ހައްދުފަހަނައެޅި ސަޙްޔޫނީންގެ ބެލުމުގެދަށުގައި ތިބި ފްލޮޓިއްލާގެ އެކްޓިވިސްޓުން ބަނޑުހައިހޫނުކަމުގެ ހަޅުތާލެއް ފަށައިފިއެވެ.

ރިޕޯޓުތައް ބުނާ ގޮތުގައި ސަޙްޔޫނީން ވަނީ ޣައްޒާއަށް އެހީ ހިފައިގެން ދަތުރުކުރި ގްލޯބަލް ޞުމޫދު ފްލޮޓިއްލާ (ޖީއެސްއެފް)އިން މިހާތަނަށް 223 ބައިނަލްއަޤަވާމީ އެކްޓިވިސްޓުން ހައްޔަރުކޮށްފައެވެ. އޭގެތެރޭގައި ދުނިޔޭގެ ޞުލްޙައިގެ އިނާމު ހޯދާފައިވާ ނެލްސަން މަންޑޭލާގެ ކާފަދަރިކަލުން ވެސް ހިމެނެއެވެ.

ރޭ ދަންވަރުން ފެށިގެން އިސްރާއީލުގެ ސިފައިން ޖީއެސްއެފްގެ 15 އުޅަނދަކަށް ޙަމަލާދިންކަން ކަށަވަރުވެފައިވާއިރު އިތުރު އަށް އުޅަނދަކަށް މިހާރު ޙަމަލާ ދިނުން އެކަށީގެންވާ ކަމަށް ރިޕޯޓުތައް ބުނެއެވެ..

ފްލޮޓިއްލާއިން ހައްޔަރުކުރި 223 އެކްޓިވިސްޓުންގެ ނަމާއި ޤައުމު މިހާރު ވަނީ ހިއްސާކޮށްފައެވެ.

ފްލޮޓިއްލާ ޓްރެކަރ އިން މިހާރު ދައްކާ ގޮތުގައި އިސްރާއީލުގެ ސިފައިން 20 އުޅަނދަކަށް ހަމަލާދީފައިވާއިރު، ޣައްޒާ އަށް ދަތުރުކުރަމުންދާކަމަށް ފެންނަނީ 24 އުޅަނދެވެ.

ގްލޯބަލް މިޝަންގެ ތުރުކީވިލާތުގެ އެކްޓިވިސްޓެއް ކަމަށްވާ އެރްޑެމް އޮޒްވެރެން ބުނި ގޮތުގައި އެމީހުންގެ އުޅަނދު އޮތީ ޣައްޒާ އާއި ގާތްގަނޑަކަށް 29 ނޯޓިކަލް މޭލުގައެވެ. ތުރުކީގެ މީޑިއާއިން ބުނާ ގޮތުގައި އެ ޤައުމުގެ 30 މީހުން އިސްރާއީލު ސިފައިން ވަނީ ހައްޔަރުކޮށްފައެވެ. އެއާއި ޚިލާފަށް އަލްޖަޒީރާއިން ބުނަނީ ތުރުކީގެ 21 މީހުން ހައްޔަރުކޮށްފައިވާ ކަމަށެވެ. ނަމަވެސް ސްޕޭނުގެ 30 މީހުންނާއި އިޓަލީގެ 22 އަދި މެލޭޝިއާގެ 12 މީހުން ހައްޔަރުކޮށްފައިވާކަން ވަނީ ކަށަވަރުކުރެވިފައެވެ.

އިންސާނީ އެހީތަކާއި ސިއްހީ ސާމާނާއި އެކު މި ފްލޮޓިއްލާ ދަތުރު ފެށީ އޮގަސްޓް މަހުގެ ފަހުކޮޅުގައެވެ.

ގާތްގަނޑަކަށް 2.4 މިލިއަން މީހުންގެ އާބާދީއެއް އޮންނަ ޣައްޒާގައި އިސްރާއީލުން ވަނީ ގާތްގަނޑަކަށް 18 އަހަރު ވަންދެން ފުރަބަންސު ކޮށްލާފައެވެ. މި އަހަރުގެ މާޗް މަހުން ފެށިގެން ޒައެނިސްޓުން ވަނީ ބޯޑަރު ހުރަސްކޮށް ކާބޯތަކެއްޗާއި ބޭސް ޑެލިވަރީ ކުރުންވެސް ހުއްޓުވާލާފައެވެ.

ޣައްޒާ ހަނގުރާމަ އަކީ 2023 ގައި ފެށި ހަނގުރާމައެއް ނޫނެވެ. 2023 ގައި ޙަމާސް އިން އިސްރާއީލަށް ޙަމަލާ ދިނީ އެތައް އަހަރެއްގެ ޙަމަލާތަކަށް ކެތް ނުކުރެވިގެން ކަމަށް ރިޕޯޓުތަކުގައި ވެއެވެ.

ޒައެނިސްޓުންގެ ޙަމަލާތަކުގައި ޣައްޒާއިން އެކަނި އެއްލައްކަ އަށްވުރެ ގިނަ މީހުން ޝަހީދުވެފައިވާ ކަމަށް ޙަމާސް އިން ބުނެއެވެ.