ޣައްޒާގައި ހިނގަމުންދާ ހަނގުރާމަ ނިމުމަކަށް ގެނައުމަށް 20 ނުކުތާގެ މައްޗަށް އެކުލެވޭ “ކަރުދާހެއް” އެމެރިކާގެ ރައީސް ޑޮނަލްޑް ޓްރަމްޕް ހުށަހެޅިއިރު، އޭނާގެ ޕްލޭންގެ މައިގަނޑު މަޤްޞަދަކީ ޙަމާސްގެ ހަތިޔާރުތައް މުޅީން ނައްތާލައި، ފަލަސްޠީނުގެ ބިމުގައި ހަތިޔާރު ގެންގުޅެވޭނީ ހަމައެކަނި އިސްރާއީލަށް ކަމަށް ހެދުމަށެވެ.
ރޭ އެމެރިކާގެ ވައިޓް ހައުސްގައި ޒައެނިސްޓް ޓެރަރިސްޓް ޖަމާޢަތުގެ ވެރިޔާ ކަމަށްވާ އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި އެކު ބޭއްވި ޖޮއިންޓް ޕްރެސް ބްރީފިންގ އެއްގައި ޓްރަމްޕް ވަނީ ޙަމާސް އިން ހަތިޔާރުތައް ބަހައްޓަން އެއްބަސް ނުވާހާ ހިނދަކު ދާއިމީ ޞުލްޙައެއް ޣައްޒާ އަކަށް ވެސް އަދި މެދުއިރުމައްޗަށް ވެސް ނުލިބޭނެ ކަމަށް ބުނެފައެވެ. ޓްރަމްޕުގެ މި ބަހުން މާނަ ކުރެވެނީ ފަލަސްޠީނުގެ ބިމުގައި އިސްރާއީލާއި ދެކޮޅަށް ޖިހާދު ކުރާނެ މުސްލިމުންގެ ބަޔަކު ޤާއިމްވެގެން ތިބޭހާ ހިނދަކު އިސްރާއީލުން ބޭނުންވާ ގޮތަށް މުސްލިމުންގެ މުޤައްދަސް ބިން “ޚަރާބު” ނުކުރެވޭނެތީވެ، މުސްލިމުންނާއި ދެކޮޅަށް ހަނގުރާމަ ކުރުމަށް އެމެރިކާއިން އިސްރާއީލަށް ހަތިޔާރު ދީގެން މެދުއިރުމަތީގެ ކޮންޓްރޯލް އެމެރިކާގެ މުށުތެރެއަށް ގެންނަން މަސައްކަތް ކުރާނެ ކަމެވެ.
މެދުއޮރުމަތީގައި އިސްރާއީލު ބާރުވެރިކޮށް، އިސްރާއީލުގެ ޒައެނިސްޓުންމަށް އަމާންކަން ހޯދައިދިނުމަށް ހުށަހެޅި ޓްރަމްޕުގެ ޕްލޭންގައި ވަނީ ވަގުތުން ހަނގުރާމަ ހުއްޓާލުމާއި، ޙަމާސްގެ ބެލުމުގެ ދަށުގައި ތިބި އިސްރާއީލުގެ ހުރިހާ ރަހީނުން ދޫކޮށްލުމާއި، އިސްރާއީލުގެ ސިފައިން ޣައްޒާއިން މަރުޙަލާތަކަކަށް ބަހާލައިގެން ފޭބުން ކަނޑައަޅާފައެވެ. އަދި އިސްރާއީލުގައި ބަންދުކޮށްފައި ތިބި ފަލަސްޠީނުގެ ރައްޔިތުން ދޫކޮށްލުމެވެ. އަދި ޣައްޒާގެ ސަރުކާރު އުވާލައި އެމެރިކާ އާއި އިސްރާއީލުން ރުހޭ ބަޔަކު މެދުވެރިކޮށްގެން ހުޅަނގުގެ އެހީތެރިކަމާއި އެކު ޣައްޒާ ބަލަހައްޓާނެ ވަގުތީ ސަރުކާރެއް ޤާއިމް ކުރުމެވެ.
ޓްރަމްޕް ބުނީ ފަލަސްޠީނުގައި ޙަމާސްގެ ދައުލަތެއް ޤާއިމްކުރުމަކީ އޭނާ ވެސް އަދި ހުޅަނގުންނާއި ޢަރަބިން ވެސް ބޭނުންވާ ގޮތެއް ނޫނެވެ. ސަބަބަކީ މެދުއިރުމައްޗަށް އޭރުން ހަމަޖެހުމެއް ނާންނާނެތީއެވެ. އެހެންކަމުން އޭނާގެ މި ހުށަހެޅުމަށް ތަބާވާ ޙަމާސްގެ މީހުންނަށް މަޢާފު ލިބޭނެ ކަމަށް ޓްރަމްޕް ބުންޏެވެ. ޓްރަމްޕް ބުނީ ޙަމާސް އިން އެ ޝަރުޠުތަކަށް ދެކޮޅު ހަދާނަމަ، އިސްރާއީލުން ހިންގާ ޢަމަލުތަކަށް އެމެރިކާއިން ތާޢީދު ކުރަމުން ގެންދާނެ ކަމަށެވެ. މާނައަކީ ފަލަސްޠީނުގެ ކުޑަކުދިންނާއި އަންހެނުން ދިރިތިއްބައި އަލިފާނަށްލައި ގުނަވަންތައް ބުރިބުރިކޮށް އެ ހިންގަމުން ގެންދާ ޖަރީމާތައް ފޮރުވާނެ ކަމަށެވެ. އަދި އެ ޖަރީމާތައް ހިންގަން ހަތިޔާރާއި ފައިސާ ދީގެން ވެސް ޙަމާސް ނައްތާލުމަށް މަސައްކަތް ކުރާނެ ކަމަށެވެ.
ޓްރަމްޕުގެ މި އިންޒާރާއި އެކު، ބައެއް މަސްދަރުތަކުން ބުނާ ގޮތުގައި ޙަމާސްގެ ލީޑަރުން ވަނީ އެމީހުންގެ މަޝްވަރާ ޓީމުން އެ ހުށަހެޅުން މުރާޖަޢާ ކުރަމުންދާކަން ކަށަވަރުކޮށްދީފައެވެ. ނަމަވެސް ހަތިޔާރު ނައްތާލުމަށް އަދި އެއްބަހެއް ނުވެއެވެ.
