ބައިނަލްއަގުވާމީ މައިދާނުގައި ޤައުމުތަކުގެ މެދުގައި ހަމަހަމަކަން ގާއިމްކުރުމަށް ދިވެހިރާއްޖެއިން ކުރާ މަސައްކަތްތަކަށް ޗައިނާއިން އަބަދުވެސް އެއްބާރުލުންދޭ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިހެން ވިދާޅުވީ ޗައިނާގެ 79ވަނަ އަހަރީ ދުވަހާއި އެ ޤައުމުގެ "މިޑް އޯޓަމް" ފެސްޓިވަލް ފާހަގަކުރުމަށް ރާއްޖޭގައި ހުންނަ ޗައިނާގެ އެމްބަސީން ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ. މި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާގެ ދެކަނބަލުންނާއި ނައިބު ރައީސް އަލްއުސްތާދް ހުސައިން މުހައްމަދު ލަތީފެވެ.
ރައީސް ވިދާޅުވީ ބައިނަލްއަގުވާމީ މައިދާނުގައި ދިވެހިރާއްޖެ ހިމެނޭހެން ކުދި ޤައުމުތަކުން ދެމެހެއްޓެނިވިކަމާއި ވިލުންތެރިކަމާއި ހަމަހަމަކަން ކުރިއެރުވުމަށް ކުރަމުންގެންދާ މަސައްކަތްތަކުގައި ޗައިނާއަކީ އަބަދުވެސް އެއްބާރުލުން ދެއްވާ ޤައުމެއް ކަމަށެވެ. އަދި ޤައުމުތަކާއެކު އޮންނަ ގުޅުން ބަދަހިކޮށް، ތަރައްޤީވަމުން އަންނަ ޤައުމުތަކުގެ ޙައްގުތައް ހިމާޔަތް ކުރުން ޗައިނާއިން ޗެމްޕިއަންކުރަމުންދާ ކަމަށާއި ހަމަހަމަކަން ގާއިމްކުރުމަށް ރާއްޖެއާއެކު ކުރަމުންގެންދާ މަސައްކަތްތަކަކީ ތައުރީފު ހައްގު މަސައްކަތްތަކެއް ކަމަށްވެސް ރައީސް ފާހަގަކުރެއްވި އެވެ.
Advertisement
ރާއްޖެއާއި ޗައިނާގެ ގުޅުމަކީ ހަމައެކަނި 2 ޤައުމުގެ ދެމެދުގައި ވެވޭ އެއްބަސްވުންތަކުގެ މައްޗަށް އޮތް ގުޅުމެއް ނޫންކަން ފާހަގަކުރައްވައި ރައީސް ވިދާޅުވީ ދެ ޤައުމުގެ ގުޅުމަކީ ހިއްސާކުރެވޭ ތަޖުރިބާ އާއި ގާތް އެކުވެރިކަމުގެ ސަބަބުން އުފެދުނު އިތުބާރުގެ މައްޗައް ބިނާވެފައިވާ ގުޅުމެއް ކަމަށެވެ. އަދި މި ގުޅުން ރާއްޖޭގެ އެކި ކަންކޮޅުތަކުން މިއަދު ފެންނަން ހުރިކަމަށްވެސް ރައީސް ވިދާޅުވިއެވެ.
ރައީސް ވިދާޅުވީ ސިޔާސީ ގޮތުންނާއި ވިޔަފާރިއާއި ތަޢުލީމާއި ސަގާފީ ދާއިރާއިން ދެ ޤައުމުގެ ގުޅުން އިތުރަށް ބަދަހިކުރެއްވުމަށް މަސައްކަތް ކުރައްވާނެ ކަމަށެވެ.
ޗައިނާގެ 79ވަނަ އަހަރީ ދުވަހުގެ މުނާސަބަތުގައި ރައީސް ވަނީ އެނީ އެ ޤައުމުގެ ރައީސް ޝީ ޖިންގ ޕިންގއާއި ސަރުކާރަށް އަދި ރައްޔިތުންނަށް މަރުހަބާޔާއި ތަހުނިޔާ ވިދާޅުވެފަ އެވެ.
ޗައިނާގެ ޒަމާންވީ ތާރީހަށް އަލިއަޅުއްވާލައްވައި ރައީސް ވިދާޅުވީ އެއީ ކެތްތެރިކަމާއި ތަޞައްވުރާއި، އިންސާނީ ރޫޙުގެ ޤާބިލު ތާރީޚެއް އޮތް ޤައުމެއް ކަމަށެވެ.
ދެ ޤައުމުގެ ގުޅުމުގެ ހެކިތައް ފާހަގަކުރައްވަމުން ރައީސް ވިދާޅުވީ މުޖުތަމައުތައް ގުޅުވާލަދޭ ބްރިޖާއި އާއިލާތަކަށް ބޯހިޔާވަހިކަން ފޯރުކޮށްދިނުމަށް ގެދޮރުވެރިކަމާއި އަންނަން އޮތް ޖީލުތައް ތަރުބިއްޔަތު ކުރާ ކްލާސްރޫމްތަކަކީ ދެ ޤައުމުގެ ގުޅުމުގެ ހެއްކެއް ކަމަށެވެ.
ޗައިނާގެ ފަތުރުވެރިން ޗުއްޓީ ހޭދަކުރުމަށް ރާއްޖެ ހިޔާރުކުރުމަކީވެސް ދެ ޤައުމުގެ ގުޅުމުގެ ރަމްޒެއްކަން ފާހަގަކުރައްވައި ރައީސް ވިދާޅުވީ ފަތުރުވެރިކަމުގެ ދާއިރާ ވެފައިވަނީ ދެ ޤައުމުގެ ރައްޔިތުން ގުޅުވައިދޭ ބްރިޖަކަށް ކަމަށެވެ.
