ހުޅުމާލޭގެ ދެވަނަ ފިޔަވަހީގައި ފަހި ދިރިއުޅުން ކޯޕަރޭޝަން (އެފްޑީސީ) އިން ތަރައްޤީކޮށްފައިވާ 4000 ހައުސިން ޔުނިޓު ލިބޭ ފަރާތްތަކަށް ޔުނިޓު ހަވާލުކުރުމުގެ މަސައްކަތް ރަސްމީކޮށް ފަށައިފި އެވެ.
އެފްޑީސީން ބުނީ، އިއްޔެ އަމާން އުދަރެސް ޓަވަރު 14ގައި ބޭއްވި ރަސްމިއްޔާތެއްގައި ޓަވަރަށް އާބާދުވާ އެންމެ ފުރަތަމަ ފަރާތަށް އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ތަޅުދަނޑި ހަވާލުކޮށްދެއްވާފައިވާ ކަމަށެވެ. އަދި މި ރަސްމިއްޔާތުގައި "އަމާން އަތްމަތީ ފޮތް" ވެސް އިފްތިތާހު ކުރެވިފައިވާ ކަމަށް އެ ކޯޕަރޭޝަނުން ފާހަގަކުރި އެވެ.
އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް ވިދާޅުވީ، އެފްޑީސީގެ އޮންލައިން ޕޯޓަލް މެދުވެރިކޮށް އެއްބަސްވުމުގައި ސޮއިކުރުމުގެ މަރުހަލާ ކުރިއަށް ގެންދެވުނު އުސޫލުން، ތަޅުދަނޑި ހަވާލުކުރުމަށް ބޭނުންވާ އެންމެހައި ލިޔެކިޔުންތައް ވެސް އެފްޑީސީގެ ޕޯޓަލް މެދުވެރިކޮށް ފުރިހަމަކުރެވޭނެ އިންތިޒާމު މިހާރު ވަނީ ހަމަޖައްސާފައި ކަމަށެވެ. ހަމްދާން އިތުރަށް ވިދާޅުވީ މި ނިޒާމުގެ ސަބަބުން ހިދުމަތް ލިބިގަތުމުގެ މަރުހަލާތައް އިތުރަށް ހަރުދަނާވެ، ވަގުތާއި ވަސީލަތްތަކުގެ ބޭނުން އެންމެ އެދެވޭ ގޮތުގައި ހިފުމަށް މަގުފަހިވެގެންދާނެ ކަމަށެވެ.
ތަޅުދަނޑި ހަވާލުކުރުމުގެ މަސައްކަތް ކުރިއަށްދާނީ ސަރުކާރު ބަންދުނޫން ކޮންމެ ދުވަހެއްގެ ހެނދުނު 9:00 އިން 16:00 އާ ދެމެދުގައެވެ. އަދި ތަޅުގަނޑި ހަވާލުކުރުމުގެ މަރުހަލާ އަދި ހަވާލުކުރާ ދުވަސް އެފްޑީސީގެ ޕޯޓަލް މެދުވެރިކޮށް އަންގަމުންދާނެ އެވެ.
އެފްޑީސީން އިތުރަށް ބުނީ، މިއަދުން ފެށިގެން، ބޮޑެތި ތަކެއްޗާއި ފަރުނީޗަރު އެރުވުމަށް ހާއްސަ އިންތިޒާމެއް ހަމަޖައްސާފައިވާ ކަމަށާއި، މި ހިދުމަތް ލިބިގަތުމަށްޓަކައި ޕޯޓަލް މެދުވެރިކޮށް ކުރިއާލާ ބުކިން ހެދުމުގެ ފުރުސަތު ވެސް ހުޅުވާލެވިގެންދާނެ ކަމަށެވެ.
އެފްޑީސީގެ ތަސައްވަރަކީ ރާއްޖޭގެ ސޯޝަލް ހައުސިން ވަކި ސްޓޭންޑަޑެއްގައި ހިފަހައްޓައި، ހައުސިން މަޝްރޫޢްތައް ވަކި އަތޮޅެއް، ރަށެއް އިސްތިސްނާ ނުވާހެން މުޅި ރާއްޖެއަށް ފުޅާކުރުން ކަމަށް އެ ކޯޕަރޭޝަނުން ބުންޏެވެ.
