ވިލުފުށީގައި އޭޓީއެމްގެ ހިދުމަތް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރަސްމީކޮށް މިއަދު ފައްޓަވައިދެއްވައިފި އެވެ.
ވިލުފުށީގައި އޭޓީއެމްގެ ހިދުމަތް ރައީސް ޑރ. މުއިއްޒު ފައްޓަވައިދެއްވާފައިވަނީ، އެމަނިކުފާނު ތ. އަތޮޅުގެ މީހުން ދިރިއުޅޭ ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އެ ރަށަށް ވަޑައިގެންނެވެ. ވިލުފުށީގައި އޭޓީއެމްގެ ހިދުމަތް ރަސްމީކޮށް ފަށްޓަވައިދެއްވުމަށްފަހު، ރައީސް ވަނީ ހަނދާނީ ބޭންކު ކާޑެއް އެ ރަށުގެ ކައުންސިލަށް ހަވާލުކުރައްވައިފަ އެވެ.
މި ރަސްމިއްޔާތުގައި، ވިލުފުށީގައި ގާއިމުކުރާ ބީއެމްއެލް އިސްލާމިކް ބްރާންޗްގެ ބިންގާ ވެސް ވަނީ އަޅުއްވައި ދެއްވައިފަ އެވެ. އެ ރަށުގައި ގާއިމުކުރާ ބީއެމްއެލް އިސްލާމިކް ބްރާންޗުގެ ބިންގާ އަޅުއްވައިދެއްވާފައިވަނީ ފިނޭންސް މިނިސްޓަރު މޫސާ ޒަމީރާއި، ބީއެމްއެލްގެ ޗެއާޕާސަން އަހްމަދު އަލީ ހަބީބާއި، ބީއެމްއެލްގެ މެނޭޖިން ޑިރެކްޓަރު މުހައްމަދު ޝަރީފްގެ އިތުރުން ވިލުފުށީ ދާއިރާގެ މެންބަރު ހަސަން ވަހީދާއި، އަދި ވިލުފުށީ ކައުންސިލްގެ ރައީސް ހުސައިން ޖަބީން އެވެ.
ވިލުފުށީގައި ގާއިމުކުރާ ބީއެމްއެލް އިސްލާމިކް ބްރާންޗުގެ ބިންގާ އެޅުމުގެ ރަސްމިއްޔާތުގެ ތެރެއިން: ފޮޓޯ/ ރައީސް އޮފީސް---
މީހުން ދިރިއުޅޭ ރަށްރަށުގައި ބީއެމްއެލްގެ ހިދުމަތްތައް ފުޅާކުރުމަށް ކުރަމުންގެންދާ މަސައްކަތްތަކުގެ ދަށުން ބީއެމްއެލް އިން ވަނީ 12 އަތޮޅެއްގެ މީހުން ދިރިއުޅޭ ހުރިހާ ރަށެއްގައި އޭޓީއެމްގެ ހިދުމަތް ފަށައިފަ އެވެ.
މި އަހަރުގެ ނިޔަލަށް ރާއްޖޭގެ މީހުން ދިރިއުޅޭ ހުރިހާ ރަށެއްގައި އޭޓީއެމް ގާއިމުކުރުމުގެ މަޝްރޫއު އެއްކޮށް ނިންމާލުމަކީ ބީއެމްއެލްގެ އަމާޒެކެވެ. މީހުން ދިރިއުޅޭ ރަށްރަށުގައި އޭޓީއެމް ގާއިމުކުރުމުގެ ސަބަބުން އާންމު ރައްޔިތުންނަށް ގިނަ ގޮތްގޮތުން ފަސޭހަވެގެންދާނެ އެވެ
