ޕީޕަލްސް ނޭޝަނަލް ކޮންގްރެސް (ޕީއެންސީ)އިން މިރޭ އެ ޕާޓީގެ ހަރުގޭގައި ބާއްވާ ޖަލްސާ، ގިނަ އަދަދެއްގެ ބަޔަކާއެކު ފޯރިއާއި ވަރުގަދަ ތާއީދާއެކު ފަށައިފި އެވެ. މި ޖަލްސާ އިއުލާނުކުރީ ހޯމަދުވަހު ކުއްލި ގޮތަކަށެވެ.

ޖަލްސާއަށް ހާޒިރުވި މީހުންގެ އަދަދު ގުނާލެވޭ ވަރަށް ވުރެ މާ ގިނަ އެވެ. ޕާޓީގެ ހަރުގެއާއި، ހަރުގެ ކުރިމަތިން ބޮޑުތަކުރުފާނު މަގު އަދި އާޓިފިޝަލް ބީޗުގެ ބޮޑު ސަރަހައްދެއް ވަނީ މީހުންނާއެކު ފުރި ބާރުވެފަ އެވެ. މިއީ މިފަހުގެ ތާރީހެއްގައި މިހާ ކުރު މުއްދަތެއްގެ ތެރޭގައި ސިޔާސީ ޕާޓީއެއްގެ ހަރުގެ ޕާޓީ އެއްވުމަކަށް މިހައި ގިނަ މީހުން ޖަމާވި ފުރަތަމަ ފަހަރޭ ބުންޏަކަސް ދޮގަކަށް ނުވާނެ އެވެ.

މިރޭގެ ޖަލްސާ ފެށިގެން ކުރިއަށްދާއިރު، ރާއްޖޭގެ މަޝްހޫރު ފިލްމީ ތަރި ޔޫސުފް ޝަފީއު (ޔޫއްޕެ)އާއި އެހެނިހެން ގިނަ އާއްމުން ވަނީ ޕީއެންސީއާ ގުޅި، ޕާޓީގެ މެންބަރޝިޕް ފޯމުތަކުގައި ސޮއިކޮށްފަ އެވެ.

އެގޮތުން، މި ޖަލްސާގައި ޕީއެންސީގެ އިސް ބޭފުޅުންގެ ތެރެއިން ޕާޓީގެ ޗެއާޕާސަން އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲއާއި، އެ ޕާޓީގެ ޕާލިމަންޓްރީ ގުރޫޕުގެ ލީޑަރު އިބްރާހީމް ފަލާހާއި، މަޖިލީހުގެ ގިނަ އަދަދެއްގެ މެންބަރުންނާއި، ސަރުކާރުގެ ވަޒީރުން ބައިވެރިވެވަޑައިގަންނަވަ އެވެ.

ޖަލްސާގައި ފުރަތަމަ ވާހަކަފުޅު ދެއްކެވި މަނަދޫ ދާއިރާގެ މެންބަރު ހުސްނީ މުބާރަކު ވިދާޅުވީ، އެހައި ކުޑަ ވަގުތުކޮޅެއްގެ ތެރޭގައި ޕާޓީގެ މިފަދަ ހަރަކާތަކަށް އެހައި ގިނަ ބޭފުޅުން ވަޑައިގަތުމަކީ، އެ ޕާޓީގެ މެންބަރުން އިތުރުވީ ސައްހަ ފޯމުތައް ފުރައިގެންކަން ސާބިތުވާ ކަމަމަށެވެ.

މިރޭ ބާއްވާ ޖަލްސާގައި، ސަރުކާރަށް އިދިކޮޅު ފަރާތްތަކުން ކުރާ ތުހުމަތުތަކަށް ވަރުގަދަ ރައްދުތަކެއް ދިނުމަށް ތައްޔާރުވެފައިވެއެވެ. ހާއްސަކޮށް، "ލޫޓުވާލައިފި" ނަމުގައި އެމްޑީޕީން ބާއްވާ އެއްވުމާ ގުޅޭގޮތުން ކޮންގުރެސްގެ އިސް ބޭފުޅުން ތޫނު ރައްދުތައް ދެއްވާނެ އެވެ.