އަންނަ މަހު ބާއްވާ މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (އެމް.އެމް.ބީ.ސީ) ގެ އިންތިހާބުގައި ވާދަކުރަން ނަން ހުށަހަޅާ ފަރާތްތަކުން ވީހާވެސް އަވަހަކަށް ކުށުގެ ރެކޯޑު ސާފު ކުރުމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން އެދިއްޖެއެވެ.
މި އިންތިހާބު އިލެކްޝަންސް ކޮމިޝަނުން ބާއްވާ ގޮތަށް ހަމަޖައްސާފައިވަ ނީ އަންނަ މަހުގެ 11ވަނަ ދުވަހުއެވެ. މި މަގާމުތަކަށް ވާދަކުރުމަށް ބޭނުންވާ ފަރާތްތަކަށް ނަން ހުށަހެޅުމުގެ ފުރުސަތު އަންނަ މަހުގެ 4ވަނަ ދުވަހުގެ މެންދުރު 2:00 އާ ހަމައަށް ވަނީ ހުޅުވާލާފައެވެ.
ޑީޖޭއޭއިން ބުނީ، މީޑިއާ ކޮމިޝަނަށް ކުރިމަތިލާ ފަރާތްތަކުން ކުށުގެ ރެކޯޑު ސާފުކޮށް، އެ ލިޔުން ހުށަހަޅަން ޖެހޭނެތީ، ރެކޯޑު ސާފުކުރަން ބޭނުންވާ ފަރާތްތަކުން ވީހާވެސް އަވަހަށް އެކަމަށް އެދުމަށް އިލްތިމާސް ކުރާ ކަމަށެވެ.
ޑީޖޭއޭއިން ހާމަކުރި ގޮތުގައި، މީޑިއާ ކޮމިޝަންގެ އިންތިޚާބަށް ކުރިމަތިލުމަށް އެދި ރެކޯޑު ސާފުކުރަން ހުށަހަޅާ ފަރާތްތަކުގެ މަސައްކަތް ވީއެންމެ އަވަހަކަށް ނިންމުމަށްޓަކައި ކޯޓުތަކާއި ގުޅިގެން މަސައްކަތް ކުރަމުންދެއެވެ. ނަމަވެސް، ރެކޯޑު ސާފުކުރުމަށް ހަމަޖެހިފައިވަނީ އޮޓޮމޭޓަޑް ސެންޓްރަލް ޑޭޓާ ބޭސްއަކުން ނަމަވެސް، މުޅި ރާއްޖޭގެ ހުރިހާ ކޯޓުތަކުގައި ހުރި ކުށުގެ ރެކޯޑުތައް، ރެކޯޑް ޕޯޓަލަށް އަޅައި އަދާހަމަކުރެވިފައި ނުވާކަން ޑީޖޭއޭއިން ފާހަގަކުރެއެވެ. އެހެންވެ، ކޯޓުތަކުން ވަކިވަކިން ރެކޯޑު ސާފުކުރުމަކީ ވަގުތު ހޭދަވާ ކަމެއް ކަމަށް ޑީޖޭއޭއިން ފާހަގަކުރިއެވެ.
މިކަމަށް ސަމާލުކަން ދެއްވައި، މީޑިއާ ކޮމިޝަންގެ އިންތިޚާބާ ގުޅިގެން ރެކޯޑު ސާފުކުރުމަށްޓަކައި އަންނަ ބުރާސްފަތި ދުވަހުގެ މެންދުރު 13:00 ގެ ކުރިން ހުށަހެޅުމަށް ޑީޖޭއޭއިން ވަނީ އެދިފައެވެ. އޭގެ ފަހުން ހުށަހަޅައިފިނަމަ އިލެކްޝަންސް ކޮމިޝަނުން ކަނޑައަޅާފައިވާ ސުންގަޑިއަށް ރެކޯޑު ސާފުކުރުމުގެ މަސައްކަތް ނުނިމުމުގެ ފުރުސަތު އޮންނާނެ ކަމަށް ވެސް އެ އިދާރާއިން ހާމަކުރެއެވެ. ރެކޯޑު ސާފުކުރުމަށް އެދި ހުށަހަޅަންޖެހޭނީ ޑީޖޭއޭގެ ރެކޯޑު ޕޯޓަލް records.judiciary.gov.mv މެދުވެރިކޮށެވެ.
ޖުމުލަ 7 މެންބަރުންގެ މައްޗަށް އެކުލެވިގެންވާ މީޑިއާ ކޮމިޝަނަށް ބްރޯޑްކާސްޓަރުންނާއި އެހެނިހެން މީޑިއާތަށް ހިމެނޭހެން 4 މެންބަރުން އިންތިހާބު ކުރާނެއެވެ. އެއީ ބްރޯޑްކާސްޓިން ދާއިރާއިން ދެމެންބަރުންނާއި އެހެނިހެން މީޑިއާތަކުން ދެމެންބަރުންނެވެ.
ބްރޯޑްކާސްޓިން ކޮމިޝަންގެ މެންބަރުކަމަށް ކުރިމަތިލެވޭނީ އުމުރުން 30 އަހަރުވެފައިވާ، މީޑިއާ ދާއިރާއިން ނުވަތަ ސިޔާސަތު ކަނޑައެޅުމުގެ ދާއިރާއިން ފުރަތަމަ ޑިގްރީ ހާސިލްކޮށްފައިވާ ނުވަތަ ދާއިރާގެ 5 އަހަރު ދުވަހުގެ ތަޖުރިބާ ލިބިފައިވާ މީހުންނަށެވެ. މީޑިއާތަކުގެ އެޑިޓަރުންނާއި މަސްއޫލުވެރި ފަރާތްތަކަށް މި މަގާމަށް ކުރިމަތި ނުލެވޭނެއެވެ.
