އެފްރިކާގެ އިރުމަތީ ބައްރުގެ ރަތް ކަނޑުގެ އައްސޭރިފަށުގައި އޮންނަ އެރިޓްރިއާގެ ފިރިހެނުނުންނަށް ދެއަނބިން ގެންގުޅުމަކީ 6 މަހާއި 1 އަހަރާއި ދެމެދުގެ މުއްދަތަކަށް ޖަލަށްލެވޭ ކުށެކެވެ. ނުވަތަ 20،001 އާއި 50،000 ނަކްފާ އާއި ދެމެދުގެ ޢަދަދަކުން އެ މީހަކު ޖޫރިމަނާ ކުރާނެއެވެ. ނަކްފާ އަކީ އެރިޓްރިއާގެ ފައިސާ އަށް ކިޔާ ނަމެވެ. 1 ޑޮލަރަކީ ގާތްގަނޑަކަށް 15 ނަކްފާއެވެ.

^{އެރިޓްރިއާ: ތާރީޚީ ގޮތުން ބަލާއިރު މައްކާގެ މުޝްރިކުންގެ އުނދަގޫ ބޮޑުވެގެން ރަސޫލާ (މުޙައްމަދު ޞޢވ) ގެ ދުވަސްވަރު (7ވަނަ ޤަރުނުގައި) މުސްލިމުން ރެފިއުޖީންގެ ގޮތުގައި އެރިޓްރިއާގައި ތިބި. އެރިޓްރިއާގެ ފިރިހެނުންނަށް ދެމީހުންނާއި އެއްފަހަރާ ކައިވެނިކޮށްގެން އުޅުމަކީ ޖަލު ޙުކުމެއް އަންނަ ކަމެއް.}

އެރިޓްރިއާ އާއި ބެހޭ ގޮތުން 2016 ވަނަ އަހަރުގެ ޖެނުއަރީ މަހު ކެންޔާގެ ބަޔަކު ދޮގު ޚަބަރުވެސް ފެތުރިއެވެ. އޭރު އެ މީހުން ފެތުރި ޚަބަރުގައި ބުނެފައި ވަނީ އެރިޓްރިއާގެ އާބާދީގައި އަންހެނުންނަށް ވުރެ ފިރިހެނުން ގިނަވާތީވެ ކޮންމެ ފިރިހެނަކު 1 އަންބަށް ވުރެ ގިނަ އަނބިން ގެންގުޅުން ލާޒިމް ކުރާ ކަމަށެވެ. އަދި މިއާއި ޚިލާފްވާ ކޮންމެ ބަޔަކު ޖަލަށް ލާނެ ކަމަށެވެ. އެރިޓްރިއާގެ ފިރިހެނުން ދެ އަނބިން ގެންގުޅުމަށް ލާޒިމްކުރާ ކަމަށް ބުނެ އެ ދޮގު ވާހަކަތައް ލިޔުނު މައްސަލައިގައި އެ ނޫހުގެ އެޑިޓަރު މަޤާމުން ވެސް ވަކި ކުރިއެވެ.

އެރިޓްރިއާގެ އޮފިޝަލުން ވަނީ އެ ޤައުމުގެ ޤާނޫނުތަކާއި ބެހޭ ގޮތުން ދޮގު މަޢުލޫމާތާއި ޚަބަރު ފަތުރާތީވެ ކަންބޮޑުވުން ވެސް ފާޅުކޮށްފައެވެ. 25 ޖަނަވަރީ 2016 ވީ ދުވަހު ބީބީސީން ބުނީ އެރިޓްރިއާގައި ދެއަނބިންނާއި ކައިވެނި ނުކުރާނަމަ ޖަލަށް ދާން ޖެހޭ ވާހަކަ އަކީ ދޮގެއް ކަމަށާއި، އެ ޤައުމުގައި އެއްފަހަރާ އެކަކަށް ވުރެ ގިނަ މީހުނާއި އިނދެގެން އުޅުން މަނާ ކަމަށެވެ.

^{އެރިޓްރިއާގައި ދެއަނބިން ގެންގުޅުން ލާޒިމް ކަމަށް ބުނާ ވާހަކަ އަކީ ދޮގެއް ކަމަށް ބުނެ 25 ޖަނަވަރީ 2016 ވަނަ އަހަރު ބީބީސީގައިވާ ލިޔުމުގެ ސްކްރީންޝޮޓެއް: އެރިޓްރިއާގައި އެއްވެސް ފިރިހެނަކަށް ދެއަނބިން ނުގެންގުޅެވޭ. އެއީ 1977 ވަނަ އަހަރުން ފެށިގެން ޤާނޫނީ ކުށެއް.}

އެރިޓްރިއާގެ ގާތްގަނޑަކަށް ދެބައިކުޅަ އެއްބަޔަކީ މުސްލިމުން ކަމުގައި ވިޔަސް 1977 ވަނަ އަހަރުން ފެށިގެން މިއަދާއި ހަމަޔަށް އެ ޤައުމުގެ ފިރިހެނުންނަށް ދެއަނބިން ގެންގުޅުމަކީ ޤާނޫނީ ގޮތުން ކުށެކެވެ. މިއީ އިސްލާމް ދީނާއި ފުށުއަރާ ކަމެކެވެ.

އެރިޓްރިއާ އަކީ މުސްލިމުންނާއި ތާރީޚި ގޮތުން ވަރަށް ބޮޑަށް ގުޅިފައިވާ ޤައުމެކެވެ. ތާރީޚީ ގޮތުން ބަލާއިރު މައްކާގެ މުޝްރިކުންގެ އުނދަގޫ ބޮޑުވެގެން ރަސޫލާ (މުޙައްމަދު ޞޢވ) ގެ ދުވަސްވަރު (7ވަނަ ޤަރުނުގައި) މުސްލިމުން ރެފިއުޖީންގެ ގޮތުގައި އެރިޓްރިއާގައި ތިއްބެވެ. އޭރު އެތަނަށް ކިޔަނީ އެރިޓްރިއާ އެއް ނޫނެވެ. އެއި އަކްސޫމް ވަންހައިގެ ބައެކެވެ. އޭރު އެތަނުގެ ރަސްކަލަކީ ނަޖާޝީއެވެ. އެރިޓްރިއާ ގެ ނަން ދިނީ ވަރަށް ފަހުން، 19 ވަނަ ޤަރުނުގެ ފަހުކޮޅު އިޓަލީގެ އިސްތިޢުމާރުގެ ދުވަސްވަރުގައެވެ.

ކުރުކޮށް ބުނާނަމަ އެރިޓްރިއާގެ ފިރިހެނުންނަށް ދެއަތްބަށް ކައިވެނިކުރުން ވަނީ 1977 އިން ފެށިގެން އަދިއަދާއި ހަމަޔަށް ވެސް މަނާ ކޮށްފައެވެ.