އެރިޓްރިއާގައި ހުރި އިތިއޯޕިއާގެ އެމްބަސީ ބަންދުކޮށް ޑިޕްލޮމެޓުން އަނބުރާ ގެންގޮސްފި

އެރިޓްރިއާގެ ވެރިރަށް އަސްމާރާގައި ހުންނަ އިތިއޯޕިއާގެ އެމްބަސީ ބަންދުކޮށް، އެރިޓްރިއާގައި ތިބި އިތިއޯޕިއާގެ ހުރިހާ ޑިޕްލޮމެޓުން އަނބުރާ ގެނައުމަށް ނިންމައިފިއެވެ. މީގެ އިތުރުން އިތިއޯޕިއާގެ ވެރިރަށް އެޑިސް އަބަބާގައި ތިބި އެރިޓްރިއާގެ 10 ޑިޕްލޮމެޓުންނަކީ އެ ގައުމަށް ބޭނުންނުވާ "ޕާސޯނާ ނޮން ގްރާޓާ" ގެ ގޮތުގައި ކަނޑައަޅައި، 48 ގަޑިއިރު ތެރޭގައި އިތިއޯޕިއާއިން ފުރައިގެން ދިއުމަށް، އިއްޔެ ވަނީ އަމުރުކޮށްފައެވެ. މިއާއެކު، އެރިޓްރިއާ ސަރުކާރުން ވެސް ވަނީ އިތިއޯޕިއާއާއެކު އޮތް ހުރިހާ ސިޔާސީ ގުޅުންތަކެއް ކަނޑާލާފައިވާ ކަން ރަސްމީކޮށް އިޢުލާންކޮށްފައެވެ.

މި ނިންމުން ނިންމަން ޖެހުނު މައިގަނޑު ސަބަބެއް ކަމަށް އިތިއޯޕިއާގެ ފޮރިން މިނިސްޓްރީން ބުނެފައިވަނީ، އެރިޓްރިއާއިން އިތިއޯޕިއާއާ ދެކޮޅަށް ސީދާ ގޮތުންނާއި ނުސީދާ ގޮތުން ހިންގަމުންދާ ހަސަދަވެރި އަދި ދެކޮޅުވެރި ޢަމަލުތަކެވެ. އަދި އިތިއޯޕިއާއިން ބޭރުކޮށްލާ އެރިޓްރިއާގެ ޑިޕްލޮމެޓުން، ބައިނަލްއަގުވާމީ ޑިޕްލޮމެޓިކް ހަމަތަކާ ޚިލާފަށް އިތިއޯޕިއާގެ ގައުމީ ސަލާމަތަށް ނުރައްކާވާ ފަދަ ޖާސޫސީ އަދި ސިއްރު ޙަރަކާތްތަކެއްގައި ބައިވެރިވަމުންދާ ކަމުގެ ތުހުމަތު ވެސް އިތިއޯޕިއާއިން ވަނީ ކޮށްފައެވެ.

މި ދެ ގައުމުގެ ދެމެދުގައި މަސްރަޙު މިހާ ބޮޑަށް ގޯސްވެގެން ދިޔައީ، އިތިއޯޕިއާގެ ސަރުކާރާ ދެކޮޅަށް އެ ގައުމުގެ އެކި ސަރަޙައްދުތަކުގެ ހަނގުރާމަވެރި ޖަމާއަތްތަކުން އާ އިއްތިހާދެއް ހަދައި، ވެރިރަށް އެޑިސް އަބަބާއަށް ޑްރޯން ޙަމަލާތަކެއް ދޭން އުޅުމާއި ވެސް ގުޅިގެންނެވެ. އިތިއޯޕިއާ ސަރުކާރުން ތުހުމަތު ކުރާ ގޮތުގައި އެރިޓްރިއާއިން ދަނީ މި ހަނގުރާމަވެރި ޖަމާއަތްތަކަށް ހަތިޔާރާއި ތަމްރީނުދީ އެހީތެރިވަމުންނެވެ.

މިއާއި އެކު، 2018 ވަނަ އަހަރު ދެ ގައުމުގެ ދެމެދުގައި ގާއިމުކުރި ސުލްހައިގެ އެއްބަސްވުން މިހާރު ވަނީ މުޅިން އުވިގެން ގޮސްފައެވެ.