައި އެ ފަރާތްތަކުން ވަނީ ސިފަކޮށްފަ އެވެ.
މި އިހުތިޖާޖީ އެއްވުމުގެ ބޭނުމަކީ، ޣައްޒާގެ ރައްޔިތުންނަށް އިންސާނީ އެހީ ފޯރުކޮށްދިނުމަށް ކުރެވޭ ހަރަކާތްތަކަށް ހުރަސްއަޅާ ޔަހޫދީ ސިފައިންގެ އައިރު ޤާނޫނީ އަމަލުތައް ކުށްވެރިކޮށް، ބައިނަލްއަގުވާމީ މުޖުތަމަޢުގެ ސަމާލުކަން ހޯދުމާއި، ޣައްޒާއަށް މިނިވަންކަން ދިނުމަށް ގޮވާލުމެވެ.
