ތ. ދިޔަމިގިއްޔާއި އެއަތޮޅު މަޑިފުށި އަދި ތ. އުފުރިޔާ ގުޅާލާ ކޯޒްވޭގެ މަސައްކަތް، 1 އަހަރާއި 6 މަސް ދުވަހުގެ ތެރޭގައި ނިންމަވައިދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ދިޔަމިގިއްޔަށް ކުރެއްވި ރަސްމީ ދަތުރުފުޅެއްގައި އެރަށުގެ ރައްޔިތުންނާއެކު ބޭއްވެވި ބައްދަލުވުމެއްގައެވެ.
މި ބައްދަލުވުމުގައި ރައީސް ވަނީ ދިޔަމިގިއްޔާއި މަޑިފުށި އަދި އުފުރިޔާ ގުޅާލާ ކޯޒްވޭ ޤާއިމްކުރުމުގެ އެއްބަސްވުމުގައި ސޮއިކުރައްވާފައެވެ. އެމަނިކުފާނު ވިދާޅުވީ، މިވަގުތު ދިޔަމިގިލީ ރައްޔިތުންނަށް އެންމެ މުހިންމީ، ކޯޒްވޭއާއި ހެލްތް ސެންޓަރު އެކްސްޓެންޝަންގެ އިތުރުން ސްކޫލްގެ ވަސީލަތްތައް އިތުރުކުރުމުގެ މަސައްކަތްކަމަށެވެ. ކޯޒްވޭގެ ސަބަބުން ދިޔަމިގިއްޔާއި މަޑިފުއްޓަށް ބޮޑު ކުރިއެރުމެއް ލިބި، ދެރަށުގެ ރައްޔިތުންނަށް އުފާ ފާގަތިކަން ލިބޭނެކަމަށްވެސް ރައީސް ވިދާޅުވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި ފެނުގެ ނިޒާމު ޤާއިމުކުރުމުގެ މަސައްކަތް ނިމުމުން، ކުރިއަށް އޮތް 6 މަސްދުވަހުގެ ތެރޭގައި ދިޔަމިގިލީގެ މަގުތަކުގައި ތާރު އަޅާ ޒަމާނީ ފެންވަރަށް ތަރައްޤީކުރުމުގެ މަސައްކަތް ފައްޓަވާނެކަމަށް ވިދާޅުވިއެވެ. އަދި ރަށްގިރުމުގެ މައްސަލައަށް ޙައްލު ހޯދުމަށް، އެކަމުގެ ޢަމަލީ މަސައްކަތް ފެށުމަށް މިހާރު ތައްޔާރުވެފައިވާކަން އެމަނިކުފާނު ފާހަގަކުރެއްވިއެވެ.
Advertisement
ތައުލީމީ ދާއިރާއަށް އަލިއަޅުވާލައްވައި ރައީސް ވިދާޅުވީ، އެ ރަށުގައި އޭލެވެލް ފެށުމަށް ހުރި ދަތިތައް ހައްލުކޮށްދެއްވާނެ ކަމަށެވެ. އަދި އަންނަ ދިރާސީ އަހަރަށް މި މަސައްކަތް ނިންމަވާނެ ކަމުގެ ޔަގީންކަން ދެއްވަމުން، 10 ކްލާސްރޫމާ މަލްޓިޕަރަސް ހޯލެއްވެސް ތަރައްޤީ ކުރައްވާނެ ކަމަށް ވިދާޅުވިއެވެ.
ދިޔަމިގިލީގައި ފިޓްނަސް އެންޑް ރެކްރިއޭޝަން ސެންޓަރު ތަރައްޤީކުރުމުގެ މަސައްކަތް މިހާރު ފަށާފައިވާކަން ފާހަގަކުރައްވައި، ފުޓުބޯޅަ ދަނޑުގައި ލައިޓު ހަރުކޮށް، ފެންސް ޖަހާ ތަރައްޤީކޮށް ކައުންސިލަށް ބޭނުންވާ ތަކެތި ފޯރުކޮށްދީގެން ވޮލީކޯޓެއްވެސް ތަރައްޤީ ކޮށްދެއްވާނެ ކަމަށް ރައީސް ވިދާޅުވިއެވެ.
މީގެ އިތުރުން ދިޔަމިގިލީ ހެލްތް ސެންޓަރުގެ އެކްސްޓެންޝަން އިމާރާތުގެ މަސައްކަތް މި އަހަރުގެ ތެރޭގައި ފެށި، އަންނަ އަހަރުގެތެރޭގައި ނިންމަވާނެ ކަމަށާއި. މި މަސައްކަތް ނިމުމުން، އެރަށުގދ ހެލްތް ސެންޓަރުން 24 ގަޑިއިރު ޚިދުމަތްދޭ ޒަމާނީ މަރުކަޒަކަށް ބަދަލުވެގެންދާނެ ކަމަށް ވެސް ރައީސުލްޖުމްހޫރިއްޔާ ވިދާޅުވިއެވެ.
