^{ފުރަބަންދު ފޫއަޅުވާލައި ޣައްޒާއަށް ވަނުމަށް މަސައްކަތްކުރާ އުޅަނދުތައް ދަތުރުކުރަމުންދާ މަގު.}

ޣައްޒާ ފުރަބަންދު ނައްތައިލުމަށް ބައިނަލްއަޤްވާމީ އެތައް ސަތޭކަ އެކްޓިވިސްޓުންނެއް ދަތުރު ކުރަމުންދާ ގްލޯބަލް ޞުމޫދު ފްލޮޓިއްލާ އަށް އިސްރާއީލުގެ ކަނޑުގެ ސިފައިން ޙަމަލާ ދީފި ކަމަށް ޕްރޮގްރެސިވް އިންޓަނޭޝަނަލްގެ ކޯ ޖެނެރަލް ކޯޑިނޭޓަރު ޑޭވިޑް އެޑްލަރ ބުނެފިއެވެ.

ފްލޮޓިއްލާގެ އުޅަނދެއްގައި ޣައްޒާ އަށް ވަނުމަށް ދަތުރުކުރަމުންދާ ފްލޮޓިއްލާގެ އުޅަނދެއްގައި ހުރި އެމެރިކާގެ އިކޮނޮމިސްޓް އަދި އެކްޓިވިސްޓް އެޑްލަރ ބުނީ ޔަހޫދީ ކަނޑުގެ މަނަވަރުތަކުން ވަނީ އެމީހުންނަށް ހުރަސް އެޅުމަށް ކެމިކަލް ސްޕްރޭކޮށް، މުވާޞަލާތީ ސިގްނަލްތައް ވެސް ކަނޑާލާފައެވެ. އެހެންނަމަވެސް މަސައްކަތް މި ކުރަނީ ހިއްވަރާއި އެކު މިޝަން ކާމިޔާބު ކުރުމަށް ކަމަށާއި، ޣައްޒާ އަށް ނުވަދެވުނަސް މި ދަތުރުން ވަރަށް ގިނަ ކާމިޔާބީތައް ޙާޞިލް ކުރެވިއްޖެ ކަމަށް ކޯޑިނޭޓަރު ބުނެފައިވެއެވެ.

ފާހަގަކޮށްލަން ޖެހޭ ކަމަކީ ގްރީސްގެ ކަނޑުގެ ސަރަހައްދުން ވެސް ފްލޮޓިއްލާ ދަތުރުކުރިއިރު އިސްރާއީލުގެ ޑްރޯންތަކުން ވަނީ ހުރަސް އެޅުމަށް މަސައްކަތް ކޮށްފައެވެ. އެގޮތުން އެތައް އުޅަނދެއްގެ ކައިރިޔަށް ޙަމަލާތައް އަމާޒުކޮށް ބިރު ދެއްކިއެވެ. ނަމަވެސް އެއްވެސް މީހަކަށް ގެއްލުމެއް ލިބިފައި ނުވެއެވެ.

44 ގައުމަކުން ފަންސާހަކަށް ވުރެ ގިނަ އުޅަނދު ބައިވެރިވި މި މިޝަންގައި ޑޮކްޓަރުންނާއި ދީނީ އިލްމުވެރިންނާއި އިންސާނީ އެހީ ފޯރުކޮށްދޭ ފަރާތްތަކުގެ އިތުރުން ނޫސްވެރިންވެސް އެބަތިއްބެވެ.

ފަލަސްޠީނަށް ކަނޑައަޅާފައިވާ އދ.ނގެ ޚާއްޞަ މަންދޫބު ފްރާންސެސްކާ އަލްބަނީޒާއި ކޮލަމްބިއާގެ ރައީސް ގުސްޓާވޯ ޕެޓްރޯ ވަނީ ގްލޕބަލް ޞުމޫދު ފްލޮޓިއްލާ އަށް ރައްކާތެރިކަމާއެކު ދަތުރުކުރުމުގެ ހުއްދަ ދިނުމަށް އިސްރާއީލަށް ޑިމާންޑްކޮށްފައެވެ. މީގެ އިތުރުން ސްޕޭނާއި އަޔަލޭންޑާއި، އަދި އިތުރު 14 ގައުމެއްގެ ފޮރިން މިނިސްޓަރުން ވަނީ ފްލޮޓިއްލާ ހުއްޓުވައިފިނަމަ ޑިޕްލޮމެޓިކް ގޮތުން ބޮޑެތި ގެއްލުންތަކެއް ވާނެ ކަމުގެ އިންޒާރުދީ ބާރުގެ ބޭނުން ނުކުރުމަށް އިސްރާއީލަށް އިލްތިމާސްކޮށްފައެވެ.

ފްލޮޓިއްލާ މިހާރު އޮތީ ޣައްޒާ އާއި ގާތްގަނޑަކަށް 120 ނޯޓިކަލްމޭލަށް ވުރެ ވެސް ކައިރީގައި ކަމަށް ޚަބަރުތައް ލިބެއެވެ. އިޓަލީން ވަނީ 150 ނޯޓިކަލް މޭލު ކައިރިޔަށް އާދެވުމުން ފްލޮޓިއްލާގެ ބޯޓުތަކާއި އެކު އެކު ނުދާނެ ކަމަށް ބުނެ ސައިޕްރަސް އަށް އުޅަނދުތައް ވަނުމަށް ލަފާ ދީފައެވެ.