އިތިއޯޕިއާ އާއި އެރިޓްރިއާގެ ސިޔާސީ ގުޅުން މުޅިން ގޯސްވެ، ދެ ގައުމުގެ މެދުގައި އަލުން ވަރުގަދަ އަސްކަރީ ކުރިމަތިލުމެއް ފެށިދާނެ ކަމުގެ ބިރު ބޮޑުވެފައިވަނިކޮށް، އެރިޓްރިއާގެ ރައީސް އީސަޔާސް އަފްވަރްގީ އިތިއޯޕިއާގެ ސަރުކާރަށް ވަރުގަދަ ހަނގުރާމައިގެ އިންޒާރެއް ދެއްވައިފިއެވެ.
އެގައުމުގެ ސިފައިންގެ ކުރިމަތީގައި ހުންނަވައި ރައީސް އީސަޔާސް ވިދާޅުވީ، އިތިއޯޕިއާގެ ބޮޑުވަޒީރު އަބީ އަހުމަދުގެ ހަރުކަށި ސިޔާސަތުތަކަށް ރައްދުދީ، ގައުމުގެ ދިފާއުގައި ކޮންމެ ފަދަ ކުރިމަތިލުމަކަށް ވެސް އެރިޓްރިއާގެ ސިފައިން އޮތީ ސާބިތުކަމާއެކު ފުރިހަމައަށް ތައްޔާރަށެވެ. މި މަސްރަހު ނުރައްކާތެރި ދަރަޖައަކަށް ހޫނުވެގެންދިޔައީ، އިތިއޯޕިއާގެ އުތުރުގައި ހަރަކާތްތެރިވާ ހަނގުރާމަވެރި އިއްތިހާދަކަށް އެރިޓްރިއާ އިން ހަތިޔާރާއި އެހީތެރިކަން ފޯރުކޮށްދޭ ކަމަށް އިތިއޯޕިއާ އިން ތުހުމަތު ކުރުމާ ގުޅިގެންނެވެ.
މިކަމުގެ ރައްދުގައި އިތިއޯޕިއާ އިން ވަނީ އެރިޓްރިއާގައި ހުންނަ އެގައުމުގެ އެމްބަސީ ބަންދުކޮށް، އެރިޓްރިއާގެ 10 ސީނިއާ ޑިޕްލޮމޭޓުން ގައުމުން ބޭރުކޮށްފައެވެ.
Advertisement
މިއާ އެކު އެރިޓްރިއާ އިން ވެސް އިތިއޯޕިއާއާ އެކު އޮތް ހުރިހާ ސިޔާސީ ގުޅުމެއް މުޅިން ކަނޑާލާފައިވާ ކަން ވަނީ ރަސްމީކޮށް އިއުލާނުކޮށްފައެވެ.
އެރިޓްރިއާގެ ޚާރިޖިއްޔާ އިން ބުނާ ގޮތުގައި، މިހާރު އުފެދިފައިވާ މައްސަލަތަކުގެ އަސްލަކީ ރަތްކަނޑުގެ ސަރަހައްދުތަކަށް އަތްގަދަކޮށް، ސަރަހައްދީ ގައުމުތަކުގެ މިނިވަންކަމަށް އަރައިގަތުމަށް އިތިއޯޕިއާ އިން ގެންގުޅޭ ސިޔާސަތުތަކެވެ. ހޯން އޮފް އެފްރިކާ ސަރަހައްދުގައި ދެ ގައުމުގެ މެދުގައި ބޮޑު ހަނގުރާމައެއް ފެށިއްޖެނަމަ، މުޅި ސަރަހައްދުގެ ހަމަޖެހުން މުޅިން ގެއްލިގެންދާނެއެވެ.
