ޗައިނާއަށް ރާއްޖެއިން ދައްކަން ޖެހެ ލޯނުތައް ދެއްކުން ފަސްކުރުމުގެ މަޝްވަރާ ނިމިފައިވާކަމަށް ޗައިނާއިން ރާއްޖެއަށް ކަނޑައަޅާފައިވާ ސަފީރު ކޮންގް ޝިއަންހުއާ ބުނުއްވައިފި އެވެ.

ސަފީރު ވިދާޅުވީ ދެމެހެއްޓެނިވި ގޮތެއްގައި އިގްތިސާދީ ކުރިއެރުން ހޯއްދަވައިދެއްވުމަށާއި، ރައްޔިތުންގެ ލާބައާއި މަންފާ އިތުރުކުރުމަށާއި، މޫސުމަށް އަންނަ ބަދަލުތަކުގެ ސަބަބުން ކުދި ޖަޒީރާ ގައުމުތަކަށް ކުރިމަތިވާ މައްސަލަތައް ހައްލުކުރުމުގައި ބައިނަލްއަގްވާމީ މައިދާނުގައި އިސް ދައުރެއް އަދާކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަދާ ކުރައްވާ ކަމަށެވެ. އަދި ޗައިނާ އިން އެ މަސައްކަތުގެ އަގު ވަޒަން ކުރައްވާ ކަމަށް ވެސް ވިދާޅުވި އެވެ.

ޗައިނާ ސަފީރުގެ މެސެޖުގައި، ރާއްޖޭގެ މިނިވަންކަމާއި ސިޔާދަތު ދެމެހެއްޓުމަށް އެއްބާރުލުން ދެއްވާނެ ކަމަށާއި، ގައުމީ ތަރައްގީގެ މަގަށް ވާސިލުވުމަށާއި، ބައިނަލްއަގްވާމީ މުޖްތަމައުގައި ހަރަކާތްތެރިކަމާއެކު މަސައްކަތްކުރުމަށް އެހީތެރިވެދޭނެ ކަމުގައި ވިދާޅުވި އެވެ.

އެ ލޯނުތައް ފަސް އަހަރަށް ފަސްކޮށްދޭން ނިންމައިދޭނެ ކަމަށް ރައީސް ޑރ. މުހައްމަދު މުއިއްޒު ވަނީ މިދިޔަ އަހަރު ހާމަކޮށްފަ އެވެ.

ރާއްޖޭގެ 59 ވަނަ މިނިވަން ދުވަހުގެ ރަސްމީ ޖަލްސާގައި ރައީސް ވިދާޅުވީ، ބޭރުގެ ދަރަނި ދެއްކުމަށްޓަކައި އެންމެ ބޮޑު އެއްޗެއް އެހީގެ ގޮތުގައި އަބަދުވެސް ދެއްވާ ދެ ގައުމަކީ ޗައިނާ އިންޑިއާ ކަމަށާއި، އެ ދެ ގައުމުގެ ސަރުކާރުން މި ގައުމުގެ ދަރަނި ދެއްކުމުގައި ލުއި ގޮތްތަކެއް ހޯދާ ދިނުމަށް އެހީތެރިކަން ދެއްވަވާ ކަމަށެވެ.

"ޗައިނާ ސަރުކާރުން ވަނީ އަޅުގަނޑުމެންގެ ކުރިއަށް އޮތް ފަސް އަހަރު ދުވަހަށް، އޭގެ ކުރިން ތަރައްގީގެ އެކި މަޝްރޫއުތަކަށް ޗައިނާގެ އެގްޒިމް ބޭންކުން ނަގާފައި ހުރި ލޯނުތައް ނުދައްކާ، ކުރިއަށް އޮތް ފަސް އަހަރު އެ ލޯނުތަކާއި ލޯނުތަކުގެ އިންޓަރެސްޓް ނުދައްކާ ގޮތަށް ނިންމާ ދެއްވާނެ ކަމުގެ ފެހި ސިގްނަލް ދެއްވާފައި،". ރައީސް ވިދާޅުވި އެވެ. ރައީސް ވިދާޅުވީ، އެކަމުގެ ފަންނީ މަސައްކަތް މިހާރު ހިނގަމުންދާ ކަމަށެވެ.